మావోయిస్టు అగ్రనేత నుంచి సాధారణ పౌరుడిగా: మల్లోజుల లొంగుబాటు కథ

ఒక చేతిలో తుపాకీ, మరో చేతిలో సిద్ధాంత గ్రంథం...దండకారణ్యం ఆరుబయట నడచిన మల్లోజుల వేణుగోపాల్ జీవితం ఇదే.

భూపతి, సోను, అభయ్... ఏ పేరు పెట్టుకున్నా ఒకే లక్ష్యం: సాయుధ పోరాటం.

కానీ నలభై మూడు సంవత్సరాల తర్వాత ఆయన నడక ఆగింది.

తుపాకీ నేలకేసి, ‘సమయం మారింది’ అని ప్రకటించిన ఈ మావోయిస్టు అగ్రనేత ఇప్పుడు సాధారణ పౌరుడిగా కొత్త ఆరంభం కోసం సిద్ధమవుతున్నారు.

తన అడవి జీవిత రహస్యాలు, పార్టీ అంతర్గత సంఘర్షణలు, లొంగుబాటు వెనుక అనివార్య కారణాలు...ఇలా ప్రతీ అంశం గురించి మల్లోజుల వేణుగోపాల్ చెప్పారు. లొంగిపోయి (Maoist Leader Surrenders)మహారాష్ట్ర పోలీసుల అబ్జర్వేషన్ లో ఉండి సాధారణ జీవనం గడిపేందుకు ఏర్పాట్లు చేసుకుంటున్న మల్లోజుల వేణుగోపాల్ ‘ఫెడరల్ తెలంగాణ’ స్పెషల్ కరస్పాండెంట్ సలీం షేక్ కు ప్రత్యేక ఇంటర్వ్యూ ఇచ్చారు. ‘ఫెడరల్ తెలంగాణ’ప్రతినిధికి ఇచ్చిన ప్రత్యేక ఇంటర్వ్యూలో తొలిసారిగా బహిరంగంగా మాట్లాడారు.

‘‘నా 43 ఏళ్ల మావోయిస్టు విప్లవ జీవితంలో నేను చాలా సాధించాలనుకున్నాను,కానీ అందులో ఎంత వరకు సఫలం అయ్యామనేది మీకు దండకారణ్య ప్రజలు చెప్పాలి. తీర్పరులు ప్రజలు మాత్రమే. అంతిమంగా వాళ్లే ధ్రువపత్రాలు ఇచ్చేవాళ్లు. నేను దళాల్లో ఉన్నపుడు విప్లవ సంప్రదాయాన్ని పాటించాను. విప్లవ ఉద్యమంలో ఉన్న వాళ్లను కాపాడుకునేందుకు తుపాకులను అప్పజెప్పి, సాయుధ పోరాటాన్ని నిలిపివేశాను. భవిష్యత్ లో రచయితగా పుస్తకాలు రాయాలని అనుకుంటున్నాను’’అని మావోయిస్టు పొలిట్ బ్యూరో సభ్యుడు మల్లోజుల వేణుగోపాల్ చెప్పారు.

తన తోటి మావోయిస్టులు లొంగిపోవాల‌ని కోరుతూ మల్లోజుల ఇటీవల మీడియాకు విడుదల చేసిన వీడియో సందేశంలో పిల‌ుపునిచ్చారు.‘‘మారిన ప‌రిస్థితుల దృష్ట్యా సాయుధ పోరాటం కొన‌సాగించ‌లేం. ప్ర‌జ‌ల్లో చేరి పోరాటం చేయాల‌ని కోరుతున్నా. ప్ర‌జ‌ల్లో ఉండి రాజ్యాంగ‌బ‌ద్ధంగా పోరాటం సాగించాలి. ప‌రిస్థితులు మారుతున్నాయి.. దేశం కూడా మారుతోంది. ఎన్‌కౌంట‌ర్ల‌లో మావోయిస్టులు ప్రాణాలు కోల్పోతున్నారు. ఎన్‌కౌంట‌ర్‌లో హిడ్మాతో పాటు ప‌లువురి ప్రాణాలు పోయాయి. మావోయిస్టులు ప్రాణాలు కోల్పోవ‌డం బాధ క‌లిగించింది’’ అని మల్లోజుల పేర్కొన్నారు. లొంగిపోవాల‌నుకునే మావోయిస్టులు న‌న్ను సంప్ర‌దించొచ్చు. నా ఫోన్ నంబ‌ర్ 8856038533 లో సంప్ర‌దించ‌వ‌చ్చు అని మల్లోజుల సూచించారు.

మోస్ట్ వాంటెడ్ మావోయిస్టు,తెలంగాణ రాష్ట్రంలోని పెద్దపల్లికి చెందిన మల్లోజుల వేణుగోపాల్ 43 ఏళ్ల తర్వాత అజ్ఞాతవాసాన్ని వీడారు.43 ఏళ్ల పాటు తుపాకీ చేతబట్టి అడవుల్లో ఉన్న వేణుగోపాల్ తుపాకీని మహారాష్ట్ర ముఖ్యమంత్రి దేవేంద్ర ఫడ్నవీస్ కు అప్పగించి జనజీవన స్రవంతిలో కలిసేందుకు లొంగిపోయారు. పెద్దపల్లి నుంచి బికాం పట్టభద్రుడైన వేణుగోపాల్ 23 సంవత్సరాల చిన్న వయసులోనే వామపక్ష తీవ్రవాదానికి ఆకర్షితుడై 1982వ సంవత్సరం ఏప్రిల్ 7వతేదీన అడవుల బాట పట్టారు. విద్యార్థిగా చదువుకుంటూ రాడికల్ స్టూడెంట్స్ యూనియన్ లో క్రియాశీలకంగా పనిచేస్తూ పీపుల్స్ వార్ గ్రూపులో చేరారు.మావోయిస్టు భావజాలానికి తన జీవితాన్ని అంకితం చేయడానికి అతను తన ఇంటిని, కుటుంబాన్ని విడిచిపెట్టాడు. అప్పట్లో పోలీసులు పెద్దపల్లిలోని మల్లోజుల ఇంటిని కూల్చివేశారు. జనజీవన స్రవంతిలో కలిసేందుకు వీలుగా మల్లోజుల వేణుగోపాల్ మావోయిజానికి స్వస్థి చెప్పి లొంగిపోయారు.

ప్రస్థుతం ఈయన మహారాష్ట్ర పోలీసుల అబ్జర్వేషన్ లో ఉన్నారు. అడవుల నుంచి 43 ఏళ్ల తర్వాత బయటకు వచ్చిన మల్లోజుల ప్రజలతో కలిసి సాధారణ జీవనం గడిపేందుకు వీలుగా కావాల్సిన ఆధార్, రేషన్ కార్డు, పాన్, డ్రైవింగ్ లైసెన్సు, బ్యాంకు ఖాతాలు పొందే పనిలో ఉన్నారు. లొంగిపోయి పునరావాసం పొందనున్న మల్లోజుల త్వరలో తన స్వస్థలమైన పెద్దపల్లిలో లేదా తన అత్తగారిల్లు అయిన గడిచిరోలీలోని జిమ్మలగం కిష్టాపూర్ కు వెళతానని మల్లోజుల ‘ఫెడరల్ తెలంగాణ’ ప్రతినిధికి చెప్పారు.

1. ప్రశ్న : మీరు మావోయిస్టు ఉద్యమంలో 1982 ఏప్రిల్ 7వతేదీన చేరి 2025 అక్టోబరు 13వతేదీ వరకు 43 ఏళ్ల పాటు సుదీర్ఘకాలం మావోయిస్టు ప్రతినిధి నుంచి పొలిట్ బ్యూరో సభ్యుడి దాకా క్రియాశీలకంగా పనిచేశారు. మీరు 43 ఏళ్లలో ఏం సాధించారు?

మల్లోజుల జవాబు : నా 43 ఏళ్ల విప్లవ జీవితంలో నేను చాలా సాధించాలనుకున్నాను. కానీ అందులో ఎంత సఫలం అయ్యాననేది మీకు దండకారణ్య ప్రజలు చెప్పాలి. తీర్పరులు ప్రజలు మాత్రమే. వాళ్లే ధ్రువపత్రాలు ఇచ్చేవాళ్లు. నా 43 ఏళ్ల ఉద్యమ బాటలో ఎన్నెన్నో కడగండ్లు, కన్నీళ్లు మిగిలాయి.

2. ప్రశ్న : మావోయిస్టు పార్టీలో చేరి మీరు 43 ఏళ్లుగా మీ తల్లిదండ్రులకు, మీ సోదరులు, బంధుమిత్రులకు దూరంగా ఉన్నారు కదా...కుటుంబసభ్యుల విషయంలో ఎప్పుడైనా బాధపడ్డారా?

మల్లోజుల జవాబు : నేను నా బంధు మిత్రులను ప్రజల్లో భాగంగానే చూశాను. కాబట్టి నేను ఎప్పుడూ వారి నుంచి వేరై నట్టు ఫీల్ కాలేదు. అలా ఫీల్ కానప్పుడు బాధే ఉండదు. నేను త్యాగానికి సిద్ధం అయ్యాను కాబట్టి కుటుంబానికి దూరంగా ఉన్నాను.

3.ప్రశ్న : డిగ్రీ చదివిన మీరు రాడికల్ స్టూడెంట్స్ యూనియన్ లో క్రియాశీలకంగా పనిచేస్తూ దళంలో చేరి అజ్ఝాతంలోకి వెళ్లారు. మీరు సోను దాదా, భూపతి, వివేక్, అభయ్ పేర్లతో చలామణీ అయ్యారు. ఎందుకు మీరు ఇలా వేర్వేరు పేర్లు పెట్టుకున్నారు.

మల్లోజుల జవాబు :  విప్లవ సంప్రదాయాన్ని పాటించాను. అందుకే ఇలా వేర్వేరు పేర్లు.

4. ప్రశ్న : మావోయిస్టు పార్టీలో మీపై పోలీసులు 100 కేసులు పెట్టారు. మీరు ఈ కేసులతో సంబంధం ఉందా? మావోయిస్టు పార్టీలో మీరు మిలటరీ ఆపరేషన్లకు దూరమని చెబుతుంటారు కదా... ఈ కేసుల విచారణను లొంగిపోయాక ఎలా ఎదుర్కొంటారు?

మల్లోజుల జవాబు : అదే ఆలోచిస్తున్నాను. నేను మావోయిస్టు మిలటరీ ఆపరేషన్లలో పాల్గొనలేదు. నేను సిద్ధాంతకర్తను. నేను పార్టీలో అధికార ప్రతినిధిగా, పొలిట్ బ్యూరో సభ్యుడిగా విద్యా, రాజకీయ వ్యవహారాల్లో చురుకుగా పాల్గొన్నాను. మావోయిస్టు నాయకుడు కావడంతో నేను మావోయిస్టు మిలటరీ ఆపరేషన్లలో పాల్గొనకున్నా నాపై పోలీసులు కేసులు పెట్టారు.

5. ప్రశ్న : మీరు రచయితగా పార్టీలో ఉన్నపుడు పలు పుస్తకాలు రాశారు కదా....ప్రస్థుతం లొంగిపోయాక మీ శేష జీవితంలో ఏం చేయాలనుకుంటున్నారు. మీ బయోపిక్ రాస్తారా? ఇంకా ఏమైనా పుస్తకాలు రాస్తారా?

మల్లోజుల జవాబు :నాకు ఉండే ఓపికను బట్టి చూస్తా. భవిష్యత్ లో పుస్తకాలు రాయాలని ఉంది.నా కలానికి ఆకలి ఎక్కువ. నా శేష జీవితంలో రచనా వ్యాసాంగాన్ని కొనసాగించాలని అనుకుంటున్నాను.

6. ప్రశ్న : పార్టీలో ఉన్నపుడు మీరు ప్రేమ వివాహం చేసుకున్నారు కదా...కరీంనగర్ జిల్లాకు చెందిన మీరు గడిచిరోలి ప్రాంత వాసి అయిన విమల చంద్ర సిదాం అలియాస్ తారక్కను పెళ్లాడారు? మీ పెళ్లి ఎలా జరిగింది?

మల్లోజుల జవాబు :విప్లవ సంప్రదాయం ప్రకారం మా పెళ్లి 1987 జనవరి 16వతేదీన జరిగింది. మాది ప్రేమ పెళ్లి అయినా విప్లవం సంప్రదాయాన్ని పాటించి పార్టీ అనుమతితో చేసుకున్నాం.

7. ప్రశ్న : మీరు పెళ్లి చేసుకొని వేసెక్టమీ ఆపరేషన్ ఎవరి ఆదేశాలతో చేయించుకున్నారు?

మల్లోజుల జవాబు :పెళ్లి చేసుకున్నా పిల్లలు పుట్టకుండా వేసెక్టమీ ఆపరేషన్ చేయించుకున్నా.విప్లవం కోసం పిల్లలు వద్దని భావించాను. ఇది కేవలం నా నిర్ణయం మాత్రమే. లొంగి పోయిన నా సహచర మావోయిస్టులు రివర్స్ వేసెక్టమీ ఆపరేషన్లు చేయించుకుంటున్నారు. నేను 70 ఏళ్ల వయసులో రివర్స్ వేసెక్టమీ చేయించుకోలేను.పిల్లలు లేని మాజీ మావోయిస్టులు వారి కుటుంబ సభ్యుల పిల్లలనే వారసులుగా భావిస్తాం.

8. ప్రశ్న : మీ స్వస్థలం తెలంగాణ అయినా మీరు మహారాష్ట్రలోని గడిచిరోలిలో లొంగిపోయారు...ఎందుకు?

మల్లోజుల జవాబు : నా అత్తారిల్లు గడిచిరోలిలోని కిష్టాపూర్ కావడం, నేను మావోయిస్టు ఉద్యమంలో పనిచేసింది ఈ ప్రాంతం కావడంతో ఇక్కడ లొంగిపోయాను.కొందరు మావోయిస్టులకు వయసు మీద పడటం వల్ల అనారోగ్యాలకు గురవయ్యారు.అడవిలో అనారోగ్యంతో జీవించలేక లొంగుబాట పట్టాం.

9. ప్రశ్న : మీ భవిష్యత్ ప్రణాళికలు ఏమిటి?

మల్లోజుల జవాబు : నా ఫ్యూచర్ గురించి భవిష్యత్ లోనే చెపుతాను.లొంగుబాటుతో సాయుధ పోరాటాన్ని నిలిపివేశాం. కానీ ప్రజలకు మాత్రం దూరం కావడం లేదు. విధిలేని పరిస్థితుల్లో మా సహచరులను కాపాడుకునేందుకు లొంగిపోయాం.

10. ప్రశ్న : లొంగిపోయాక మీకు ప్రభుత్వం పునరావాసం కల్పించిందా?

మల్లోజుల జవాబు : నాతోపాటు లొంగిపోయిన 60 మంది నా సహచరులకు పునరావాసం కల్పిస్తామని ప్రభుత్వం హామీ ఇచ్చింది.

11. ప్రశ్న : మీ కుటుంబసభ్యులు, బంధువులను ఎప్పుడు కలుసుకుంటారు?

మల్లోజుల జవాబు : నేను త్వరలోనే కుటుంబసభ్యులు, బంధువులను కలుస్తాను.

12. ప్రశ్న :కోటేశ్వరరావు అలియాస్ కిషన్ జీ మీ అన్నయ్య కదా...ఆయన గురించి చెప్పండి

మల్లోజుల జవాబు : విప్లవ ఆశయ సాధనలో అశువులు బాసిండు.

13. ప్రశ్న :మీ తాత, తండ్రి మల్లోజుల వెంకటయ్యలు, ఇద్దరూ భారత స్వాతంత్ర్య సమరయోధులు...మీరు, మీ అన్న కోటేశ్వరరావు అలియాస్ కిషన్ జీ లు వామపక్ష తీవ్రవాద సంస్థలో ఎలా చేరారు?

మల్లోజుల జవాబు : ఆయన మార్గంలోనే చేరాను.

14. ప్రశ్న : మీరు మావోయిస్టు పార్టీలో చేరడానికి దారి తీసిన పరిస్థితులు ఏమిటి?

మల్లోజుల జవాబు :అప్పటి సామాజిక పరిస్థితులు నేను మావోయిస్టు పార్టీలో చేరేలా చేశాయి.

15. ప్రశ్న : తిరుగుబాటు ఆలోచన సంవత్సరాలుగా ఎలా మారింది. మీరు లొంగిపోవడానికి దారి తీసిన పరిస్థితులు ఏమిటి?

మల్లోజుల జవాబు :మారుతున్న సామాజిక పరిస్థితులు నన్ను లొంగుబాటు వైపు దారితీశాయి.

16. ప్రశ్న : మీరు రాసిన పుస్తకాల గురించి చెప్పండి .‘రాగో’ (చిలుక)యే జంగిల్ హమారా హై (ఈ అడవి మనది) గురించి...

మల్లోజుల జవాబు :రాగో ఆదివాసీ మహిళల జీవితాల్లోని చీకటి కోణం పై, రెండవది ఆదివాసీ పోరాటాలపై నేను రాసిన పుస్తకాలు.

17. ప్రశ్న :పోలీసు ఎన్‌కౌంటర్లలో సన్నిహిత సహచరులను కోల్పోవడం, మావోయిస్టు సోపానక్రమంలో ఒంటరితనం మీ నిరాశను తీవ్రతరం చేసిందా?

మల్లోజుల జవాబు :నాలో నిరాశనా......!? నిరాశ నా దరి చేరదు...

18. ప్రశ్న : మీ లొంగుబాటలో మీ భార్య తారక్క పాత్ర ఏమిటీ?

మల్లోజుల జవాబు :నా లొంగుబాటులో నా భార్య తారక్క ప్రేక్షక పాత్ర మాత్రమే.

19. ప్రశ్న : రాజ్యాధికారం బుల్లెట్ ద్వారా రాదని బ్యాలెట్ ద్వారానే వస్తుందనే విషయం మీ సుదీర్ఘ అనుభవంలో తెలుసుకున్నారా?

మల్లోజుల జవాబు : ఇంకా అధ్యయనం చేయాలి.

20. ప్రశ్న : మావోయిస్టు పార్టీలో వ్యక్తిగత స్వేచ్ఛను హరిస్తూ పెళ్లాడిన దంపతులు వేసెక్టమీ ఆపరేషన్లు చేయించుకోవాలని పార్టీ ఇచ్చిన ఆదేశాలను మానవ హక్కుల సంఘాలు విమర్శిస్తున్నాయి. దీనిపై మీ కామెంట్.

మల్లోజుల జవాబు : మీకు పార్టీ ఆచరణ తెలియదని మీ ప్రశ్న తెలిపింది. ఇదీ మావోయిస్టు ఆచరణ, విధానం. మానవ హక్కుల సంఘాలు, ప్రుజాసంఘాలు సజావుగా పనిచేయడం లేదు. ప్రజల్లో పేరుకు ప్రజా సంఘాలే కానీ వారు ఎవరికైనా ఆశ్రయమిచ్చారా? ఆదుకున్నారా? మేం మావోయిజాన్ని వదిలి లొంగిపోయి పునరావాసం కోసం ప్రభుత్వ సాయం తీసుకుంటే తప్పేమిటి. ఈ మాటలు నాకు గుండెల్లో నుంచి వస్తున్నాయి.

21. ప్రశ్న :దంతెవాడ సీఆర్ పీఎఫ్ జవాన్లను చంపిన ఘటనకు కీలక సూత్రధారి ఎవరు? గెరిల్లా దాడులకు మీరు వ్యూహం పన్నారా? ఇలా జవాన్లను చంపడం కర్కశత్వం కాదా?

మల్లోజుల జవాబు :మావోయిస్టు యుద్ధ స్వభావమే అది.

22. ప్రశ్న :మీరు ఇతరుల సహాయంతో మాత్రమే నడవగలరని, కొద్దిగా దృష్టి లోపం కూడా ఉందని ఎల్లప్పుడూ మీ పక్కన ల్యాప్‌టాప్ ఉంచుకుంటారని పోలీసులు చెబుతుంటారు. దీనిపై మీరేం అంటారు.

మల్లోజుల జవాబు : పోలీసులు చెప్పారని అంటున్నారు. సరే నేను మహారాష్ట్ర సీఎం ముందు లొంగిపోతున్న వీడియో చూస్తే నా ఆరోగ్యం గురించి అర్థం అవుతుంది.నాకు 70 ఏళ్లు వచ్చినా ఆరోగ్యంగా, ఫిట్ గానే ఉన్నాను.

23. ప్రశ్న :‘‘ఇంతకాలం పార్టీ చేసిన తప్పులకు, ఉద్యమం ఓడిపోకుండా కాపాడలేకపోయినందుకు బాధ్యత వహిస్తూ పొలిట్‌బ్యూరో సభ్యుడిగా క్షమాపణలు కోరుతున్నా. ఇంతటి నష్టానికి, ఇన్ని బలిదానాలకు దారితీసిన విప్లవోద్యమ బాధ్యతల్లో తాను ఎంత మాత్రం కొనసాగడానికి అర్హుడిని కాదని భావిస్తున్నా. ప్రస్తుతం పార్టీ కష్టకాలంలో ఉంది. ఈ సమయంలో నా నిర్ణయం సరైంది కాకపోవచ్చు. కానీ పరిస్థితులు దీన్ని తప్పనిసరి చేశాయి. వందల మంది మావోయిస్టులను కోల్పోతున్న పరిస్థితుల్లో పార్టీ పిడివాద, అతివాద విధానాల నుంచి మిగిలిన వారినైనా కాపాడుకోవాలి. ఉద్యమాన్ని నడిపించడానికి ప్రజల్లోకి వెళ్లడం తప్ప మరో మార్గం లేదు’’ అని మీరు పేర్కొన్నారు. మీలో వచ్చిన పరివర్తనపై మీ కామెంట్.

మల్లోజుల జవాబు : నిజాయితీ తో కూడిన సత్ప్రవర్తన. ప్రజల సమస్యలను వారే పరిష్కరించుకోవాలి. ప్రజల్లో నుంచి కొత్త నాయకులు పుట్టుకు రావాలి.

పూర్వపు పీపుల్స్ వార్ గ్రూప్ (PWG) కాస్తా మావోయిస్టు పార్టీగా అవతరించాక ఇతను భూపతి, సోను, మాస్టర్,అభయ్ అనే పలు మారుపేర్లతో పనిచేశారు. మొదట 1984వ సంవత్సరంలో మొదట గడ్చిరోలి దళానికి కమాండర్‌గా చేశారు.అనంతరం 1986వ సంవత్సరంలో డివిజనల్ కమిటీ సభ్యుడి (DCM)గా పదోన్నతి పొందారు. ఆ తర్వాత 1987లో డివిజనల్ కమిటీ కార్యదర్శి (DCS)గా ప్రమోట్ అయ్యారు.మావోయిస్టు పార్టీకి ఈయన సైద్ధాంతిక అధిపతిగా కమ్యూనికేషన్ నిపుణుడిగా, ఛత్తీస్‌గఢ్ అడవులను వెలుపల ప్రపంచానికి అనుసంధానించే సంధానకర్తగా పనిచేశారు.ఆయనను 2000లో ఆ సంస్థ కేంద్ర కమిటీలోకి తీసుకున్నారు.ఈయన 2004 నుంచి 2025 వరకు సీపీఐ మావోయిస్ట్ పొలిట్‌బ్యూరో సభ్యుడిగా, 2011 నుంచి 2025వ సంవత్సరం వరకు మావోయిస్టు ప్రతినిధిగా పనిచేశారు. మహారాష్ట్రలోని గడ్చిరోలి ప్రాంతంలోని సీపీఐ (మావోయిస్ట్) దండకారణ్య స్పెషల్ జోనల్ కమిటీ అధిపతి అయ్యారు.వేణుగోపాల్ పార్టీ పొలిట్‌బ్యూరో, సెంట్రల్ మిలిటరీ కమిషన్ రెండింటిలోనూ సభ్యుడయ్యారు.

తెలంగాణలోని ఉమ్మడి కరీంనగర్ జిల్లాలోని పెద్దపల్లి పట్టణంలో ఒక పేద బ్రాహ్మణ కుటుంబంలో మల్లోజుల వేణుగోపాల్ జన్మించారు.మల్లోజుల వెంకటయ్య, మధురమ్మ దంపతుల ముగ్గురు కుమారుల్లో వేణుగోపాల్ చిన్నవాడు.అతని తండ్రి వెంకటయ్య 1997వ సంవత్సరంలో, తల్లి మధురమ్మ 2022లో మరణించారు.రెండవ కుమారుడు అంజన్న ఆలయ పూజారి.

పోలీసు రికార్డుల ప్రకారం మల్లోజులపై 100 కేసులున్నాయి. ఆంధ్రప్రదేశ్, తెలంగాణ, ఛత్తీస్‌గఢ్‌లో పలు కేసులు నమోదయ్యాయి.మావోయిస్టు వ్యతిరేక కార్యకలాపాల చరిత్రలో అత్యంత దారుణమైన దాడుల్లో ఒకటైన 2010 ఏప్రిల్‌లో దంతెవాడలో జరిగిన మారణకాండలో అతని వ్యూహాత్మక ప్రమేయం ఉందని నిఘా సంస్థలు అనుమానిస్తున్నాయి. ఈ ఘటనలో 76 మంది సీఆర్ పీఎఫ్ సిబ్బంది మరణించారు.ఆంధ్రప్రదేశ్,ఛత్తీస్‌గఢ్ పోలీసులు ఇద్దరూ మల్లోజులను పట్టుకుంటే నగదు బహుమతి ఇస్తామని ప్రకటించారు.

మల్లోజుల వివిధ కలం పేర్లతో పలు పుస్తకాలు రచించారు.2010వ సంవత్సరంలో మావోయిస్టు అధికార ప్రతినిధి చెరుకూరి రాజ్‌కుమార్ అలియాస్ ఆజాద్ మరణించిన తరువాత వేణుగోపాల్‌ను పార్టీ ప్రచురణల విభాగం ఇన్ చార్జీగా నియమించారు.1998వ సంవత్సరంలో సాధన అనే కలం పేరుతో ఆయన రాసిన నవల ‘రాగో’ (చిలుక) గిరిజన మహిళల పరిస్థితులు, వారు ఉద్యమంలో చేరడానికి గల కారణాలను రాశారు. ఈయన దళంలో గోండి భాష వాడకాన్ని ప్రోత్సహించారు. గిరిజన సంస్కృతిపై లోతైన జ్ఞానంతో ‘యే జంగిల్ హమారా హై’ (ఈ అడవి మనది),బస్తర్ కీ జాన్ సంస్కృతి (బస్తర్ ప్రజల సంస్కృతి) కూడా రాశారు. జంతన సర్కార్ (విప్లవాత్మక ప్రజల కమిటీ),మావోయిస్టుల ఆదర్శధామాన్ని నియంత్రించే చట్టాలను వివరించే పత్రాన్ని కూడా భూపతి రచించారు.

ఈ ఏడాది అక్టోబర్13వతేదీన మల్లోజుల వేణుగోపాల్ లొంగిపోవడం సంచలనం రేపింది. మల్లోజుల లొంగిపోవడానికి అతని భార్య తారక్కా ప్రభావం చూపించారని పోలీసులు చెబుతుంటారు. గతంలో మహారాష్ట్ర ముఖ్యమంత్రి ముందు తారక్క లొంగిపోయారు. భార్య తారక్క మల్లోజులకు, పోలీసులకు మధ్య కమ్యూనికేషన్ మార్గాలను ఏర్పాటు చేసింది. పోలీసు ఎన్‌కౌంటర్లలో సన్నిహిత సహచరులను కోల్పోవడం, మావోయిస్టు సోపానక్రమంలో ఒంటరితనం మల్లోజుల నిరాశను తీవ్రతరం చేసింది.

మల్లోజుల వేణుగోపాల్ తన సహచరురాలైన మావోయిస్టు కమాండర్ విమల చంద్ర సిదాంను వివాహం చేసుకున్నారు. తారక్కగా పేరొందిన ఈమె దండకారణ్య దళం కమాండర్. గడ్చిరోలిలో ముఖ్యమంత్రి దేవేంద్ర ఫడ్నవీస్ సమక్షంలో లొంగిపోయారు.

వేణుగోపాల్ మావోయిస్టు గెరిల్లా నాయకుడు కిషన్ జీకి తమ్ముడు.మల్లోజుల కోటేశ్వరరావు అలియాస్ కిషన్ జీ 2011 నవంబర్ 24వతేదీన పశ్చిమ బెంగాల్‌లో జరిగిన పోలీసు ఎన్‌కౌంటర్‌లో మరణించారు. ముందు మావోయిస్టు ఉద్యమంలో అత్యంత ప్రభావవంతమైన నాయకులలో కిషన్ జీ ఒకరిగా ఎదిగాడు.తన సోదరుడు కిషన్‌జీ మరణం తర్వాత, పశ్చిమ బెంగాల్‌లో ఆపరేషన్ గ్రీన్ హంట్‌కు వ్యతిరేకంగా మావోయిస్టుల ప్రతిఘటనకు వేణుగోపాల్ బాధ్యత వహించారు.

భూపతి, సోను, మాస్టర్, అభయ్ అని కూడా పిలిచే మాజీ పీపుల్స్ వార్ గ్రూప్ నాయకుడు వేణుగోపాల్ మహారాష్ట్ర రాష్ట్రంలోని గడిచిరోలి ప్రాంత మావోయిస్టుల దండకారణ్య స్పెషల్ జోనల్ కమిటీకి అధిపతి.దక్షిణ భారతదేశంలో గోవా నుంచి కేరళలోని ఇడుక్కి వరకు పశ్చిమ కనుమలకు ఇరువైపులా ఉన్న ప్రాంతాలను నియంత్రించే కొత్త గెరిల్లా జోన్ ఏర్పాటుకు ఆయన యత్నించారు.

తెలంగాణలోని కరీంనగర్ జిల్లా పెద్దపల్లిలో జననం

ఇతర పేర్లు సోను దాదా, భూపతి, వివేక్, అభయ్

విద్య : బి.కాం.

వృత్తి : మావోయిస్టు నాయకుడు

వక్త, పొలిట్‌బ్యూరో సభ్యుడిగా ప్రసిద్ధి,మావోయిస్ట్ రచయిత, సిద్ధాంతకర్త. .

రచనలు - రాగో, యే జంగల్ హమారా హై, దంకర్నాయ కా ఇతిహాస్, బస్తర్ కి జన్ సంస్కృతి

తల్లిదండ్రులు

మల్లోజుల వెంకటయ్య (తండ్రి)

మధురమ్మ (తల్లి)

సోదరులు మల్లోజుల కోటేశ్వరరావు, మల్లోజుల అంజన్న

నలభై మూడు ఏళ్ల గెరిల్లా నడక…

వెళ్లిపోయిన సహచరుల జ్ఞాపకాలు, పోయిన యవ్వనం, విరిగిపోయిన సిద్ధాంతాలు…

అవి అన్నీ ఇప్పుడు మల్లోజుల వేణుగోపాల్ జీవితంలో ఒక అధ్యాయం మాత్రమే.

కొత్త జీవితపు గడపపై నిలబడి, ఆయన చెబుతున్న ఒక్క మాట—

“తీర్పరులు ప్రజలే.”

ఆయుధం నేలరాలిన చోట, ఒక కొత్త కథ మొదలవుతోంది.

ఆ కథలో గన్ శబ్దం కాదు—ఆలోచనల శబ్దం వినాలన్నది వేణుగోపాల్ ఆకాంక్ష.