‘విశ్వంభర’ టీజర్‌తో హోరెత్తిన మెగాస్టార్ చిరు జన్మదిన వేడుకలు

మెగాస్టార్ చిరంజీవి 70వ జన్మదినం. సినిమా రంగం, అభిమాన లోకం (ఆగస్టు 22) అంతటా ఇవాళ ఒకటే సందడి.. ఒకటే సవ్వడి.. తెలుగు సినీ పరిశ్రమలో ఐదు దశాబ్దాలుగా అగ్రస్థానంలో మెరిసిన ఈ మహానటుడి పుట్టినరోజు వేడుకలు దేశవ్యాప్తంగా హోరెత్తుతున్నాయి. అభిమానులు కేక్ కట్ చేస్తూ, రక్తదాన శిబిరాలు, సేవా కార్యక్రమాలు నిర్వహిస్తూ తమ అభిమానాన్ని వ్యక్తం చేస్తున్నారు.

వశిష్ఠ దర్శకత్వం వహిస్తున్న ఈ భారీ సామాజిక–ఫాంటసీ చిత్రాన్ని UV Creations నిర్మిస్తోంది. టీజర్ ఒక ప్రత్యేక దృశ్యంతో మొదలవుతుంది—ఒక చిన్న బాలుడు, ఒక వృద్ధుడు గతంలో మానవుల స్వార్థం, లోభం వలన జరిగిన విధ్వంసాన్ని గుర్తుచేసుకుంటారు.

ఆ చీకటిలో నుంచి ఒక రక్షకుడు వస్తాడు...

తళుక్కున మెరిసే అవతారం, గంభీరమైన హావభావాలు.. ఈ సినిమాకు ఒక మహోన్నత రూపాన్ని ఇచ్చినట్టు అర్థమవుతోంది. విశ్వంభర కేవలం ఫాంటసీ సినిమా కాదు, మానవ లోభం–ప్రకృతి సమతుల్యం–పరిరక్షణ వంటి అంశాలను చూపించే ఒక గొప్ప సామాజిక కధనం అని టీజర్ సూచిస్తోంది.

ఇప్పటికే తెలుగు సినీ అభిమానుల అంచనాలు ఆకాశాన్నంటుతున్న ఈ చిత్రానికి కొత్తగా ఒక ముఖ్య పరిణామం చోటుచేసుకుంది.

అభిషేక్ అగర్వాల్ ఆర్ట్స్ ఈ ప్రాజెక్టులో చేరి, చిత్రాన్ని హిందీ వెర్షన్‌లో కూడా విడుదల చేయబోతోంది. దీంతో విశ్వంభర ప్రేక్షకాదరణను దేశవ్యాప్తంగా విస్తరించబోతోంది.

చిరంజీవి పుట్టినరోజు వేడుకలు ప్రతీ ఏటా పండగలా మారుతాయి. ఈసారి ఆయన 70వ ఏట అడుగుపెట్టడంతో మరింత వైభవంగా మారాయి. హైదరాబాదు, తెనాలి, విజయవాడ, తిరుపతి నుండి అమెరికా, దుబాయ్ వరకూ అభిమాన సంఘాలు వేడుకలు జరుపుతున్నాయి.

70 ఏళ్ల వయసులోనూ చిరంజీవి తెరపై కనిపించే శక్తి, ఆత్మవిశ్వాసం ఇంకా కొత్త తరానికి స్ఫూర్తిదాయకమే. విశ్వంభర టీజర్‌తో ఆయన మరోసారి సినిమా మాయాజాలానికి, అభిమానుల విశ్వాసానికి ప్రతీకగా నిలిచారు.