ఇళయరాజాకు ఢిల్లీ హైకోర్టు బిగ్ షాక్!

న్యూఢిల్లీ: భారతీయ సంగీత దిగ్గజం, 'ఇసైజ్ఞాని' ఇళయరాజాకు (Ilaiyaraaja) న్యాయస్థానంలో చుక్కెదురైంది. తన సొంత బాణీలను వాడుకోకుండా ఢిల్లీ హైకోర్టు ఆయనపై మధ్యంతర నిషేధం విధిస్తూ సంచలన తీర్పు ఇచ్చింది. ప్రముఖ మ్యూజిక్ లేబుల్ 'సరిగమ' (Saregama) దాఖలు చేసిన కాపీరైట్ కేసులో ఇళయరాజాకు ఈ షాక్ తగిలింది.

134 సినిమాలపై ఆంక్షలు!

1976 నుండి 2001 మధ్య కాలంలో ఇళయరాజా సంగీతం అందించిన 134 సినిమాల పాటలకు సంబంధించి ఈ వివాదం నడుస్తోంది. ఈ సినిమాల సంగీత హక్కులు (Copyrights) తమవేనని, ఇళయరాజా వాటిని తన సొంతం అని చెప్పుకుంటూ ఇతర ప్లాట్‌ఫామ్‌లకు లైసెన్స్‌లు ఇవ్వడం చట్టవిరుద్ధమని సరిగమ కోర్టును ఆశ్రయించింది. దీనిపై విచారణ జరిపిన జస్టిస్ తుషార్ రావు గెడెలా.. తదుపరి ఉత్తర్వులు ఇచ్చే వరకు ఆ పాటలను వాడకూడదని ఇళయరాజాను ఆదేశించారు.

అమెజాన్, ఐట్యూన్స్‌లో పాటల తొలగింపు?

ఇటీవల ఇళయరాజా తన పాత పాటలను అమెజాన్ మ్యూజిక్, ఐట్యూన్స్, జియో సావన్ వంటి డిజిటల్ ప్లాట్‌ఫామ్‌లలో అప్‌లోడ్ చేయడమే కాకుండా, వాటిపై తనకే పూర్తి హక్కులు ఉన్నాయని క్లెయిమ్ చేశారు. అయితే, అప్పట్లోనే నిర్మాతలు ఈ హక్కులను తమకు శాశ్వతంగా విక్రయించారని సరిగమ వాదించింది. కోర్టు కూడా ప్రాథమికంగా సరిగమ వాదనతో ఏకీభవిస్తూ, ఇళయరాజా తీరు వల్ల సరిగమకు కోలుకోలేని ఆర్థిక నష్టం జరుగుతుందని అభిప్రాయపడింది.

'ఎన్ ఇనియ పొన్ నిలవే' కేసులోనూ చుక్కెదురు!

ఇప్పటికే సూపర్ హిట్ సాంగ్ "ఎన్ ఇనియ పొన్ నిలవే" (Moodu Pani సినిమాలోనిది) విషయంలో కూడా ఇళయరాజా మరియు సరిగమ మధ్య పెద్ద యుద్ధమే జరిగింది. ఆ కేసులో కూడా కోర్టు సరిగమకే అనుకూలంగా తీర్పు ఇచ్చింది. తాజాగా 134 సినిమాలపై నిషేధం విధించడంతో ఇళయరాజాకు ఇది పెద్ద ఎదురుదెబ్బగా మారింది.

నిర్మాతలే యజమానులు!

భారత కాపీరైట్ చట్టం ప్రకారం.. ఒక సినిమా కోసం పనిచేసినప్పుడు, ఆ సంగీతానికి మొదటి యజమాని నిర్మాతలే అవుతారని, వారు ఆ హక్కులను ఎవరికైనా విక్రయించుకోవచ్చని కోర్టు స్పష్టం చేసింది. ఒప్పందం ఉంటే తప్ప సంగీత దర్శకులకు ఆ హక్కులు దక్కవని పేర్కొంది. ఈ కేసు తదుపరి విచారణ ఏప్రిల్ 2026లో జరగనుంది.