తెలంగాణ రైజింగ్ గ్లోబల్ సమిట్-2047 ప్రత్యేకతలు ఏమిటో తెలుసా ?

ముఖ్యమంత్రి ఎనుముల రేవంత్ రెడ్డి గ్లోబల్ సమిట్ ను అత్యంత ప్రతిష్టాత్మకంగా తీసుకున్నాడు. తెలంగాణ రైజింగ్ పేరుతో డిసెంబర్ 8,9 తేదీల్లో అంతర్జాతీయ సదస్సు జరగబోతోంది. ఈ సదస్సు విజయవంతం అవటానికి రేవంత్(Revanth) వివిధ శాఖల ఉన్నతాధికారులతో రెగ్యులర్ గా సమీక్షలు నిర్వహిస్తున్నారు. గ్లోబల్ సదస్సు(Telangana Rising Global Summit) అనగానే ముఖ్యలక్ష్యం ఏమిటో అర్ధమయ్యే ఉంటుంది. అంతర్జాతీయస్ధాయిలో తెలంగాణకు ముఖ్యంగా(Hyderabad) హైదరాబాద్ కు పెట్టుబడులను ఆకర్షించటం, అంతర్జాతీయంగా వివిధ రంగాల్లో పేరుప్రఖ్యాతలు కలిగిన సంస్ధలు ఏర్పాటు చేయించటమే రేవంత్ లక్ష్యం. అందుకనే ‘తెలంగాణ రైజింగ్ గ్లోబల్ సమిట్-2047’ అనే ట్యాగ్ లైన్ తో వేదికను అద్భుతంగా తీర్చిదిద్దుతున్నారు.

రెండురోజుల సదస్సు నిర్వహణలో కొన్ని ప్రత్యేకతలున్నాయి. అవేమిటంటే వేదికకు సమీపంలోనే మూడు హెలిప్యాడ్లు ఏర్పాటవుతున్నాయి. ఇందులో ఒకటి డెడికేటెడ్ గా రేవంత్ కు ఉంటే మిగిలిన రెండు హెలిప్యాడ్లు అత్యంత ప్రముఖుల రాకపోకలకు ఏర్పాటుచేస్తున్నారు. అలాగే అతిధులు, మంత్రులు, ఉన్నతాధికారులు, భద్రతాసిబ్బంది కమ్యూనికేషన్ కోసం ప్రత్యేకంగా 10 జీబీపీఎస్ స్పీడుతో ఇంటర్నెట్ సేవలు అందుబాటులోకి రాబోతోంది. 10 జీబీపీఎస్ వేగం అంటే మామూలు విషయంకాదు.

ప్రపంచంలోని అనేక దేశాలనుండి పారిశ్రామికవేత్తలు, వివిధ రంగాల్లోని నిపుణులు, మీడియా ప్రతినిధులు రాబోతున్నవారికి ఇంటర్నెట్ సేవల్లో ఎలాంటి అంతరాయం ఏర్పడకుండా, వేగం విషయంలో కాంప్రమైజ్ కాకూడదనే ఏకంగా సదస్సులో 10 జీబీపీఎస్ వేగంతో ఇంటర్నెట్ సేవలు అందుబాటులో ఉంచాలని రేవంత్ ఆదేశించారు. 10 వేలమందికి మూడురోజుల ఇంటర్నెట్ సేవలు అందుబాటులో ఉండబోతోంది. ఇందుకు తగ్గట్లుగా ఉన్నతాధికారులు అన్నీ ఏర్పాట్లను చేసేశారు.

సదస్సు సందర్భంగా చుట్టుపక్కల ఎలాంటి అవాంఛనీయ ఘటనలు జరగకుండా మూడువేలమంది పోలీసులతో కట్టుదిట్టమైన భద్రతను ఏర్పాటుచేస్తున్నారు. డీసీపీ స్ధాయి ఉన్నతాధాకారుల పదిమందికి ప్రత్యేకంగా బాధ్యతలు అప్పగించారు. ట్రాఫిక్, అతిధుల వాహనాల పార్కింగ్, అత్యంత ప్రముఖుల భద్రత తదితరాలను పోలీసు ఉన్నతాధికారులు క్లోజుగా మానిటర్ చేయటానికి అవసరమైన ఏర్పాట్లు జరిగాయి.

రంగారెడ్డి జిల్లా, కందుకూరు మండలంలోని మీర్ ఖాన్ పేటలోని ఫ్యూచర్ సిటిలో అంతర్జాతీయ సదస్సు జరగబోతోంది. ఇందుకు ఫ్యూచర్ సిటిలో 100 ఎకరాల్లో ఏర్పాట్లు చేస్తున్నారు. అతిధులు సదస్సుకు రోడ్డుమార్గంలో చేరుకునేటపుడు ఎలాంటి ఇబ్బందులు తలెత్తకుండా హైదరాబాద్-శ్రీశైలం జాతీయ రహదారి నుండి ఫ్యూచర్ సిటి వరకు రోడ్లను రిపేర్లు చేస్తున్నారు.

వేదిక దగ్గరకు రేవంత్ తో పాటు కొంతమంది అత్యంత ప్రముఖుల వాహనాలను మాత్రమే అనుమతిస్తారు. మిగిలిన అతిధులు, ప్రముఖుల వాహనాల పార్కింగును దగ్గరలోనే ఉన్న అమెజాన్ డేటా సెంటర్ కాంపౌండులో ఏర్పాటుచేశారు. అక్కడినుండి ప్రత్యేకంగా ఏర్పాటుచేసిన విద్యుత్ వాహనాల్లో సదస్సు దగ్గరకు అతిధులను తీసుకుని రావటానికి నిర్వాహకులు ఏర్పాట్లుచేశారు.

ఎవరికైనా అసౌకర్యం, అనారోగ్యం కలిగితే అవసరమైన వైద్యసేవలు అందించటానికి డాక్టర్ల బృందాలు ఎలాగూ అందుబాటులో ఉంటాయి. అలాగే ఆసుపత్రులకు తరలించటానికి అంబులెన్సులను కూడా అందుబాటులో ఉంచుతున్నారు. నిరంతర విద్యుత్ సరఫరా కోసం ప్రత్యేకంగా ట్రాన్స్ ఫార్మర్లు, పోల్స్ తో పాటు ప్రత్యేక జనరేటర్లను స్టాండ్ బైగా ఉంచబోతున్నారు.

సదస్సులో 3 వేల మంది అతిధులు కూర్చునేందుకు ఏర్పాట్లు చేస్తున్నారు. మీడియాకు కూడా అవసరమైన ఏర్పాట్లు చేస్తున్నారు. దేశ, అంతర్జాతీయ స్ధాయి అతిధులు సందర్శించేందుకు వీలుగా ప్రత్యేకంగా 45 స్టాళ్ళను ఏర్పాటు చేయబోతున్నారు. డ్రోన్లను కూడా భద్రతను పర్యవేక్షించటానికి ప్రత్యేకంగా కంట్రోల్ రూమ్ ను ఏర్పాటుచేశారు.

సదస్సు అయిపోయిన తర్వాత అంటే 10,11 తేదీల్లో ప్రాంగణాన్ని, స్టాళ్ళను చూడాలని అనుకునే స్ధానికులను అనుమతించబోతున్నారు. చీఫ్ సెక్రటరీ రామకృష్ణారావు ఆధ్వర్యంలో డీజీపీ తదితరులతో పర్యవేక్షణ కమిటీని రేవంత్ ఏర్పాటుచేశారు. జరగబోయేది అంతర్జాతీయ సదస్సు కావటంతో అతిధులు, ముఖ్యులు, ప్రముఖుల కోసం ప్రత్యేకంగా వివిద దేశాల ఆహారాన్ని అందించే బాధ్యతను స్టార్ హోటళ్ళకు అప్పగించారు. మంచినీటితో పాటు అనేక రకాల పానీయాలను ఈ హోటళ్ళే అతిధులు, ప్రముఖులకు అందించబోతున్నాయి.