గోదావరి రైతుల తోటల్లో లక్షల మామిడి.. ఐస్‌క్రీమ్ కొబ్బరి

గోదావరి తీరానికి వెళ్తే సాధారణంగా కొబ్బరి, అరటి, మామిడి తోటలే కనిపిస్తాయని అనుకుంటాం. కానీ అక్కడి కొన్ని తోటల్లో అడుగుపెడితే అది రైతు పొలం కాదేమో… ప్రపంచ ఫలాల ప్రదర్శనశాల అనిపిస్తుంది.

అరటిపండులా కనిపించే మామిడి!

స్పూన్‌తో తినే ఐస్‌క్రీమ్ కొబ్బరి!

కిలో ధర లక్షలు దాటే మామిడిపండ్లు!

యాపిల్‌లా కనిపించే మామిడి, స్ట్రాబెర్రీ జామ, గింజలేని సీతాఫలం…

ప్రపంచం నలుమూలల నుంచి వచ్చిన ఈ అరుదైన పండ్లను గోదావరి రైతులు తమ తోటల్లో పెంచుతూ వ్యవసాయంలో కొత్త అధ్యాయాన్ని రాస్తున్నారు. విదేశీ మొక్కలను స్థానిక నేలతో కలిపి సాగు చేస్తూ కొత్త రుచులు, కొత్త ప్రయోగాలు చేస్తూ గోదారి తీరాన్ని ఒక “ఎగ్జాటిక్ ఫ్రూట్ హబ్”గా మార్చుతున్నారు.

కాటన్ దొరకు రైతు నివాళి

గోదావరి జలాలను రైతుల పొలాలకు అందించిన అపర భగీరథుడు సర్ ఆర్థర్ కాటన్‌కు ఒక రైతు ప్రత్యేకంగా నివాళి అర్పించాడు.

రాజమండ్రి సమీపంలోని కడియపు లంకలో సప్తగిరి నర్సరీ నిర్వహిస్తున్న రైతు కుప్పాల దుర్గారావు కొత్త నేరేడు రకాన్ని అభివృద్ధి చేసి దానికి “కాటన్ దొర నేరేడు” అని పేరు పెట్టారు.

ఈ నేరేడు ప్రత్యేకతలు కూడా ఆసక్తికరమే.

రెండున్నర ఏళ్లలోనే కాపు

చెట్లు ఎక్కువ ఎత్తు పెరగవు

పిల్లలు కూడా సులభంగా పండ్లు కోయగలరు

రుచిలో మిగతా నేరేడు రకాల కంటే మెరుగైనది

కోసిన తరువాత ఎక్కువ రోజులు నిల్వ ఉంటుంది

ఫిలిప్పీన్స్ నుంచి తెచ్చిన మొక్కలను స్థానిక మొక్కలతో అంటుకట్టి ఆయన వందలాది కొత్త మొక్కలను అభివృద్ధి చేశారు.

ఇదే నర్సరీలో మరో ఆశ్చర్యం కూడా ఉంది — మూడు రంగుల దుంపలు.

థాయ్లాండ్ నుంచి తెచ్చిన ఈ దుంపలను కోస్తే ముక్కలు ఆరెంజ్, బీట్రూట్, బంగారు రంగుల్లో మెరిసిపోతాయి. 90 రోజుల్లో పంట ఇచ్చే ఈ దుంపలు చిలగడదుంప జాతికి చెందినవని, పోషకాలు అధికంగా ఉంటాయని రైతు చెబుతున్నారు.

అదే నర్సరీలో రెడ్ వాటర్ యాపిల్, తెల్ల నేరేడు, సీడ్లెస్ పనస వంటి అరుదైన మొక్కలు కూడా కనిపిస్తాయి.

కిలో ధర రెండు లక్షలు దాటే మామిడి!

కాకినాడ జిల్లా చేబ్రోలు గ్రామానికి చెందిన రైతు ఓదూరి నాగేశ్వరరావు తోటలోకి వెళ్తే అది ఒక “మామిడి మ్యూజియం”లా కనిపిస్తుంది.

నాలుగు ఎకరాల్లో వందకు పైగా వెరైటీ పండ్లను సాగు చేస్తున్న ఈ రైతు ప్రత్యేకంగా అరుదైన మామిడి రకాలపై ప్రయోగాలు చేస్తున్నారు.

అక్కడ కనిపించే కొన్ని ఆశ్చర్యకరమైన రకాలు:

స్ట్రాబెర్రీ మామిడి

యాపిల్ మామిడి

అరటి మామిడి

టెంకలేని మామిడి

ఇవన్నింటిలో అత్యంత ఖరీదైనది మియాజాకీ మామిడి. జపాన్‌లోని మియాజాకీ ప్రాంతంలో పండే ఈ మామిడిని “కింగ్ ఆఫ్ మ్యాంగో”గా పిలుస్తారు. బయటకు ఎర్రటి మెరుపుతో ఉండే ఈ పండు లోపల బంగారు రంగులో మెరిసిపోతుంది.

ప్రపంచ మార్కెట్‌లో దీని ధర కిలోకు రెండు లక్షల రూపాయలకు పైగా పలుకుతుంది.

“నాలుగేళ్ల క్రితం అరుదైన మొక్కలు పెంచాలనే ఆలోచనతో సుమారు తొమ్మిది లక్షలు ఖర్చు చేసి వంద రకాల మొక్కలు నాటారు. మియాజాకీ మామిడి మొక్కలు ఇరవై నాటితే కొన్ని మాత్రమే కాయలు కాసాయి. అమ్మకుండా బంధువులకు రుచి చూపించాం.” నాగేశ్వరరావు చెబుతారు:

ఈ తోటలో మామిడి రకాలతో పాటు అరటి సపోటా, ఎర్ర పనస, భారీ సీతాఫలం వంటి పండ్ల చెట్లు కూడా ఉన్నాయి.

స్పూన్‌తో తినే ఐస్‌క్రీమ్ కొబ్బరి

కడియపు లంకలోని మరో నర్సరీలో చిలుకూరి నరేష్ చేస్తున్న ప్రయోగాలు కూడా రైతులను ఆశ్చర్యపరుస్తున్నాయి.

ఏడో తరగతి వరకు మాత్రమే చదివిన నరేష్ విదేశాల్లో చూసిన మొక్కలతో స్ఫూర్తి పొంది తన తండ్రి నిర్వహిస్తున్న శ్రీ స్వాతి నర్సరీలో కొత్త ప్రయోగాలు ప్రారంభించాడు.

ఇప్పుడు ఆయన దగ్గరున్న మొక్కల్లో అత్యంత పాపులర్ అయింది ఐస్ క్రీమ్ కొబ్బరి.

ఈ కొబ్బరి ప్రత్యేకత ఏమిటంటే:

కాయలో నీరు ఉండదు

మెత్తని గుజ్జు ఉంటుంది

దాన్ని స్పూన్‌తో తీసుకుని ఐస్‌క్రీమ్‌లా తినవచ్చు

ఇంకో వెరైటీ పర్ఫ్యూమ్ కొబ్బరి. కాయను కొడితే సువాసన వెదజల్లుతుంది. లోపల నీరు కూడా ప్రత్యేక రుచితో ఉంటుంది.

ఇదే నర్సరీలో

16 ఆకుల మహాబిల్వం

గింజలు లేని బత్తాయి

సీడ్లెస్ సీతాఫలం

వంటి అరుదైన మొక్కలు కూడా ఉన్నాయి. ప్రస్తుతం అరెకరం నుంచి ప్రారంభమైన ఈ నర్సరీని దాదాపు పది ఎకరాలకు విస్తరించారు.

గ్రాఫ్టింగ్‌తో విదేశీ మొక్కలు

ఈ ప్రయోగాల వెనుక ఉన్న ప్రధాన సాంకేతికత గ్రాఫ్టింగ్ (అంటుకట్టడం).

రైతులు విదేశీ మొక్కల కొమ్మలను స్థానిక మొక్కల వేర్లతో కలిపి అంటుకడతారు. తరువాత కొన్ని రోజుల పాటు తేమ, వేడి ఉన్న వాతావరణంలో ఉంచితే అవి కలిసిపోతాయి.

సుమారు 20 రోజుల్లో ఆ మొక్కలను పొలంలో నాటవచ్చు.

వియత్నాం, థాయ్లాండ్, తైవాన్, జపాన్ వంటి దేశాల్లో ఈ పద్ధతి విస్తృతంగా ఉపయోగిస్తున్నారు. అదే విధానాన్ని ఇప్పుడు గోదావరి రైతులు కూడా అనుసరిస్తున్నారు.

ఒకప్పుడు వరి గోదాముగా పేరొందిన గోదావరి డెల్టా…

ఇప్పుడు ప్రపంచ ఫలాల తోటగా మారుతోంది.

స్థానిక నేలలో విదేశీ రుచులు పండిస్తూ ఈ రైతులు చెబుతున్న సందేశం ఒక్కటే

వ్యవసాయం అంటే కేవలం పంట కాదు… ఆవిష్కరణ.