నేటి ఏడు మినీ కవితలు: ఏమంటున్నాయో తెలుసా?

ఓటు కత్తి

ఓటు పునాదుల మీద

నేరైతు వెన్ను పైన

చెమట చుక్కల నీడలో

నడయాడే పాలనలో

పుట్టుకొచ్చిన కొమ్ములు

సగటు మనిషిని చీల్చేస్తున్నాయి

ఓటు కత్తికి పని చెప్పండి

మనుషులమై

కదిలే దేహాలం

కదలని మనుషులం

రగిలే క్రోధాలం

తిరుగాడే భ్రమరాలం

ఆకర్షణ వీక్షణతో అంధులం

ఆరడుగుల గోతిలో శలభాలం

ఎందుకు ఆరాటం...

మనుషులమై మిగులుదాం

దెబ్బ

కుక్క కాటుకు

చెప్పు దెబ్బ

వంచన కాటుకు

ఓటు దెబ్బ

అయ్యో....రామ...!

నాడు రాముడు

సింహాసనం త్యజించి

అరణ్య వాసానికి

నేడు రామ భక్తులు

సింహాసనం కోసం

రామ మందిరానికి

గుంటలు

రోడ్ల పై

గుంటలు చూస్తే

అర్థమైంది

జనం కళ్లూ

గుంటలు పడుంటాయని

వాళ్ళకి తెలియడం లేదు

తాము కళ్ళు తెరిస్తే

ఏ గుంటలూ ఉండవని

సిరా చుక్క

ప్రజాస్వామ్యం

గూటిలో గుడ్ల కోసం

మత నాగులు

దేశం చెట్టెక్కుతున్నాయి

చూపుడు వేలిపై

సిరాచుక్క డేగను వదలండి

ఆయుధం

అసత్యాలు అర్ధ సత్యాల

పడగ పగలాలంటే

ఓటు ముంగిసే ఆయుధం

(గోలి మధు, మంగళగిరి, వృత్తి రాష్ట్ర గృహ నిర్మాణ సంస్థ లో వర్క్ ఇన్స్పెక్టర్, ప్రవృత్తి: చైతన్యాన్ని పంచుతూ సాహితీ సాగర తీరాన పయనం)