మూడు రంగుల ‘కాంగ్రెస్’ చీర ధరించిన కవిత ..

సాధారణంగా ఇలాంటి చీరలను కాంగ్రెస్ మహిళా నాయకులు కొన్ని ప్రత్యేక సందర్భాలలో మాత్రమే ధరిస్తారు. కవిత అలాంటి చీరను ధరించి ఒక సీనియర్ కాంగ్రెస్ నాయకుడి ఇంట జరుగుతున్న ప్రత్యేక కార్యక్రానికి హాజరుకావటం ఆమె కాంగ్రెసులో చేరటానికి సంకేతం అని రాజకీయ వర్గాలలో ఊహాగానాలకు తెరలేపింది.  భర్త అనిల్ తో కలిసి ఆ శుభకార్యానికి హాజరయ్యారు. రంగుల చీర లో కవిత వీడియోలు కూడా సామాజిక మాధ్యమాలలో వైరల్ అయ్యాయి.

 సామజిక మాధ్యమాలలో దీనిని ట్రోల్ చేయటంపై తెలంగాణ జాగృతి నాయకులు సైతం నిప్పులు చెరిగారు. కవితక్క కట్టిన చీరను సైతం కొందరు రాజకీయం చేయటం వారి  సంకుచిత మనసుకు నిదర్శనం అని అంటున్నారు. అదే చీరలో కవిత మీడియా సమావేశం ఏర్పాటు చేసి, గ్రామా పంచాయతీ ఎన్నికల్లో  బి.సిలకు రిజర్వేషన్ లు పాటించడంలో మోసం చేసినందుకు గ్రామాలలోని కాంగ్రెస్ పార్టీ జెండా దిమ్మలను కూల్చి వేయాలని పిలుపినిచ్చిన విషయాన్ని కూడా వారి ఎత్తి చూపుతున్నారు.

మరొక అడుగు ముందుకు వేసి బీ.సీ. కు 42 శాతం రిజర్వేషన్లు అమలు చేయాలని డిమాండ్ చేస్తూ తెలంగాణ జాగృతి అధ్యక్షురాలు కల్వకుంట్ల కవిత నవంబర్ 28 శుక్రవారం కామారెడ్డిలో ‘రైల్ రోకో’ నిరసన నిర్వహించిన విషయం కూడా వారు ఉదహరిస్తున్నారు.

ఏది ఏమైనా కవిత వ్యూహాత్మకంగానే వ్యవహరిస్తున్నట్లు ఇటీవలి సంఘటనలు స్పష్టం చేస్తున్నాయి. గత కొన్ని రోజులుగా జాగృతి యాత్రలో కవిత తన దూకుడును పెంచినట్లు కనిపిస్తుంది. గ్రామ పంచాయతీ ఎన్నికలలో బీసీలకు 42 శాతం రిజర్వేషన్ కల్పించనందుకు నిరసనగా గ్రామాలలోని కాంగ్రెస్ పార్టీకి చెందిన జెండా దిమ్మలను కూల్చివేయాలని పిలుపునిస్తూ సంచలనం సృష్టించారు.

తన పోరాటం ప్రజల సమస్యల మీదనే ఉంటుందని, రాజకీయ పార్టీ స్థాపించే ఆలోచన ప్రస్తుతానికి లేదని ఆమె అనేక సార్లు తెలిపారు. కానీ రాజకీయ లకు దూరం కాలేదని ఆమె ప్రటకనాలు సూచిస్తున్నాయి. సర్పంచ్ ఎన్నికల్లో  ముందుకు వచ్చి ఆయా సమస్యలపై పార్టీలను ప్రశ్నించాలని ఆమె యువతకు సూచించారు. బిసిలకు సామాజిక న్యాయం కోసం జాగృతి తరఫున  అత్యధిక గ్రామాల్లో బీసీలు నామినేషన్లు దాఖలు చేసేలా ప్రయత్నం చేస్తామని అన్నారు. ప్రతి గ్రామ పంచాయతీలో బీసీ అభ్యర్థులు గెలిచేలా తమ వంతు ప్రయత్నం చేస్తామని ఆమె హామీ ఇచ్చారు.

జూబ్లీహిల్స్ ఉప ఎన్నికలో భారత రాష్ట్ర సమితి (బి.ఆర్.ఎస్) ఓటమి తరువాత "హిట్ బ్యాక్ కర్మ' అంటూ తన ట్విట్టర్ అకౌంట్ లో పోస్ట్ చేసి కవిత మరోసారి వార్తల్లో స్థానం సంపాదించింది.

రాష్ట్ర రాజకీయాలలో ఎలా హాట్ టాపిక్ గా, ట్రేండింగ్ లో ఉండాలో కవితకు తెలిసినట్లు ఏ నాయకునికి తెలిసినట్లు లేదు. తన సొంత అన్న కల్వకుంట్ల తారక రామరావు ని సైతం ట్విట్టర్ నుంచి బయటకురమ్మని వ్యంగాస్త్రాలు విసిరారు.

‘తెలంగాణ జాగృతి .. జనం బాట’ పేరుతొ కవిత చేపట్టిన జిల్లాల యాత్రలో ఆమె తన కట్టు, బొట్టును మార్చి కొత్త రూపంలో దర్శనం ఇచ్చి పరిణతి చెందిన రాజకీయ నాయకురాలుగా ఇమేజి సృష్టించుకునే ప్రయత్నం చేయటం తెలిసిన విషయమే.

తన పర్యటన ద్వారా ఆమె రాష్ట్రంలో రాజకీయ వాతావరణం ఎలా ఉందో వ్యక్తిగతంగా పరిశీలిస్తున్నారని, ఈ పర్యటన తర్వాత పార్టీ ప్రకటించడమా, ఉన్నపార్టీలో చేరి సర్ధుకు పోవడమా లేక స్వతంత్రంగా ముందుకు సాగడమా అనే విషయం మీద నిర్ణయం తీసుకుంటారని ఆమె సన్నిహితులు చెబుతున్నారు.