కాంగ్రెస్ పార్టీ టిక్కెట్లకు డిమాండ్

190 బయోడేటాలు

మంగళవారం సాయంత్రం వరకు కాంగ్రెస్ పార్టీ శాసనసభ టిక్కెట్ కావాలని 190 మంది దరఖాస్తులు చేశారు. పార్లమెంట్ టిక్కెట్లు రావాలని 18 మంది దరఖాస్తు చేశారు. బుధవారానికి ఈ సంఖ్య ఇంకా పెరిగే అవకాశం వుందని పార్టీ వర్గాలు చెబుతున్నాయి. విజయవాడ నుంచి 18 మంది ఇప్పటికి టిక్కెట్ కావాలని దరఖాస్తులు చేశారు. కాంగ్రెస్ పార్టీలోకి ముఖ్యమైన వారు వస్తున్నారు. కృష్ణాజిల్లా పామర్రుకు చెందిన డీవై దాసు ఇప్పటికే వైఎస్ షర్మిల సమక్షంలో పార్టీలో చేరారు. అలాగే ప్రకాశం జిల్లా నుంచి మాజీ ఎమ్మెల్యే డేవిడ్ రాజు కాంగ్రెస్ పార్టీలో చేరారు. ఈయన ఎర్రగొండపాలెం నియోజకవర్గం నుంచి పోటీ చేసేందుకు రెడీ అయ్యారు. ఇక కళ్యాణదుర్గం నియోజకవర్గం నుంచి కాపు రామచంద్రారెడ్డి ఎమ్మెల్యే టిక్కెట్ కు దరఖాస్తు చేశారు. కాపు రామచంద్రారెడ్డి ఎలాగైనా అసెంబ్లీలో అడుగు పెట్టాలనే పట్టుదలతో ఉన్నారు. ఈ నియోజకవర్గంలో మాజీ పీసీసీ అధ్యక్షుడు రఘువీరారెడ్డి ఆసీస్సులు కూడా వుండటంతో కాపు ముందుకు సాగుతున్నారు. తెలుగుదేశం పార్టీకి చెందిన కిశోర్ చంద్రదేవ్ కూడా తన కుమారుడిని రాజకీయాల్లోకి తీసుకు రావాలనే ఆలోచనలో ఉన్నారు. అందువల్ల ఆయన కూడా కాంగ్రెస్ లో చేరవచ్చనే ఊహాగానాలు వినిపిస్తున్నాయి.

పీసీసీ చీఫ్ రష్మిలతో పాటు డాక్టర్ ఎన్ రఘువీరారెడ్డి, మంగళగిరి ఎమ్మెల్యే ఆళ్ల రామకృష్ణారెడ్డి, డాక్టర్ ఎన్ తులసిరెడ్డిలు రాష్ట్ర పర్యటనలో పాలు పంచుకున్నారు. ఇప్పటికే కాంగ్రెస్ కు మంచి రోజులు వచ్చాయని, కాంగ్రెస్ వాదులంతా తిరిగి కాంగ్రెస్ లోకి వచ్చి తన సత్తా నిరూపించుకోవాలని కోరుతున్నారు.

కాంగ్రెస్ మంచి చేస్తుందని నమ్ముతున్నారా?

రాష్ట్రానికి కాంగ్రెస్ మంచి చేస్తుందని, ప్రత్యేక హోదాపై మొదటి సంతకం చేయిస్తానని షర్మిల హామీ ఇచ్చిన నేపథ్యంలో ఖచ్చితంగా కాంగ్రెస్ వైపు నిలబడేవారి సంఖ్య పెరుగుతుందని చెప్పొచ్చు. ఈలెక్కన కొన్ని నియోజకవర్గాల్లో అభ్యర్థుల మధ్య పోటీ కూడా ఎక్కువగా వుండే అవకాశాలు కనిపిస్తున్నాయి.