ఐబొమ్మ అసలు కథ చెప్పేసిన రవి

ఐబొమ్మ రవి కేసు రోజుకో కీలక మలుపు తిరుగుతోంది. అతని నుంచి చాలా సమాచారం రాబట్టాల్సి ఉందని భావించిన పోలీసులు.. అతనిని వరుస కస్టడీల్లోకి తీసుకుంటున్నారు. ఇటీవల అతడు ముచ్చటగా మూడోసారి పోలీసుల కస్టడీలోకి వెళ్లాడు. అయితే ఈ సారి విచారణలో కీలక సమాచారం తెలిసిందని పోలీసులు తెలిపారు. ఇందులో అసలు ‘ఐబొమ్మ’ పూర్తి పేరు ఏంటి? పైరసీలు ఎలా చేసేవాడు? బప్పం టీవీ కథ ఏంటి? అన్నీ విషయాలను చెప్పేశాడట రవి. అంతేకాకుండా జైలు నుంచి బయటకు వచ్చిన తర్వాత పూర్తిగా మారిపోతానని కూడా అన్నట్లు తెలుస్తోంది.

పైరసీ వెబ్‌సైట్ల నుంచి మాత్రమే కాకుండా, ఓటీటీలో విడుదలవుతున్న సినిమాలను కూడా రికార్డ్ చేసినట్లు రవి తెలిపాడు. రికార్డింగ్‌ చేసిన ఆడియో–వీడియోల నాణ్యతను మెరుగుపరచడానికి కరేబియన్ దీవుల్లో ఉన్న ఔట్‌సోర్సింగ్‌ టెక్నికల్ టీమ్‌తో ఒప్పందం కుదుర్చుకున్నట్లు వివరించాడు.

పైరసీ చేయడం కోసం రవి పెద్ద స్థాయి టెక్నాలజీ ఆధారిత నెట్‌వర్క్ అని అధికారులు భావిస్తున్నారు. రవి, వెబ్‌సైట్ పేర్ల వెనుక ఉన్న విషయాలను కూడా వెల్లడించాడు. ‘ఐబొమ్మ’ అంటే ‘ఇంటర్నెట్ బొమ్మ’ అని చెప్పాడు. విశాఖ ప్రాంతంలో సినిమా కోసం ‘బొమ్మ’ అనే పదం వినియోగిస్తారని, అందుకే ఇంటర్నెట్‌లో బొమ్మ చూపుతున్నందుకు ‘ఐబొమ్మ’ అని పేరు పెట్టినట్లు తెలిపాడు. మరో వెబ్‌సైట్‌కు ‘బలపం’ అనే పేరు పెట్టాలనుకున్నా, డొమైన్ రిజిస్ట్రేషన్ సమస్యల వల్ల ‘L’ అక్షరాన్ని తీసేసి ‘బప్పం’గా మార్చినట్లు వివరించాడు రవి. తాను అప్లోడ్ చేసిన సినిమా ఫైళ్లు అన్నీ టెలిగ్రామ్ ఛానళ్ల నుంచి డౌన్‌లోడ్ చేసినవేనని కూడా రవి అంగీకరించినట్లు పోలీసులు తెలిపారు.