‘బాబ్ ఎల్ మాండెబ్’ జలసంధిని మూసివేస్తామంటున్న ఇరాన్

ఇది ప్రపంచంలో నాల్గవ అతిపెద్దదైన జలసంధి, ప్రపంచ చమురు రవాణాలో సుమారు 12 శాతం ఇక్కడి నుంచే రవాణా అవుతుంది. జలసంధిని మూసివేసే విషయాన్ని ఇరాన్ పార్లమెంట్ స్పీకర్ మహమ్మద్ బఘేర్ ఘాలిబాఫ్ ఎక్స్ లో ట్వీట్ చేశారు.

ఆయన ఒక నిగూఢమైన సందేశంలో, ప్రపంచ చమురు, ఇంధన రవాణాలో బాబ్-ఎల్-మండేబ్ జలసంధి వాటా ఎంత అని ప్రశ్నించారు. "ప్రపంచ చమురు, ఎల్ఎన్జీ, గోధుమలు, బియ్యం, ఎరువుల రవాణాలో ఎంత వాటా బాబ్-ఎల్-మండేబ్ జలసంధి గుండా వెళుతుంది? ఈ జలసంధి ద్వారా అత్యధిక రవాణా పరిమాణాలను ఏ దేశాలు, కంపెనీలు కలిగి రవాణా చేస్తున్నాయి?" అని ఘాలిబాఫ్ శనివారం (ఏప్రిల్ 4) పేర్కొన్నారు.

బాబ్ ఎల్-మండేబ్ జలసంధి ఎర్ర సముద్రాన్ని గల్ఫ్ ఆఫ్ ఏడెన్‌కు కలుపుతుంది కాబట్టి ఇది ప్రపంచ రవాణాకు కీలకమైన పాయింట్ గా మారింది. అంతేకాకుండా, ఈ జలమార్గం ఒక వైపున యెమెన్ ఉంది. యెమెన్ లో జరుగుతున్న తిరుగుబాటులో హౌతీల తరఫున ఇరాన్ ఆయుధాలు, ఇతర సాంకేతిక అండను అందిస్తోంది. ఇంతకుముందు కూడా హౌతీలు బాబ్ ఎల్ మాండెబ్ గుండా జరిగే నౌకాయాన రవాణాను అడ్డుకున్నారు.

గాజాలో ఇజ్రాయెల్ యుద్ధం ప్రారంభమైనప్పటి నుంచి, హౌతీ దళాలు ఎర్ర సముద్రం, ఏడెన్ గల్ఫ్‌లో అప్పుడప్పుడు వాణిజ్య నౌకలను లక్ష్యంగా చేసుకుంటున్నాయి. ఈ దాడులు ఇజ్రాయెల్‌కు సంబంధించిన నౌకల కోసమేనని వారు వాదిస్తున్నారు.

అమెరికా ఇప్పటికే భూతల పోరుకు దిగుతున్న సంకేతాలు పంపిస్తోంది. ఇరాన్ ఆయిల్ రవాణాకు కీలకంగా ఉన్న ఖార్గ్ ద్వీపాన్ని ఇతర కీలక చోక్ పాయింట్లను తమ ఆధీనంలోకి తీసుకుంటామనే హెచ్చరికలు పంపుతోంది. ఒకవేళ అదే జరిగితే బాబ్ ఎల్ మాండెబ్ ను మూసివేస్తామని ఇరాన్ కూడా సంకేతాలు పంపుతోంది.

"శత్రువు ఇరాన్ దీవులలో గానీ, మన భూభాగంలో మరెక్కడైనా గానీ భూతల చర్యలకు పాల్పడాలని చూసినా, లేదా పర్షియన్ గల్ఫ్, ఒమన్ సముద్రంలో నౌకాదళ కదలికలతో ఇరాన్‌కు నష్టం కలిగించాలని చూసినా మా ప్రతీకార చర్యలు తప్పవు" అని ఇస్లామిక్ రివల్యూషనరీ గార్డ్ కార్ప్స్ వర్గాలను ఉటంకిస్తూ ఇరాన్ తస్నిమ్ న్యూస్ ఏజెన్సీ నివేదించింది.

"మేము వారికి ఆకస్మికంగా ఇతర యుద్ధరంగాలను తెరుస్తాము, తద్వారా వారి చర్య వల్ల వారికి ఎలాంటి ప్రయోజనం చేకూరకపోవడమే కాకుండా, వారి నష్టాలు రెట్టింపు అవుతాయి," అని అది హెచ్చరించింది.

ఇరాన్ పాక్షిక అధికారిక ఫార్స్ న్యూస్ ఏజెన్సీ నివేదికల ప్రకారం, టెహ్రాన్‌ ఆధీనంలో ఉన్న యెమెన్ హౌతీ దళాలు, అరేబియా ద్వీపకల్పం దక్షిణ అంచున ఉన్న బాబ్ అల్-మండేబ్‌పై నియంత్రణ సాధించే లక్ష్యంతో ఈ పోరాటంలోకి ప్రవేశించవచ్చు.

ఈ చర్య అమెరికా, ఇజ్రాయెల్ బలగాల దృష్టి మళ్లించడానికి వారి బలాన్ని వేరే చోట్ల పెట్టడానికి ఉపయోగపడుతుంది. గాజాలో ఇజ్రాయెల్ సైనిక చర్యకు ప్రతిస్పందనగా హౌతీలు నౌకలను లక్ష్యంగా చేసుకోవడం ప్రారంభించిన అక్టోబర్ 2023 నుంచి, ఇరాన్ వారికి మద్దతు ఇవ్వడం ఎర్ర సముద్రంలో నౌకా రవాణాను ఇప్పటికే మార్చేసింది.