‘గేమ్ ఆన్’ ఒటిటి మూవీ చూడొచ్చా లేదా: ఒక రివ్యూ

ఓటిటిలు వచ్చాక కొత్త కాన్సెప్ట్ లతో యూత్ చాలా మంది ఈజీగా సినిమాలు చేసేస్తున్నారు.

అయితే కాన్సెప్టు దాకానే కొత్తగా ఉంటున్నాయి. అంతకు మించి ఏమీ ఉండటం లేదనేది చాలా మంది నుంచి వస్తున్న కంప్లైంట్. దానికి తోడు ఈ సినిమాల్లో తెలిసున్న హీరో,హీరోయిన్స్ ఉండరు. గొప్ప టెక్నీషియన్స్ ఉండరు. షార్ట్ ఫిల్మ్ కు ఎక్కువ ఫీచర్ ఫిల్మ్ కు తక్కువ అన్నట్లుంటాయి ఈ సినిమాలు. అందుకేనేమో ఈ మధ్యన మలయాళ సినిమా డిస్ట్రిబ్యూటర్..కేవలం చాలా మంది ఓటిటిలో అమ్ముకునేందుకే సినిమాలు తీసి నామ మాత్రంగా థియేటర్ లో రిలీజ్ చేయాలి కాబట్టి చేస్తూ డబ్బులు చేసుకుంటున్నారు.

అలాంటి సినిమాల వల్ల థియేటర్ లో రిలీజ్ అయ్యే నిజమైన చిన్న సినిమాల విలువ తగ్గుపోతోంది వాటిని అరికట్టండి మహాప్రభో అని మొరపెట్టుకున్నారు. ఆ మాటలు ఎవరైనా విన్నారా లేదా అనేది ప్రక్కన పెడితే ఈ గేమ్ ఆన్ కూడా కొంచెం అటూ ఇటూగా అలాగే అనిపిస్తుంది. కాన్సెప్టుగా ఇప్పటిదాకా తెలుగు తెరపై రాలేదు అనిపిస్తుంది. కానీ సినిమాగా చూస్తూంటే ఆ ఫీల్ మాత్రం రాదు.

ఇంతకీ ఈ చిత్రం కథేంటి అంటే.. టైటిల్ కు తగ్గట్లే ..ఓ గేమింగ్‌ కంపెనీలో పని చేస్తూంటాడు గౌతమ్‌ సిద్ధార్థ్‌ అలియాస్‌ సిద్ధు(గీతానంద్‌). ఈ కుర్రాడు అందరిలాంటోడు కాదు కొద్దిగా తేడా. దాంతో పర్శనల్ లైఫ్ కూడా కాస్తంత చిందరవందరగానే ఉంటుంది.

ఉద్యోగంలో టార్గెట్ రీచ్ కాకపోవటంతో జాబ్ పోతుంది. ఉన్న ఒక్క గర్ల్ ప్రెండ్ మోక్ష(వాసంతి) కూడా బ్రేకప్ చెప్పేసి ప్రెండ్ రాహుల్‌(కిరీటీ)తో జంప్ జిలానీ అంటుంది. ఇలా కష్టాలు మీద కష్టాలు మీద పడిపోతుంటే ఏం చెయ్యగలడు..ఆత్మహత్యే అందుకు మార్గం అనిపిస్తుంది. ఆ ప్రయత్నంలో ఉండగా..అతనికి ఎవరో తెలియని వ్యక్తి నుంచి ఓ ఫోన్ కాల్ వస్తుంది. ‘నీ ముందు ఉన్న ఈగను చంపేస్తే లక్ష రూపాలయను అకౌంట్‌లో వేస్తాం’అని ఆఫర్ ఇస్తాడు.

ఈగను చంపితే లక్ష ఇవ్వటమేంటిరా అనిపించినా..సర్లే చచ్చేముందు ఓరాయి వేసి చూద్దాం అని చంపిన మరుక్షణమే.. అకౌంట్‌లోకి రూ.లక్ష క్రెడిట్‌ అవుతుంది. ఇదేందే బాగానే ఉంది ఈగలను చంపేసి అయినా బ్రతికేయచ్చు అని సూసైడ్ ఆలోచనను ప్రక్కన పెట్టేస్తాడు.