మళ్లీ కనువిందు చేయనున్న చిరు, త్రిష

మరోసారి విజయాన్ని సొంతం చేసుకునేందుకు ప్రముఖ నటుడు, మెగాస్టార్ చిరంజీవి, సహజ నటి త్రిష జట్టు కట్టనున్నట్టు సినీవర్గాల సమాచారం. ఈ ఇద్దరూ హిరోహీరోయిన్ గా నటించిన స్టాలిన్ సూపర్ డూపర్ హిట్ అయిన విషయం తెలుగు రాష్ట్రాల ప్రజలకు తెలిసిందే. ఆ తరవాత ఈ జోడీని మళ్లీ సిల్వర్‌ స్ర్కీన్‌పై చూసే అవకాశం రాలేదు. ఇంత కాలానికి వీరిద్దరూ జంటగా దర్శనమివ్వబోతున్నారని టాక్‌. చిరంజీవి - వశిష్ట కాంబినేషన్‌లో ఓ చిత్రం రూపుదిద్దుకొంటున్న సంగతి తెలిసిందే. ఈ చిత్రంలో చిరు సరసన ఐదుగురు కథానాయికలు కనిపించబోతున్నారు. అందులో ఓ కథానాయికగా త్రిష ఎంపిక ఖాయమైందని సమాచారం. నిజానికి త్రిష పాత్రలో ముందుగా అనుష్క పేరు పరిశీలించారు. చివరికి త్రిషని ఫైనల్‌ చేసినట్టు వార్తలొస్తున్నాయి. ఈ చిత్రంలో త్రిష దేవకన్యగా కనిపించబోతున్నట్టు సమాచారం. ఈ తరహా పాత్ర త్రిష ఇంత వరకూ చేయలేదు. అందుకే కథ విన్న వెంటనే ‘ఓకే’ చేసిందని గుసగుసలు వినిపిస్తున్నాయి. మరో నలుగురు కథానాయికలు ఎవరన్నది తెలియాల్సివుంది. ఈ చిత్రానికి ‘విశ్వంభర’ అనే పేరు పరిశీలిస్తున్నారు. సోషియో ఫాంటసీ నేపథ్యంలో సాగే ఈ చిత్రానికి ఎం.ఎం.కీరవాణి సంగీతాన్ని సమకూరుస్తున్నారు. త్రిష పేరు బయటికి రావడంతో మెగా అభిమానులు కేరింతలు కొడుతున్నారు. ఐదుగురు హీరోయిన్లో వస్తున్న ఈ సినిమా సూపర్ డూపర్ హిట్ కొడుతుందంటున్నారు.