నాగబాబు ఎమ్మెల్సీ అయినట్లే..ఇక మంత్రి పదవే తరువాయి

తొలుత అనకాపల్లి ఎంపీగా బరిలోకి దిగాలని కోరుకున్నారు. ఆమేరకు ఆయన రంగం సిద్ధం చేసుకున్నారు. చివరి నిముషలంలో సీట్ల సర్థుబాటల్లో సీఎం రమేష్‌కు కేటాయించారు. దీంతో నాగబాబు కాస్త నిరుత్సాహానికి గురయ్యారు. తర్వాత రాజ్యసభకు వెళ్లాలని ఆశ పడ్డారు. మూడు స్థానాల్లో ఒక స్థానం దక్కుతుందని ఆశలు పెట్టుకున్నారు. నాగబాబు తమ్ముడు ఏపీ డిప్యూటీ సీఎం పవన్‌ కల్యాణ్‌ పరపతిని ఉపయోగించి ఇప్పిస్తారని కలలు కన్నారు. దీని కోసం ఢిల్లీ పెద్దలతో కూడా చర్చలు జరిపారు పవన్‌ కల్యాణ్‌. కానీ అది కూడా చివరి నిముషంలో చేజారి పోయింది. వాటిని బీదా మస్తాన్‌రావు, ఆర్‌ కృష్ణయ్య, సానా సతీష్‌బాబులకు కేటాయించడంతో రాజ్యసభ సీటు దక్కకుండా పోయింది. దీంతో మరో సారి నాగబాబు నిరుత్సాహానికి గురయ్యారు.

తర్వాత నాగబాబుకు మంత్రి పదవి ఇవ్వాలనే నిర్ణయం తెరపైకొచ్చింది. తొలుత ఎమ్మెల్సీని చేసి తర్వాత మంత్రిని చేయాలని భావించారు. ఈ నేపథ్యంలో నాగబాబును మంత్రి వర్గంలో తీసుకుంటున్నట్లు జనసేన పార్టీకి బదులుగా తెలుగుదేశం పార్టీ ప్రకటించింది. నాటి నుంచి నాగబాబుకు ఎమ్మెల్సీ పదవి ఇవ్వడం, తద్వారా మంత్రి పదవి ఇస్తారనే చర్చ కూటమి వర్గాల్లో నడుస్తోంది. తాజాగా ఐదు ఎమ్మెల్యే కోటా ఎమ్మెల్సీ స్థానాలు ఖాళీ అవుతున్న నేపథ్యంలో నాగబాబు ప్రస్తావన తెరపైకొచ్చింది. అసెంబ్లీలో ఇటీవల భేటీ అయిన చంద్రబాబు, పవన్‌ కల్యాణ్‌లు దాదాపు రెండు గంటల పాటు దీనిపైన చర్చలు జరిపారు. నాలుగు ఎమ్మెల్సీ స్థానాలు టీడీపీ, ఒక ఎమ్మెల్సీ స్థానం జనసేనకు ఇవ్వాలని చంద్రబాబు, పవన్‌ కల్యాణ్‌లు చర్చించుకుని నిర్ణయానికి వచ్చారు. ఈ నేపథ్యంలో నాగబాబుకు ఎమ్మెల్సీ పదవి ఖాయమైంది. తర్వాత మంత్రి పదవే తరువాయనే టాక్‌ జనసేన శ్రేణుల్లో వినిపిస్తోంది.