కర్ణాటకలో నాయకత్వ మార్పు లేదు: సిద్ధరామయ్య, డీకే శివకుమార్
బ్రేక్ ఫాస్ట్ తరువాత మీడియా సమావేశం నిర్వహించిన ఇద్దరు నాయకులు
By : The Federal
Update: 2025-11-29 12:54 GMT
కర్ణాటకలో కొద్ది నెలలుగా కొనసాగుతున్న నాయకత్వ మార్పు హైడ్రామా ముగిసినట్లయింది. సీఎం సిద్ధరామయ్య, డిప్యూటీ సీఎం డీకే శివకుమార్ మధ్య శనివారం సీఎం ఇంట్లో జరిగిన అల్ఫాహార సమావేశం తరువాత ఇద్దరు ఐక్యంగా ఈ అభిప్రాయం వ్యక్తం చేశారు.
తమ మధ్య ఎలాంటి విభేదాలు లేవని, కాంగ్రెస్ అధిష్టానం సూచనలు పాటిస్తామని ఇద్దరు నాయకులు స్పష్టం చేశారు. సమావేశం తరువాత వారు ఇద్దరు సంయుక్తంగా విలేకరుల సమావేశం నిర్వహించారు.
నాయకత్వంలో ఇప్పుడు ఎటువంటి మార్పు లేదని, ముఖ్యమంత్రి పదవి అనే అంశం చర్చించలేదని ఇద్దరు నాయకులు ప్రెస్ మీట్ లో స్పష్టం చేశారు. ముఖ్యమంత్రిని మార్చే అంశాన్ని ప్రస్తుతానికి తాత్కాలికంగా నిలిపివేస్తున్నట్లు సిద్ధరామయ్య ముఖ్యమంత్రిగా కొనసాగుతారని అన్నారు.
విభేదాలు లేవు: సిద్ధరామయ్య
‘‘మా మధ్య ఎలాంటి విభేదాలు లేవు. భవిష్యత్ లోనూ ఉండవు. మా ఎజెండా 2028 ఎన్నికలు, స్థానిక సంస్థల ఎన్నికలు ముఖ్యమైనవి. వాటి గురించి చర్చించాము. 2028 ఎన్నికల్లో కాంగ్రెస్ ను తిరిగి తీసుకురావడం గురించి చర్చించాము.
వాటికి కలిసి వెళ్తామని చర్చించాము. మా మధ్య ఎలాంటి విభేదాలు లేవు. భవిష్యత్ లో ఎలాంటి విభేదాలు ఉండవు’’ అని సిద్ధరామయ్య అన్నారు. కర్ణాటక ముఖ్యమంత్రి పదవి విషయంలో గందరగోళం మీడియానే సృష్టించిందని అన్నారు.
‘‘హై కమాండ్ ఏం చెప్పినా మేము దానిని పాటిస్తాము. రేపటి నుంచి ఎటువంటి గందరగోళం ఉండదు. ఇప్పటికే ఎటువంటి గందరగోళం లేదు. కొంతమంది మీడియా రిపోర్టర్లు గందరగోళం సృష్టించారు’’ అని సిద్ధరామయ్య అన్నారు.
అవిశ్వాస తీర్మానం తీసుకువస్తామని బీజేపీ చేసిన హెచ్చరికను సీఎం ఎగతాళి చేశారు. ‘‘బీజేపీ, జేడీఎస్ లకు తప్పుడు ఆరోపణలు చేయడం అలవాటు బీజేపీ, జేడీఎస్ లు సంఖ్య 60, 18 మాత్రమే. వారు మాతో సమానంగా లేరు. మా సంఖ్య 140. ఇది తప్పుడు ఆలోచన. వాటిని మేము ఎదుర్కొంటాము’’ అన్నారు.
కలిసి పనిచేస్తాం: శివకుమార్..
పార్టీలో ఎలాంటి గ్రూపులు లేవని శివకుమార్ అన్నారు. ‘‘ఇప్పుడు కూడా మేము కలిసి పనిచేస్తున్నాము. సీఎం ఏమి చెప్పినా నేను సీఎంతోనే ఉన్నాను. మేమిద్దరం కలిసి పనిచేస్తున్నాము’’ అని అన్నారు.
‘‘మీ అందరి మద్దతుతో మేము కాంగ్రెస్ ప్రభుత్వాన్ని తీసుకువచ్చాము. మేము ఇచ్చిన హమీ ప్రకారం పనిచేస్తున్నాము. రాష్ట్ర ప్రజలు వారి పూర్తి మద్దతు ఇస్తున్నాము. వారి కోరికలను నెరవేర్చాలి. మేము ఆ దిశగా పనిచేస్తున్నాము. హైకమాండ్ ఏమి చెప్పినా, మేము దానిని అనుసరిస్తాము’’ అని ఆయన అన్నారు.
‘‘నాయకత్వ సమస్య విషయానికొస్తే, మేము మా పార్టీ హైకమాండ్ ను అనుసరిస్తాము. వారు ఏమి చెప్పినా అది మా నిర్ణయం. మేము పార్టీకి నమ్మకమైన సైనికులం. మనదేశంలో పార్టీ కష్టసమయాల్లో ఉందని మాకు తెలుసు.
కానీ కర్ణాటకలో కీలక పాత్ర పోషించి 2028 లో తిరిగి అధికారంలోకి వస్తామని, 2029 లో మల్లికార్జున్ ఖర్గే, రాహుల్ నాయకత్వంలో ముందుకు సాగుతామని మేము విశ్వసిస్తున్నాము’’ అని ఆయన అన్నారు.
కొంతమంది కాంగ్రెస్ నాయకులు ఢిల్లీకి ప్రయాణిస్తున్నారనే నాయకత్వ మార్పు గురించి వచ్చిన ఊహగానాలు ఇద్దరు నాయకులు తోసిపుచ్చారు. ‘‘కేబినేట్ పునర్ వ్యవస్థీకరణ లేదా విస్తరణపై చర్చించడానికి ఎమ్మెల్యేలు ఢిల్లీకి వెళ్తున్నారు. నాయకత్వ మార్పు అనే ప్రశ్నే లేదు’’ అని వారు స్పష్టం చేశారు.