కాబూల్: ఆస్పత్రిపై పాకిస్తాన్ వైమానిక దాడి

పాకిస్తాన్- ఆఫ్ఘనిస్తాన్ మధ్య మరోసారి సాయుధ ఘర్షణలు పెరిగే అవకాశం కనిపిస్తోంది. ఈ రోజు తెల్లవారుజామున ఆఫ్ఘన్ రాజధాని కాబూల్ నగరంలో మత్తుమందు బాధితులకు చికిత్స అందించే ఆస్ఫత్రిపై పాకిస్తాన్ వైమానిక దాడి జరపడమే ఇందుకు కారణం.

ఈ దాడిలో ఆస్పత్రి భవనం పూర్తిగా ధ్వంసం కావడంతో దాదాపు 400 మంది రోగులు మృత్యువాత పడినట్లు కాబూల్ ఉప ప్రభుత్వ అధికార ప్రతినిధి ప్రకటించారు. సోమవారం రాత్రి జరిగిన దాడిలో ఆసుపత్రిలోని చాలా భాగాలు ధ్వంసమయ్యాయని హమ్దుల్లా ఫిట్రత్ 'X' లో ఒక పోస్ట్‌లో పేర్కొన్నారు.

ఇప్పటివరకు మృతుల సంఖ్య 400గా ఉందని, మరో 250 మంది గాయపడినట్లు సమాచారం అందిందని ఆయన తెలిపారు. భవనంలో చెలరేగిన మంటలను అదుపు చేసేందుకు, మృతుల మృతదేహాలను వెలికితీసేందుకు సహాయక బృందాలు ప్రయత్నిస్తున్నాయని ఫిట్రత్ చెప్పారు.

అయితే పాకిస్తాన్ మాత్రం తాము ఈ వైమానిక దాడి చేయలేదని వెల్లడించింది. సోమవారం కాబూల్‌లో, తూర్పు ఆఫ్ఘనిస్తాన్‌లో జరిపిన ఇతర దాడులలో ఏ పౌర ప్రాంతాలపైనా దాడి జరగలేదని పేర్కొంది. అయితే ఆఫ్ఘన్ మాత్రం దీనిని ఖండించింది. పాకిస్తానే ఈ దాడి చేసినట్లు ఆరోపించింది. ఈ దాడులలో మొదట 200 మందికి పైగా మరణించారని ఆ దేశ ఆరోగ్య మంత్రిత్వ శాఖ ప్రతినిధి తెలిపారు.