‘తెలంగాణకు ఉన్న ఏకైక విలన్ కాంగ్రెస్’

కాంగ్రెస్ పార్టీపై మాజీ మంత్రి, బీఆర్ఎస్ వర్కింగ్ ప్రెసిడెంట్ కేటీఆర్ విమర్శనాస్త్రాలు సంధించారు. తెలంగాణను ప్రతిసారి ముంచిన ఘనత కాంగ్రెస్‌కే దక్కుతుందన్నారు. తెలంగాణను, రాష్ట్ర ప్రజలను మోసం చేయడం కాకుండా కాంగ్రెస్ ఏం చేసింది? అని ప్రశ్నించారు. తెలంగాణ కోసం కేసీఆర్ చేపట్టిన దీక్షను పురస్కరించుకుని తెలంగాణ వ్యాప్తంగా శనివారం దీక్ష దివాస్ నిర్వహిస్తున్నారు. అన్ని జిల్లాలో ఈ కార్యక్రమాలు నిర్వహిస్తున్నారు. ఈ కార్యక్రమంలో పాల్గొన్న కేటీఆర్.. కాంగ్రెస్‌పై కీలక విమర్శలు చేశారు.

‘‘పీసీసీ కాంగ్రెస్ అధ్యక్షులు ఉద్యమ కాలంలో ఎక్కడున్నారో ఎవరికి తెలియదు. ఆయన కూడా ఈరోజు తెలంగాణ ఉద్యమం గురించి కెసిఆర్ గారి దీక్ష గురించి అడ్డగోలుగా మాట్లాడుతున్నాడు. కేంద్రంలో రాష్ట్రంలో అప్పుడు అధికారంలో ఉన్న కాంగ్రెస్ పార్టీనే స్వయంగా తెలంగాణ ఏర్పాటు ప్రకటన చేస్తూ కేసీఆర్ గారి ప్రాణం ముఖ్యమైందని దీక్ష విరమించాలని వేడుకున్న విషయాన్ని కాంగ్రెస్ నేతలకు గుర్తు చేస్తున్నా. కెసిఆర్ అనే మూడు అక్షరాలు లేకుంటే తెలంగాణ లేదు అన్నది సత్యం’’ అని అన్నారు.

‘‘తెలంగాణ ఏర్పాటు కోసం కేసీఆర్ చేసిన దీక్షను తక్కువ చేసి అవమానకారంగా మాట్లాడుతున్న కాంగ్రెస్ నేతలు ఈ అంశాన్ని గుర్తుంచుకోవాలి. హీరోలు మౌనంగా ఉంటే విలన్లు కూడా మేమే హీరోలని ఫోజులు కొడతారు. అందుకే ఉద్యమంలో భాగస్వాములైన ప్రతి ఒక్కరూ ఆనాటి ఉద్యమ ఘట్టాలను, దీక్ష దివాస్ ప్రాధాన్యతను మరోసారి ప్రజలకు తెలియజేయాల్సిన అవసరం ఉన్నది. తెలంగాణ ఏర్పాటు తర్వాత సోనియాగాంధీకి ధన్యవాదాలు చెప్పిన సంస్కారం మాది’’ అని తెలిపారు.

‘‘ముఖ్యమంత్రి రేవంత్ రెడ్డి మాదిరి ఏనాడు తెలంగాణ బలిదేవత సోనియా గాంధీ అని మేము అనలేదు. మమ్మల్ని అవమానపరిస్తే ఊరుకుంటాం కానీ తెలంగాణను, తెలంగాణ ఉద్యమాన్ని అవమానపరిస్తే ఊరుకునేది లేదు. 60 సంవత్సరాల సుదీర్ఘ కాలంలో ప్రతిసారి తెలంగాణను ముంచింది కాంగ్రెస్ పార్టీనే. 19 50 నుంచి 2025 వరకు తెలంగాణ తొలి శత్రువు విలన్ కాంగ్రెస్ పార్టీనే. ఆనాటి నుంచి ఈనాటి దాకా తెలంగాణ ప్రజాప్రతినిధులను పార్టీలో కలుపుకొని మోసం చేస్తున్నది కాంగ్రెస్ పార్టీనే’’ అని విమర్శించారు.

‘‘దమ్ముంటే చేర్చుకున్న పదిమంది ఎమ్మెల్యేలతో రాజీనామా చేసి ఎన్నికలకు రావాలని కేటీఆర్ సవాల్. తెలంగాణ ప్రజలు ఉద్యమాల కోసం ప్రజల కోసం నిలబడిన వీరులు. 60 ఏళ్ల పాటు బానిసలుగా ఉన్నది కాంగ్రెస్ పార్టీ నాయకులే. తల్లి తెలంగాణను తీసివేసి కాంగ్రెస్ బొమ్మను పెట్టుకున్నది కాంగ్రెస్ బానిసలే. సచివాలయం ముందున్న రాజీవ్ గాంధీ విగ్రహాన్ని తీసి తల్లి తెలంగాణ విగ్రహం బరాబర్ పెడతాము. ఈ దీక్ష దివాస్ సందర్భంగా తెలంగాణ ఉద్యమాన్ని అమరవీరుల త్యాగాలను ప్రజల పోరాటపటిమను గుర్తుచేసుకొని మరోసారి పునరంకితం కావాల్సిన అవసరం ఉన్నది’’ అని వ్యాఖ్యానించారు. అంతేకాకుండా దీంతోపాటు కాంగ్రెస్ పార్టీ తెలంగాణకు చేసిన ద్రోహాన్ని అమరుల ప్రాణాలు తీసుకున్న తీరుని తెలంగాణకు నిరంతరం చేస్తున్న ద్రోహాన్ని గుర్తుంచుకోవాల్సిన అవసరం ఉన్నదన్నారు.