చైనా పర్యటన వాయిదా వేసుకున్న ట్రంప్

ట్రంప్ "ఎంతో కాలంగా ఎదురుచూస్తున్న" చైనా పర్యటనపై వైట్ హౌస్ ప్రెస్ సెక్రటరీ కరోలిన్ లీవిట్ మాట్లాడారు. అమెరికా అధ్యక్షుడు, ప్రథమ మహిళ మెలానియా, ఈ ఏడాది చివర్లో వాషింగ్టన్ డీసీలో జరిగే కార్యక్రమంలో అధ్యక్షుడు షీ జిన్ పింగ్ ఆయన సతీమణి పెంగ్ లియువాన్‌లకు కూడా ఆతిథ్యం ఇవ్వనున్నారని తెలిపారు.

ఈ పర్యటన వాయిదా వేసే విషయానికి ముందు పశ్చిమాసియాలో యుద్ధ ముగింపుపై ఏవైన చర్చలు జరిగాయా అనే ప్రశ్నపై కూడా సమాధానం ఇచ్చారు. ‘‘ఇద్దరు అధినేతలు, అధికారుల మధ్య అలాంటి ప్రస్తావన జరగలేదు’’ అని తెలిపారు.

"ప్రస్తుతం ఈ ప్రాంతమంతటా అధ్యక్షుడు ఉండటం చాలా ముఖ్యమని అధ్యక్షుడు షీ అర్థం చేసుకున్నారు. వాయిదా వేయాలన్న అభ్యర్థనను ఆయన స్పష్టంగా అర్థం చేసుకుని, అంగీకరించారు, అందుకే మేము ఈ సమావేశం నిర్వహిస్తున్నాము," అని లీవిట్ అన్నారు.

మే నెలలో జరిగే సమావేశం నాటికి యుద్ధం ముగుస్తుందా అని అడగ్గా, లీవిట్, "మళ్ళీ, నేను ఇదివరకే చెప్పినట్లుగా, మేము ఎల్లప్పుడూ సుమారు నాలుగు నుంచి ఆరు వారాలు పడుతుందని అంచనా వేస్తున్నాము," అని అన్నారు. ట్రంప్, షీ చివరిసారిగా అక్టోబర్‌లో దక్షిణ కొరియాలోని బుసాన్‌లో జరిగిన ఏపెక్ సదస్సు సందర్భంగా ప్రత్యక్షంగా కలుసుకున్నారు.

గత వారం ఓవల్ ఆఫీస్‌లో ఐరిష్ ప్రధానమంత్రి మిషెల్ మార్టిన్‌తో సమావేశమైనప్పుడు, తాను ఈ నెలాఖరుకు బదులుగా ఐదు లేదా ఆరు వారాల్లో చైనాకు వెళ్తున్నట్లు ట్రంప్ చెప్పారు. తన చైనా పర్యటనను పునఃప్రణాళిక చేస్తున్నట్లు ఆయన తెలిపారు.

"మేము చైనాతో కలిసి పనిచేస్తున్నాము, వారు దీనికి అంగీకరించారు," అని ట్రంప్ అన్నారు. "నేను అధ్యక్షుడు షీని కలవడానికి ఎదురుచూస్తున్నాను. ఆయన కూడా నన్ను కలవడానికి ఎదురుచూస్తున్నారని నేను అనుకుంటున్నాను," అని ట్రంప్ అన్నారు.

ఫిబ్రవరి 28న అమెరికా-ఇజ్రాయెల్ ఇరాన్‌పై సంయుక్తంగా దాడి చేశాయి. దీనికి ప్రతిగా ఆ ఇస్లామిక్ దేశం జరిపిన దాడితో, ఈ యుద్ధం మొత్తం గల్ఫ్ ప్రాంతానికి విస్తరించింది. అమెరికా, ఇజ్రాయెల్ జరిపిన ఈ దాడిలో ఇరాన్ సర్వోన్నత నాయకుడు అయతోల్లా అలీ ఖమేనీ మరణించారు.

ఇరాన్ అణు కార్యక్రమంపై కొత్త ఒప్పందానికి అంగీకరించేలా ట్రంప్ టెహ్రాన్‌పై ఒత్తిడి పెంచుతున్న తరుణంలో, కొన్ని రోజుల పాటు జరిగిన సన్నాహాల అనంతరం ఈ సంయుక్త దాడులు జరిగాయి. ఈ సంఘర్షణ, ముఖ్యంగా హార్ముజ్ జలసంధి మీదుగా ఉన్న ఇంధన సరఫరా గొలుసులపై కూడా తీవ్ర ప్రభావం చూపింది. ప్రస్తుతం యుద్ధ విరామంపై అమెరికా మల్లగుల్లాలు పడుతోంది.