చంద్రుడిపై గుహలు.. మానవ ఆవాసాలుగా మారనున్నాయా?

చంద్రుడిపై మానవ ఆవాసాలకు సరైన ప్రదేశం దొరికిందా? అక్కడి నుంచి అంతరిక్ష ప్రయోగాలు చేయడం సాధ్యపడుతుందా? అంటే అవుననే సమాధానం వినిపిస్తోంది. చంద్రుడి మీద తొలిసారిగా కాలుమోపిన నీల్ ఆర్మ్ స్ట్రాంగ్, బజ్ ఆల్డ్రిన్ ల్యాండ్ అయిన అపోల్ మిషన్ కు దగ్గరలోనే ఓ గుహ ఉన్నట్లు ఖగోళ పరిశోధకులు గుర్తించారు.

ఇది అంతరిక్ష యాత్రికులకు నిజంగా శుభవార్తగా పరిశోధకులు చెబుతున్నారు. ఇటాలియన్ నేతృత్వంలోని బృందం సోమవారం (జూలై 15) దీనికి సంబంధించిన వివరాలు బయటకు వెల్లడించింది. వందలాది మంది వ్యోమగాములు అందులో నివాసం ఉండటానికి అవకాశం ఉందని చెబుతోంది.

ఒక లోతైన బిలం నుంచి ఈ గుహను చేరుకోవడానికి మార్గం ఉందని వారు చెబుతున్నారు. ఇది అపోలో 11 ల్యాండింగ్ సైట్ నుంచి కేవలం 250 మైళ్ళు (400 కిమీ) దూరంలో ఉంది. ఇందులో 200 కంటే ఎక్కువ మంది వ్యోమగాములను సదుపాయాలు కలిపించే అవకాశం కనిపిస్తోంది. ఇది చంద్రుడి పై ప్రవహించిన లావా ట్యూబ్ కూలిపోవడం ద్వారా ఏర్పడినట్లు శాస్త్రవేత్తలు చెబుతున్నారు.