విశ్వక్సేన్ 'లైలా' మూవీ రివ్యూ

యంగ్‌ హీరో విశ్వక్‌ సేన్‌ కు ఇప్పుడు డెస్పరేట్ గా హిట్ అవసరం. దాంతో ఆడవేషం కట్టి ‘లైలా’ గా అందరి అటెన్షన్ ని గ్రాబ్ చేసాడు. ‘లైలా’పైనే ఆశలన్నీ పెట్టుకున్నాడు. ఈ సినిమా ప్రమోషన్స్ కు, అందులో నడిచిన వివాదంకు మంచి రెస్పాన్స్‌ వచ్చింది. ‘లైలా’పై మంచి హైప్‌ క్రియేట్‌ అయింది. అయితే ఆ అంచనాలను ఈ చిత్రం అందుకుందా అంటే లేదనే చెప్పాలి. సినిమా కథేంటి. ఎక్కడ తప్పు జరిగింది.., విశ్వక్‌ హిట్‌ కొట్టగలిగాడా? వంటి విషయాలు రివ్యూలో చూద్దాం.

స్టోరీ లైన్

హైదరాబాద్ పాతబస్తీలో బ్యూటీ పార్లర్ నడుపుకునే సోను మోడల్(విశ్వక్ సేన్)కి ఆ చుట్టుపక్కల మంచి క్రేజ్ ఉంటుంది. అమ్మాయిలు అతనిచేత మేకప్ చేయించుకోవాలని తహతహలాడుతూంటాడు. సోనూ మోడల్ ..మంచి చేయబోయి ఇరుక్కుపోతూంటాడు. అలా అతనికి లోకల్ దాదా రుస్తుం(అభిమన్యు సింగ్) , పోలీస్ శంకర్(బబ్లూ పృథ్వీరాజ్) శతృవులు అవుతారు. అంతేకాకుండా తన పార్లర్ కి వచ్చే ఓ మహిళ కు ఆయిల్ బిజినెస్ కి హెల్ప్ చేస్తే అది వికటిస్తుంది.

ఆ నూనె వలన ఫుడ్ పాయిజన్ అయి ఎమ్మెల్యే సహా చాలా మంది ఆసుపత్రి పాలవుతారు. దాంతో సోను చుట్టూ వల పన్నుతారు పోలీసులు. ఇటు రౌడీలు, అటు పోలీస్ లు సోనూని పట్టుకోవాలని చూస్తుంటే వేరే దారి లేక వీళ్ల నుంచి తప్పించుకోవటానికి సోనూ మోడల్ లేడీ గెటప్ లోకి మారి లైలా అవతారం ఎత్తుతాడు. అప్పుడు ఏమైంది. అతని లవ్ స్టోరీ మేటర్ ఏంటి అనే విషయాలు తెలియాలంటే సినిమా చూడాల్సిందే.

విశ్లేషణ

కథగా చాలా ప్రిడిక్టబుల్ గా అనిపిస్తున్నా స్క్రీన్ ప్లే తో మాయ చేసి బయిటపడతారు. కానీ ఇక్కడ కథ తో పాటు కథనం కూడా కలిసి రాలేదు. డైరక్షన్ సోసోగానే ఉంది. దాంతో సిని పరిశ్రమకు హిట్ ఫార్ములా అయిన హీరో ఆడవేషం వేయడం అనే ప్రయోగం ఈ సారి ఫలించ లేదు. క్యారక్టర్స్ బలంగా రాసుకోలేదు. దాంతో కామెడీ వర్కవుట్ కాలేదు.

దానికి తోడు డబుల్ మీనింగ్ డైలాగ్స్ మీద ఆధారపడతారు. సినిమా కథకు కోర్ పాయింట్ లాంటి సోనూ మోడల్.. లైలాగా మారడానికి ఓ బలమైన నేపథ్యం కానీ ,కారణం కానీ చూపించలేకపోయారు. ఫస్టాఫ్, సెకండాఫ్ అనే తేడా లేకుండా రెండు హాఫ్ లు ఒకేలా విసిగిస్తాయి. క్లైమాక్స్ లో కూడా చివరికి సినిమా లేవదు. అసలు లైలాగా విశ్వక్సేన్ మారిన తర్వాత చేయడానికి ఏమీ కనిపించలేదు. పూర్తి ప్యాసివ్ క్యారక్టర్స్. ఇలాంటి స్క్రిప్టులు బోర్ కొట్టిస్తాయి. అదే తెరపై జరిగింది.

ఎవరెలా చేశారు

లేడీ గెటప్ కోసం విశ్వక్ సేన్ పడిన కష్టం మాత్రం తెరపై కనిపించింది. అయితే స్క్రిప్ట్ ఆ కష్టాన్ని ఎలివేట్ చేసి క్యాష్ చేసుకోలేకపోయింది. ఈ సినిమాలో విశ్వక్ సేన్.. లైలాగా, సోనూ మోడల్‌గా రెండు వేరియేషన్స్ ఉన్న పాత్రలు బాగా చేసారు. రిలీజ్ కు ముందు వివాదం రేపిన థర్టీ ఇయర్స్ ఇండస్ట్రీ పృథ్వీ‌కి బలమైన క్యారెక్టర్ పడలేదు. మిగతా పాత్రలు సోసోగా ఉన్నాయి. టెక్నికల్ గానూ సోసోగా ఉంది. లియోన్ జేమ్స్ మ్యూజిక్ జస్ట్ ఓకే . రిచర్డ్ ప్రసాద్ కెమెరా వర్క్ ఈ చిన్న సినిమాకు రిచ్ లుక్ తెచ్చిపెట్టింది.

చూడచ్చా

మరీ ఖాళీగా ఉండో లేక విశ్వక్సేన్ వీరాభిమానులు అయితే ఈ సినిమా మంచి ఆప్షన్. ఆ రెండు కాకపోతే ఓటీటీ కోసం వెయిట్ చేయచ్చు.