చుట్టూ పచ్చని అడవులు… గలగలలు మోగే మున్నేరు నది ప్రవాహం… బురద మైదానాలపై వాలస పక్షుల రెక్కల సందడి… వాటి కిలకిలరావాలతో పాఖాల సరస్సు ఓ సహజ సంగీత మందిరంలా మారింది. ప్రకృతి అందాలు, జీవవైవిధ్యం కలగలిసిన ఈ చారిత్రాత్మక జలాశయం నేడు పక్షిప్రేమికులు, పర్యావరణ పర్యాటకులను విశేషంగా ఆకట్టుకుంటోంది.ఈ సరస్సు మరోసారి తన జీవవైవిధ్య గొప్పతనాన్ని చాటుకుంది. తాజా వార్షిక వాటర్‌బర్డ్ సెన్సస్–2026లో ఈ సరస్సు, చుట్టుపక్కల ప్రాంతాల్లో 70 రకాల పక్షి జాతులు గుర్తించటం పర్యావరణ వర్గాల్లో ఆసక్తిని రేకెత్తిస్తోంది.తెలంగాణ రాష్ట్రంలోని హైదరాబాద్ నగరానికి 174 కిలోమీటర్ల దూరంలో, వరంగల్ నగరానికి కేవలం 50 కిలోమీటర్ల దూరంలో ఉన్న పాఖాల సరస్సు ప్రకృతి అందాలతో పాటు రమణీయతకు ఆలవాలంగా నిలిచింది.