నకిలీ అధికారి శశి కాంత్ ఇంట్లో సోదాలు చేస్తూ పట్టుబడ్డ కానిస్టేబుల్

నకిలీ ఐఏఎస్ , ఐపిఎస్ అధికారి శశికాంత్ ను ఇటీవలె ఫిల్మ్ నగర్ పోలీసులు అరెస్ట్ చేసిన సంగతి తెలిసిందే. అయితే శశికాంత్ ఇంట్లో సోదాలు చేసిన కానిస్టేబుల్ ఎస్. శరణ్ దొంగతనానికి పాల్పడ్డట్టు బయటపడింది. సిటీ ఆర్మ్ డ్ రిజర్వ్ విభాగంలో పోలీస్ కాని స్టేబుల్ గా పని చేస్తున్న శరణ్ నకిలీ అధికారి శశికాంత్ ఇంట్లో దొంగతనానికి పాల్పడి అరెస్ట్ అయ్యాడు. ఒక నేరస్థుడి ఇంట్లో సోదాలు చేస్తున్న క్రమంలో కానిస్టేబుల్ దొంగతానికి పాల్పడ్డారు. ఈ దొంగతనం మరో కానిస్టేబుల్ వీడియో చిత్రీకరణ చేస్తున్న సమయంలో రికార్డయ్యింది. నేరస్థుడి ఇంట్లో సోదాలు చేసే సమయంలో రికార్డు చేయడం పోలీసుల విధి. విధినిర్వహణలో ఉన్న కానిస్టేబుల్ శరణ్ దొంగతనానికి పాల్పడం పోలీసు శాఖకు తలవొంపులు తెచ్చింది. ఈ కేసును సీరియస్ గా తీసుకున్న పోలీసులు ఎఆర్ కానిస్టేబుల్ శరణ్ ను ఫిల్మ్ నగర్ పోలీసులు కేసు నమోదు చేసి అరెస్ట్ చేశారు. శరణ్ చోరీకి పాల్పడిన రోలెక్స్ వాచి ఒరిజనల్ కాదని పోలీసులు తేల్చడం ఈ కేసులో కొసమెరుపు. శశికాంత్ నివాసమున్న షేక్ పేట లోని అపర్ణా ఔరా ఖరీదైన ప్లాట్ అని పోలీసులు చెబుతున్నారు. ఈ ప్లాట్ లో ఉంటూ శశికాంత్ అనేక నేరాలకు పాల్పడ్డాడు. రియల్ ఎస్టేట్ వ్యాపారులను, బిల్డర్లను బెదిరిస్తూ ఈ నకిలీ అధికారి వసూళ్లకు పాల్పడినట్టు పోలీసుల విచారణలో తేలింది. ఆయుధ లైసెన్స్ ఉన్న ఇద్దరు వ్యక్తులను బిల్డర్లుగా నియామకం చేసుకుని బెదిరింపులకు పాల్పడి నకిలీ అధికారి శశికాంత్ వసూళ్లకు పాల్పడినట్టు పోలీసుల దర్యాప్తులో తేలింది.బెట్టింగ్ యాప్ మోజులో పడ్డ  హైదరాబాద్ కు చెందిన  సబ్ ఇన్స్ పెక్టర్ భాను ప్రసాద్ తనకు ప్రభుత్వం ఇచ్చిన రివాల్వర్ ను విక్రయించిన ఘటన మరువక ముందే  ఎఆర్ కానిస్టేబుల్ శరణ్  నేరస్థుడి ఇంట్లో సోదాలు చేస్తూ పట్టుబడటం తెలంగాణలో సంచలనమైంది. శరణ్ ప్రస్తుతం ఫిల్మ్ నగర్ పోలీస్ ఇన్స్ పెక్టర్ వాహనానికి డ్రైవర్ గా పని చేస్తున్నాడు. శరణ్ గతంలో చేసిన నేరాలను ఫిల్మ్ నగర్ పోలీసులు ఆరా తీస్తున్నారు.