‘2026కు కాజీపేట రైల్వే మాన్యుఫ్యాక్చరింగ్ యూనిట్ పూర్తి’

కొన్ని సంవత్సరాలుగా పెండింగ్‌లో ఉన్న కాజీజేట రైల్వే మాన్యుఫ్యాక్చరింగ్ ప్రాజెక్ట్ ఎట్టకేలకు సాకారమవుతోంది. ఈ ప్రాజెక్ట్‌ను కేంద్రమంత్రి కిషన్ రెడ్డి సందర్శించారు. శనివారం ఆయన వరంగల్‌లో పర్యటించారు. 2023 మధ్యలో ప్రధానమంత్రి గారు స్వయంగా వరంగల్ పట్టణానికి వచ్చి, ఈ ప్రాజెక్టుకు భూమిపూజ చేశారు. చాలా తక్కువ సమయంలో ల్యాండ్ ఫార్మాలిటీస్, భూసేకరణ, అలాగే చిన్న చిన్న అడ్మినిస్ట్రేటివ్ హర్డిల్స్ అన్నీ అధిగమించి, ఈరోజు ఈ యూనిట్ నిర్మాణ పనులు అత్యంత వేగంగా కొనసాగుతున్నాయి. అతి త్వరలోనే ఈ ప్రాజెక్ట్ పూర్తయ్యి పనులు కూడా ప్రారంభమవుతాయని కిషన్ రెడ్డి పేర్కొన్నారు.

‘‘ఇక్కడ 75% పనులు పూర్తయ్యాయి. వచ్చే సంవత్సరం పూర్తి స్థాయిలో ఈ ప్రాజెక్ట్‌ను పూర్తి చేయాలనే లక్ష్యంతో ముందుకు వెళ్తున్నాం. ఇక్కడ 16 కోచ్ లతో కూడిన రేక్స్ తయారు చేసే ప్రణాళిక ఉంది. తెలంగాణ రాష్ట్ర నడిబొడ్డున ఇలాంటి రైల్ మాన్యుఫ్యాక్చరింగ్ యూనిట్ రావడం చాలా పెద్ద అవకాశమైంది. ఇక్కడి నుంచి దేశమంతా అద్భుతమైన రైలు కనెక్టివిటీ ఉండటం వల్ల ఇక్కడ తయారయ్యే ఉత్పత్తులను దేశంలో ఎక్కడికైనా వేగంగా పంపవచ్చు. ఇక్కడ గొప్ప రవాణా సదుపాయాలు ఉండడం రైల్వేకు ముఖ్యమైన ఆదాయ వనరు కూడా అవుతుంది’’ అని అన్నారు.

‘‘రైల్ వికాస్ నిగం లిమిటెడ్ (RVNL) కు ఈ ప్రాజెక్ట్ బాధ్యతలు అప్పగించారు. అనుకున్న షెడ్యూల్ ప్రకారం పనులు ముందుకు వెళ్తుండటం ఎంతో సంతోషకరం. వందేభారత్ ట్రైన్ల వంటి ఆధునిక రైళ్ల తయారీ కోసం అత్యాధునిక టెక్నాలజీని ఉపయోగిస్తున్నారు. తెలంగాణలో రైల్వే నెట్‌వర్క్ అభివృద్ధిలో భారీ మార్పులు వచ్చాయి. 100% ఎలక్ట్రిఫికేషన్ పూర్తైంది. ఎక్కడా కూడా ఎలక్ట్రిఫికేషన్ లేని లైన్ లేదు. ప్రమాదాలను నివారించే ‘కవచ్’ వంటి రక్షణ వ్యవస్థ మొదటగా మన సౌత్ సెంట్రల్ రైల్వే- అంటే మన తెలంగాణలోనే అమలు చేశారు. ఇందుకోసం ‘సెంటర్ ఆఫ్ ఎక్సలెన్స్’ కూడా హైదరాబాద్‌లోనే ఏర్పాటు చేశారు’’ అని తెలిపారు.

‘‘ఈ ప్రాజెక్టు మొదటి దశకు సుమారు రూ.521 కోట్ల వ్యయం కేటాయించాం. షెడ్ నిర్మాణం పూర్తయిన తర్వాత అత్యాధునిక ఎక్విప్మెంట్స్ కూడా ఇక్కడ అమర్చడం జరుగుతుంది. అత్యంత ఆధునిక టెక్నాలజీని ఉపయోగించి ఈ RMU నిర్మాణం జరుగుతోంది. ఇక్కడ ప్రధాన షాప్, టెస్ట్ షాప్, పెయింట్ షాప్, స్టోర్‌వార్డు, అడ్మినిస్ట్రేటివ్ బ్లాక్, బౌండరీ వాల్, ఆర్‌బీ, ఇంటర్నల్ రైల్వే ట్రాక్, ఎలక్ట్రిక్ సబ్‌స్టేషన్, క్యాంటీన్ వంటి అన్ని విభాగాలు ఒకేచోట ఉండే విధంగా ఇంటిగ్రేటెడ్ ఏరియా నిర్మాణం జరుగుతోంది’’ అని తెలిపారు.

‘‘ఈ ఫ్యాక్టరీని డే లైటింగ్ సదుపాయంతో నిర్మించారు. దీని వల్ల విద్యుత్ ఆదా అవుతుంది. సహజ గాలి ప్రసరణ ఉండే విధంగా నేచురల్ వెంటిలేషన్ కూడా కల్పించారు. ఇది పూర్తిగా ఆధునిక పద్ధతిలో నిర్మింపబడుతున్న ప్రాంగణం. ఇక్కడ సీవరేజ్ ట్రీట్మెంట్ ప్లాంట్ ఏర్పాటు చేస్తున్నారు. ఎంత నీరు ఉపయోగిస్తామో, అదే నీటిని తిరిగి రీయూజ్ చేసే కాన్సెప్ట్ పై పనిచేస్తున్నారు. అదేవిధంగా ఇక్కడ పడే ప్రతీ నీటి చుక్క కూడా బయటకు వెళ్లకుండా రైన్ వాటర్ హార్వెస్టింగ్ సిస్టమ్ ఏర్పాటు చేస్తున్నారు. ఈ అంశాలను మన ప్రధానమంత్రి మోదీ.. వరంగల్ లో భూమిపూజ సమయంలో ప్రత్యేకంగా సూచించారు’’ అని గుర్తు చేశారు.