కేసీఆర్ మీద కవితకు ఇంత కోపముందా ?

బీఆర్ఎస్ నుండి తనను దూరంచేసిన వారిపై కల్వకుంట్ల కవిత బాగా మండిపోతోందని అందరికీ తెలిసిందే. ఈవిషయాన్ని కవిత బాహాటంగానే చాలాసార్లు తీవ్ర ఆగ్రహాన్ని ప్రదర్శించారు, సందర్భం వచ్చినపుడల్లా ప్రదర్శిస్తునే ఉన్నారు. కవిత టార్గెట్ ముందు మాజీమంత్రి తన్నీరు హరీష్ రావు తర్వాత రాజ్యసభ మాజీ ఎంపీ సంతోష్ ఆ తర్వాత సోదరుడు కేటీఆర్. ఇపుడిదంతా ఎందుకంటే శనివారం కవిత ఒక ట్వీట్ చేశారు. అందులో తండ్రి, పార్టీ అధినేత కేసీఆర్ పేరును ఎక్కడా ప్రస్తావించలేదు.

తెలంగాణ సాధనకోసం కేసీఆర్ ఆమరణదీక్ష చేసి ఈరోజుతో 16 ఏళ్ళు పూర్తయ్యింది. ఈసందర్భంగా పార్టీశ్రేణులు ‘దీక్షా దివస్’ పేరుతో కార్యక్రమాలు చేస్తున్నారు. ఈ సందర్భంగానే కామారెడ్డి జిల్లాలో ‘జనంబాట’లో ఉన్న కవిత ట్వీట్ చేశారు. ఆ ట్వీట్లో ఏముందంటే ‘ఒక యోధుని దీక్ష, అమరుల త్యాగం, యావత్ తెలంగాణ జాతిని మేల్కొల్పింది, ఐక్యతా గీతమైంది, స్పూర్తిని నింపింది. తెలంగాణ ఉద్యమాన్ని విజయపథంవైపు నడిపించింది. రాష్ట్ర్ర సాధనకు దారి దీపమైంది. భౌగోళిక తెలంగాణ సాధించాం, సామాజిక తెలంగాణ సాధిస్తాం. జై తెలంగాణ జైజై తెలంగాణ’ అని చెప్పారు. ఈట్వీట్లో ఎక్కడా తండ్రి కేసీఆర్ పేరును కూడా ప్రస్తావించలేదన్న విషయం గమనార్హం.

కేటీఆర్, హరీష్ మీదంటే కవితకు విపరీతమైన కోపముందని అందరికీ తెలుసు. అయితే కేసీఆర్ మీద కూడా తనకు అంతే కోపముందన్న విషయం ఇపుడు ట్వీట్ రూపంలో కవిత బయటపెట్టుకున్నట్లయ్యింది. ఎందుకు అంతకోపం ? ఎందుకంటే హరీష్, సంతోష్ చెప్పుడు మాటలను తండ్రి కేసీఆర్ తో పాటు సోదరుడు కేటీఆర్ విని, నమ్మి తనను పార్టీనుండి తరిమేశారని. ఇప్పటివరకు కేటీఆర్ మీద మాత్రమే పరోక్షంగా కవిత విమర్శలు, ఆరోపణలు చేస్తున్నారు. తండ్రికి వ్యతిరేకంగా కవిత ఇప్పటివరకు ఎలాంటి ఆరోపణలు, విమర్శలు చేయలేదు.

బీఆర్ఎస్ హయాంలో అవినీతి, అవకతవకలు జరిగిన మాట వాస్తవమే అంటున్న కవిత వాటితో తనతండ్రికి ఎలాంటి సంబంధంలేదనే విచిత్రమైన లాజిక్ వినిపిస్తున్నారు. కేసీఆర్ దేవుడు చుట్టూ ఉన్నవాళ్ళు మాత్రం దెయ్యాలంటు ఇంతకాలం కేసీఆర్ ను వెనకేసుకొచ్చిన విషయాన్ని అందరు చూస్తున్నదే. ఇపుడు దీక్షా దివస్ సందర్భంగా మాత్రం కేసీఆర్ పేరును ప్రస్తావించకుండానే పెద్ద ట్వీట్ చేయటమే ఆశ్చర్యంగా ఉంది. తనకువ్యతిరేకంగా బీఆర్ఎస్ నేతలు ఎన్ని ఆరోపణలు చేస్తున్నా, ఎన్ని కుట్రలుచేస్తున్నా కేసీఆర్ వారించలేదని, వారి చెప్పుడు మాటలనే విన్నారన్న మంట కవితలో బాగా పేరుకుపోయినట్లుంది.

అయినా సరే తండ్రికి వ్యతిరేకంగా ఏమీ మాట్లాడలేదు. అలాంటిది ఇపుడు కేసీఆర్ పేరు ప్రస్తావించకుండానే నిరాహార దీక్ష గురించి ట్వీట్ చేశారంటే ముందు ముందు తండ్రని కూడా టార్గెట్ చేసుకోబోతున్నారా అనే సందేహాలు పెరిగిపోతున్నాయి. ఏమి జరుగుతుందో చూడాల్సిందే.