తిరుపతి సమీపంలో అద్భుతం ‘ఉప్పసట్టి- పప్పు సట్టి’
అప్పటి రాజులు , రాణులు ఇంత ఎక్కుడు ఎక్కి ఎట్లా వచ్చినారో ఏమో ? ఏమి సౌందర్య కాంక్షవారిది ? ఆక్షణం విజయనగర రాజుల కాలంలోకి పోయి ఆ వైభవాన్ని నెమరేసుకునేలా చేస్తుంది
-భూమన్*
తిరుపతికి చంద్రగిరి వొక అద్భుతమయిన చారిత్రాత్మక ప్రదేశం. అక్కడి కోట అంటేనే వొళ్లు పులకిస్తుంది. చిత్తూరు నుండి తిరుపతి వచ్చేప్పుడు కనిపించే కట్టడంలాంటి ఆరాతి కొండ చూపరులను అబ్బురపరుస్తుంది. భువనగిరిలో ఉన్నట్టుగా ఇక్కడకూడ ROCK CLIMBING ఏర్పడితే బావుణ్ణునని ఎన్నాళ్లగానో కలలు కంటున్నాను.
చంద్రగిరి అంటూనే ఏడుసార్లు తిరుమల కొండకు వచ్చి అనేక ఆభరణాలు సమర్పించిన శ్రీకృష్ణదేవరాయులు గుర్తుకొస్తాడు. తిరుమల ఆలయంలోని శ్రీకృష్ణదేవరాయలు , దేవేరులతో కూడ విగ్రహాలు , అచ్యుతరాయలు , వెంకటపతిరాయలు విగ్రహాలు గుర్తొస్తాయి.
ఎన్నో విలక్షణ చారిత్రకఘట్టాలకు నిలువెత్తు నిదర్శనం ఈ కోట. చక్కటి ప్రకృతి పరిసరాల మధ్యన , రొడ్డువార కోటగోడ , చూపుకందే ఉరికంబం , ఎత్తయిన శిఖరంతో భలే ఆకర్షిస్తుంది. ఈ కోట. కోటలో ఆంజనేయుల గుడి దగ్గర నుండి. రాజమహాల్ వరకు చూసినన్ని చారిత్రాత్మక విశేషాలు అబ్బుర పరుస్తాయి. కొన్ని పదులసార్లు చంద్రగిరికి , ఉరికంబంకు పోయొచ్చినా తనివి తీరని కోట ఆకర్షణ చంద్రగిరికోట.
కోట పైభాగాన ఉప్పుసట్టి - పప్పుసట్టి అనే ప్రదేశం ఉంది. అక్క ఎన్ని సార్లు పోయినా , ఈమారు పోవటం మరింత ఉత్సాహాన్నిచ్చింది.
ప్రతిసారీ ఉరికంబందారి గుండా నైనా , ఏనుగుల మండపుదారి గుండానైనా ఎక్కేవాళ్లం. ఈ సారి చంద్రగిరి కోట అధికారి ప్రవీణ్ , ‘సార్ ! చిరంజీవిని గైడుగా పంపుతాను , తీసికెళ్లండి,’ అంటే 20 మంది అతణ్ణి రమ్మని దారితీసినాము.
మార్గంలో తొలిదర్వాజ అద్భుతమయిన శిల్పసంపదతో ఉంది. విజయనగర రాజులు సామాన్యులుకాదు రా స్వామీ అనుకున్నాము. కళలు , శిల్పం , సంగీతం , సాహిత్యం అంటే ఎంత పిచ్చిప్రేమ వారికి. గడపకు ఆ పక్కా ఈ పక్కా దశావతారాలు చెక్కి ఉన్నారు. పూలు , సింహాకారాలు , కోతులు ఆకారాలు ఆ దర్వాజా నిండుగా ఉన్నాయి. పెద్ద పెద్ద కొయ్యతలుపులు ఉన్నట్టుగా గుర్తులున్నాయి. పులిజూదం , పాచికలాటలు ఆడినట్టు గుర్తులున్నాయి. అక్కడ గడిపినంతసేపూ తనివితీరా గడిపి పైకి కదిల్తే మరికొంత ఎత్తులో ఇంకో ద్వారం.
ఇక్కణ్ణించిచూస్తుంటే రాజమహలు , గుళ్లు , గోపురాలు , కొండలు , కోనలు , తోటలు , ఊళ్లు అద్భుతంగా కనువిందుచేస్తున్నాయి. ఇక్కడ నుండి చూస్తే కుడి పక్క ఎగువన ఒక నునుపాటి పెనుబండకు అతికించనట్టుగా దర్గా. అక్కడికి తప్పక పోవల్సిందేననుకుంటూ రెండో ద్వారం దాటుకున్నాము. దాటగానే ఆంజనేయుడు స్వాగతం చెబుతున్నట్టుగా చక్కటి విగ్రహం.
అక్కడ నుండి కుడిపక్కన పోగానే ఇంకో ద్వారం. ఇది మూడోది. పాములు. ఉడుములు రక రకాల బొమ్మలు చెక్కబడి ఉన్నాయి. చుట్టూ నిధుల కోసం తవ్వకాలు జరిగిన దాఖలాలు ఉన్నాయి. ఇక్కడే ఏవో దేవుళ్ల గుళ్లు ఉన్నట్లుగా ఆనవాలు ఉన్నాయి. అక్కడనుండి ఎగువకు పోతూంటే బండలపైన పాదాలు , మంచం ఆకారంలో ఒక బొమ్మ ఆకారం చూపించి చిరంజీవి ఇవి శ్రీవేంకటేశ్వరుడి పాదాల్సార్ , ఇదిగో ఇక్కడే పద్మావతితో నిద్రజేసిందని పూనకంతో కథ కథలుగా చెప్పినాడు. ఇక్కడే వెలసి ఉండవల్సిందట , స్థావరం నచ్చక తిరుమల వెళ్లిపోయినాడట స్వామి. దాన్నానుకొని చూడ చక్కటి కోనేరు. దీన్ని మంగలికోనేరు అని పిలుస్తారట.
ఆ రకంగా ఈ కొత్తదారిలో మా ఉప్పుసట్టి విజ్ఞానదాయకంగా ముగిసింది.
-
పప్పుసట్టి ట్రెక్కింగు మహా అద్భుతంగా , వైభవంగా సాగింది.
(*భూమన్, చరిత్రపరిశోధకుడు, ఉపన్యాసకుడు, రచయిత, ట్రెకింగ్ యోధుడు)
