Mythological Musings: ‘ఆర్‌ఆర్‌ఆర్‌’పై మహాభారతం ప్రభావం గురించి చెప్పిన రాజమౌళి
భారతీయ సినిమాపైనే కాదు ప్రపంచ సినిమాపైనా మన పురాణ, ఇతిహాసాలు రామాయణ, మహాభారతాల ప్రభావం ఉంటూ వస్తోంది.
భారతీయ సినిమాపైనే కాదు ప్రపంచ సినిమాపైనా మన పురాణ, ఇతిహాసాలు రామాయణ, మహాభారతాల ప్రభావం ఉంటూ వస్తోంది. టైటానిక్ వంటి అద్భుత చిత్రం తీసిన జేమ్స్ కామెరాన్ తన అవతార్ చిత్రంలో రామాయణ ఛాయలు కనపడటం గమనించవచ్చు. అలాగే యావత్‌ సినీ అభిమానుల్లో ఆసక్తి రేకెత్తించిన చిత్రం రౌద్రం.. రణం.. రుధిరం.. (ఆర్‌ఆర్‌ఆర్‌)లో మహాభారత ప్రభావం ఉందని స్వయంగా రాజమౌళి చెప్పారు. ఇంతకీ ఆయన ఏమన్నారు.
రౌద్రం.. రణం.. రుధిరం.. (ఆర్‌ఆర్‌ఆర్‌) చిత్రం బాహుబలి లాంటి బిగ్గెస్ట్‌ బ్లాక్‌ బస్టర్‌ తర్వాత రాజమౌళి దర్శకత్వం వహించిన చిత్రం కావడం, ఎన్టీఆర్, రామ్ చరణ్ మల్టీస్టారర్ గా తెరకెక్కడంతో ఆర్‌ఆర్‌ఆర్‌పై ప్రేక్షకుల్లో భారీ అంచనాలు నెలకొన్నాయి. కరోనా కారణంగా పలుమార్లు వాయిదా పడిన ఈ చిత్రం ప్రేక్షకుల ముందుకు వచ్చి హై సక్సెస్ అయ్యింది. రిలీజ్ అయ్యి ఇంతకాలం అయినా ఇప్పటికీ ఈ సినిమా గురించి మాట్లాడుతూనే ఉన్నారు.
బాక్సాఫీసు వద్ద వసూళ్ల వర్షం కురిపించిన ‘ఆర్‌ఆర్‌ఆర్‌’ (RRR) చిత్రం ఆస్కార్‌ సైతం (నాటు నాటు పాటకుగానూ) అందుకున్న సంగతి తెలిసిందే. స్టార్ హీరోలు రామ్ చరణ్ (Ram Charan)- ఎన్టీఆర్ (NTR)లను ఒకే ఫ్రేమ్‌లో చూసిన సినీ అభిమానులు ఎంతగా ఆనందించారో.. ఆ మూవీ తెర వెనుక సంగతులు తెలుసుకోవాలని చాలా మంది ఆసక్తి చూపారు. ఈక్రమంలోనే చిత్ర టీమ్ ‘ఆర్‌ఆర్‌ఆర్‌: బిహైండ్‌ & బియాండ్‌’ (RRR: Behind& Beyond) టైటిల్ తో డాక్యుమెంటరీని రూపొందించింది.
ఎంపిక చేసిన పలు థియేటర్లలో ఇటీవల విడుదలైన ఈ డాక్యుమెంటరీ ప్రస్తుతం ఓటీటీ ‘నెట్‌ఫ్లిక్స్‌’ (RRR Documentory OTT Platform)లో స్ట్రీమింగ్‌ అవుతోంది. దర్శకుడు రాజమౌళి, హీరోలు రామ్‌చరణ్‌, ఎన్టీఆర్, సంగీత దర్శకుడు కీరవాణి, రచయిత విజయేంద్ర ప్రసాద్‌, నిర్మాత డీవీవీ దానయ్య లు ఈ సినిమా గురించి మాట్లాడారు. ఈ క్రమంలో మహాభారతం ప్రభావం గురించి రాజమౌళి చెప్పుకొచ్చారు.
రాజమౌళి మాట్లాడుతూ... ‘‘నా డ్రీమ్‌ ప్రాజెక్టు ‘మహాభారతం’ సాధ్యమయ్యేందుకు ‘ఆర్‌ఆర్‌ఆర్‌’ ఓ అడుగు దగ్గరపడేలా చేసింది. స్టోరీ టెల్లర్‌గా రామాయణం, మహాభారతం నుంచి స్ఫూర్తి పొందా. ‘ఆర్‌ఆర్‌ఆర్‌’ అలా వచ్చిన ప్రొడక్టే’’ అని రాజమౌళి తెలిపారు.
అలాగే ‘‘కొమురం భీమ్‌, అల్లూరి సీతారామరాజు దాదాపు ఒకే సమయంలో పుట్టారు. ఒకే సమయంలో ఇద్దరూ కనిపించకుండా వెళ్లిపోయారు. వారిద్దరూ ఒకచోట తారసపడితే ఎలా ఉంటుంది? అన్న ఆలోచన నుంచి పుట్టిందే ‘ఆర్‌ఆర్‌ఆర్‌’ కథ. బుక్స్‌, కామిక్స్‌, మూవీస్‌.. ఇలా ఏదైనా అందులో యాక్షన్‌ ఉంటే ఇష్టపడతా. అందులో సాధ్యమైనంతవరకూ ఎమోషన్‌ను జోడించాలనుకుంటా. హీరోల ఇంట్రడక్షన్స్‌ సీన్స్‌ను యాక్షన్‌ ఓరియెంటెడ్‌గానే కాకుండా ఆయా పాత్రల గురించి ప్రేక్షకుడికి లోతుగా తెలియాలనుకుంటా. అలా చేసేందుకు ‘ఆర్‌ఆర్‌ఆర్‌’లో మరింత స్కోప్‌ దక్కింది’’ అని రాజమౌళి అన్నారు.
అంతేకాకుండా ‘‘రామ్‌చరణ్‌ ఎంట్రీ సీన్‌ విషయంలో ఆలోచించినంతగా మరే చిత్రానికి ఆలోచించలేదు. ఆ సీన్‌లో లుక్స్‌ పరంగా ఆ క్యారెక్టర్‌ హీరోగా కనిపించినా యాక్షన్‌ పరంగా విలన్‌గా కనిపిస్తుంది. ఫైట్‌ ఎలా ఉండాలో యాక్షన్‌ కొరియోగ్రాఫర్‌కు వివరించా. నా విజన్‌ ఏంటో సినిమాటోగ్రాఫర్‌ సెంథిల్‌కూ చెప్పా. పోరాటం చేస్తున్నవారు చరణ్ కంటిలో స్పష్టంగా కనిపించాలనుకున్నా. ఆ మేరకు లైవ్‌ షాట్‌లో తీశాం. అది సీజీ కాదు’’ అని రాజమౌళి చెప్పుకొచ్చారు.
రాజమౌళి కంటిన్యూ చేస్తూ...‘‘టైగర్‌ సీక్వెన్స్‌ చేయాలని ఎప్పటినుంచో అనుకునేవాడిని. భీమ్‌ పాత్రతో అది కుదిరింది. తారక్‌ ఎంతో వేగంగా పరిగెత్తాడు. ఓచోట జంప్‌ చేసే క్రమంలో నేను ఊహించిన షాట్‌ దొరికిందనిపించింది. జంతువుల వేగాన్ని అందుకోవడం కష్టం. దానికి తగ్గట్టు తొలుత యానిమేషన్‌ చేశాం. యానిమల్‌ ఉందని ఊహించుకొని ఎన్టీఆర్ యాక్ట్‌ చేయడం ఒకెత్తు అయితే, ఎంత వేగంతో పరిగెత్తాలన్నది మరో ఎత్తు. భీమ్‌ క్యారెక్టర్‌ ఫిజికల్‌గా స్ట్రాంగ్‌ అయినా ఎమోషన్‌ ఎక్కువ. భీమ్‌- టైగర్‌ ఫేస్‌ టు ఫేస్‌ షాట్‌ ఐకానిక్‌. ఎన్టీఆర్ అరుపుతో నా రోమాలు నిక్కబొడుచుకున్నాయి. ఒక్క పులి కాదు రెండు పులులతో (ఎన్టీఆర్‌ను ఉద్దేశించి) షూటింగ్‌ చేశా’’ అని రాజమౌళి చెప్పుకొచ్చారు ఈ డాక్యుమెంటరీలో.