ఏపీ ప్రభుత్వం కీలక నిర్ణయం–ఆ కేసులను సీఐడీకి బదిలీ
జగన్ హయాంలో తెలుగుదేశం పార్టీ కార్యాలయం, చంద్రబాబు నివాసంపై దాడి కేసులపై సీఎం చంద్రబాబు ప్రభుత్వం కీలక నిర్ణయం తీసుకుంది. సీఐడీకి అప్పగిస్తూ నిర్ణయం తీసుకుంది.
గత వైఎస్‌ జగన్‌మోహన్‌రెడ్డి హయాంలో జరిగిన చంద్రబాబు నాయుడు ఇంటిపై దాడి కేసుతో పాటు మంగళగిరిలోని తెలుగుదేశం పార్టీ కేంద్ర కార్యాలయంపై జరిగిన దాడి కేసుపై సీఎం చంద్రబాబు నాయుడు ప్రభుత్వం కీలక నిర్ణయం తీసుకుంది. ఈ రెండు కేసులను సీఐడీకి అప్పగిస్తూ నిర్ణయం తీసుకుంది. ఇప్పటి వరకు ఈ కేసులు స్థానిక పోలీసుల పరిధిలో ఉన్నాయి. ప్రస్తుతం మంగళగిరి, తాడేపల్లి పోలీస్టేషన్‌ల పరిధిలో ఈ కేసులు విచారణ జరుగుతోంది. అయితే తాజాగా ఈ కేసులను సీఐడీకి బదిలీ చేస్తూ ప్రభుత్వం ఉత్తర్వులు జారీ చేసింది. స్థానిక పోలీసులను పక్కన పెట్టి సీఐడీకి ఈ కేసులను బదిలీ చేయడంపై ఆంతర్యం ఏంటనే దానిపై పలువురు చర్చించుకుంటున్నారు. సీఐడీ అయితే ప్రభుత్వం చెప్పినట్లు చేస్తుందనే ఉద్దేశంతోనే ఈ కేసులను సీఐడీకి బదిలీ చేసినట్లు టాక్‌ వినిపిస్తోంది. ఈ నేపథ్యంలో కేసుల ఫైళ్లను సీఐడీకి అప్పగించాల్సి ఉంటుంది. దీంతో కేసులకు సంబంధించిన ఫైళ్లను మంగళగిరి డీఎస్పీ సోమవారం సీఐడీకి అందజేయనున్నారు.