అమెరికా యువత సైన్యంలో ఎందుకు చేరుతోంది?

"అమెరికా లాంటి దేశంలో ఉద్యోగాలు తగ్గుతాయంటే మనకెందుకు?" అనుకోవచ్చు. కానీ ప్రపంచ ఆర్థిక వ్యవస్థలో అమెరికా పాయింట్లు పడిపోతే, అందుకు ప్రతిఫలంగా రూపాయి మారక విలువ, ఇంధన ధరలు, భవిష్యత్తు ఐటీ/విదేశీ ఉద్యోగ అవకాశాలు అన్నీ ప్రభావితం అవుతాయి. ప్రముఖ ప్రైవేట్ జాబ్ డేటా సంస్థ ADP తాజా నివేదిక ప్రకారం, మే నెలలో కేవలం 37,000 కొత్త ఉద్యోగాలు మాత్రమే నమోదయ్యాయి. ఇది ఆర్థికవేత్తలు అంచనా వేసిన 1.10 లక్షల ఉద్యోగాలతో పోలిస్తే చాలా తక్కువ. ఈ గణాంకాలు ప్రభుత్వ పాలసీలపై ఒత్తిడికి దారితీశాయి.

(ADP) ఇచ్చిన తాజా గణాంకాల ప్రకారం అమెరికాలో job marketపై నీలినీడలు కమ్ముకున్నాయి. అంచనాకు దూరంగా ఉద్యోగాలు వచ్చాయి. అంటే – ఆర్థికంగా బ్రేక్ పడినట్టు. ఏడీపీ డేటా విడుదలైన వెంటనే అధ్యక్షుడు డొనాల్డ్ ట్రంప్- ఫెడ్ (FED) చైర్మన్ జెరోమ్ పవెల్ పై విరుచుకుపడ్డారు. "ఇంకా ఎంత ఆలస్యం చేయబోతావు పవెల్?" అంటూ అసహనం వ్యక్తం చేశాడు.

అమెరికా ఆర్థిక వ్యవస్థకు స్థిరత్వం, భద్రత కల్పించడంలో ఫెడ్ ప్రధాన పాత్ర పోషిస్తుంది. (ఓ రకంగా చెప్పాలంటే ఇది ఇండియాలో ఆర్బీఐ లాంటిది.)

ట్రంప్ ఏమంటారంటే “ఉద్యోగాలు తక్కువగా వస్తున్నాయి. వడ్డీ రేట్లు తగ్గించండి. అప్పులు తక్కువై, మార్కెట్ ఊపందుకుంటుంది.” కానీ... వడ్డీ తగ్గించాలంటే ద్రవ్యోల్బణం (ధరల పెరుగుదల) తగ్గాలి. కానీ ఇంకా తగ్గలేదు. అందుకే జూన్ 11న వెలువడబోయే "ధరల గణాంకాలు" (ఇన్‌ఫ్లేషన్ డేటా) అత్యంత కీలకం కాబోతున్నాయి. ధరలు తగ్గుతున్నాయా? పెరుగుతున్నాయా? అనే దాన్ని బట్టి వడ్డీ తగ్గించాలా లేదా? అనే నిర్ణయాన్ని ఫెడ్ తీసుకుంటుంది.

ఈ నేపథ్యంలో అమెరికా ఆర్థిక వ్యవస్థ వణుకుతోంది. ఓవైపు కొత్తవి లేకపోగా ఉన్న ఉద్యోగాల్లో కోత మరోవైపు సైనిక రంగంలో రిక్రూట్మెంట్ పెరగడం ఆందోళన కలిగిస్తోంది. ఆర్మీ, నేవీల్లో రిక్రూట్‌మెంట్ ఊహించని స్థాయిలో సాగుతోంది. ఆర్మీ ఈ ఏడాది లక్ష్యంగా పెట్టుకున్న 61,000 సైనికుల నియామకం ఇప్పటికే పూర్తయింది. నేవీలో కూడా దాదాపు ఇదే పరిస్థితి కనిపిస్తోంది.

దేశ జనాభాలో ఎక్కువ మంది ఎదురుచూసే సాధారణ ఉద్యోగాల్లో మాత్రం పురోగతి కనిపించడం లేదు. ట్రంప్ మొదలుపెట్టిన ట్రేడ్ వార్ ద్రవ్యోల్బణాన్ని పెంచేలా ఉందని పలువురు ఆర్థికవేత్తలు హెచ్చరిస్తున్నారు. ఇది వడ్డీ రేట్ల తగ్గింపునకు ఆటంకం కావొచ్చునని అంచనా.

మిలిటరీ, నావీ రిక్రూట్మెంట్ ను చూపి వడ్డీ రేట్లు తగ్గించమని వాదిస్తున్నారు ట్రంప్.

1997, 2012 మధ్య జన్మించిన "డిజిటల్ తరం" Gen- Z (జనరేషన్ జెడ్) యువతలో బ్లూ కాలర్ పనులపై ఆసక్తి పెరగడం, స్టూడెంట్ లోన్ మాఫీ అవసరం వంటి అంశాలు మిలిటరీ వైపు వారిని ఆకర్షిస్తున్నాయి. పైగా, టెక్ పరిశ్రమ మిలిటరీతో సంబంధాలను పునరుద్ధరించడం గమనార్హం. ఇటీవలే మెటా సంస్థ మిలిటరీ టెక్ స్టార్టప్ అండూరిల్ (Anduril Industries) భాగస్వామి అయింది.

అమెరికా ఆర్మీ, నేవీల్లో రిక్రూట్‌మెంట్ బాగుందంటే అర్థం ఆర్థిక వ్యవస్థ బలంగా ఉందని కాదు. చదువు అప్పుల (ఎడ్యుకేషన్ లోన్స్) నుంచి తప్పించుకోవడానికి యువత మిలిటరీని ఎంపిక చేసుకుంటోంది. పర్మినెంట్ ఉద్యోగం, ట్యూషన్ మాఫీ వంటి రాయితీలు ఆకర్షిస్తున్నాయి. టెక్ కంపెనీలు మిలిటరీ ప్రాజెక్ట్‌ల్లోకి మళ్లీ వస్తున్నాయంటే ట్రినియన్ల కొద్ది డబ్బు వ్యయం చేయడం. అందువల్ల, ప్రత్యామ్నాయంగా వచ్చిన భద్రతా ఎంపిక మాత్రమే.

జూన్ 11న అమెరికా లేబర్ విభాగానికి చెందిన బ్యూరో ఆఫ్ లేబర్ స్టాటిస్టిక్స్ (BLS) అత్యంత ప్రాముఖ్యమైన రెండు ద్రవ్యోల్బణ సూచికల నివేదికలను విడుదల చేయనుంది.

ఒకటి- Consumer Price Index (CPI). ఇది వినియోగదారులు ఒక నెలలో నిత్యావసర వస్తువులు, సర్వీసుల (సేవల) కోసం చెల్లించే సగటు ధరల మార్పును చూపించే లెక్కలు. వీటి ఆధారంగా 'మెయిన్‌స్ట్రీం' ద్రవ్యోల్బణాన్ని అంచనా వేస్తారు.

Core CPI అనే సబ్ ఇండెక్స్ లో ఆహారం, ఇంధనం (food & energy) ధరల ఒరవడి, ఇతర అంశాల మీద ధరల ప్రభావం వంటివి ఉంటాయి. ఇది చాలా కీలకమైంది. ఫెడ్ ఎక్కువగా గమనించే సూచిక ఇది.

రెండోది- Producer Price Index (PPI).

ఇది వ్యాపారాలు ఉత్పత్తుల కోసం చెల్లించే ఖర్చుల మార్పును సూచిస్తుంది. ఇది CPIకి ముందు దశలో ఉండే సూచిక.

ఈ రెండూ ద్రవ్యోల్బణం ఎంత ఉంది?, ఇది పెరుగుతోందా?, తగ్గుతోందా? అనే విషయాల్లో కీలకంగా మారతాయి.

ఫెడరల్ రిజర్వ్ (Fed) వడ్డీ రేట్లపై నిర్ణయం తీసుకునేటప్పుడు ఇన్ఫ్లేషన్ లక్ష్యాలు (Inflation Targeting) అనేదే కీలకం. Fed అంచనా ప్రకారం- సంవత్సరానికి సగటున 2% ద్రవ్యోల్బణంగా ఉండవచ్చు.

ఇన్ఫ్లేషన్ ఎక్కువగా ఉంటే- ఫెడ్ వడ్డీ రేట్లను ఎక్కువగా ఉంచుతుంది లేదా పెంచుతుంది. దీని ద్వారా ఖర్చులు తగ్గుతాయి, డిమాండ్ తగ్గుతుంది, ద్రవ్యోల్బణం క్రమంగా తగ్గుతుందనేది ఫెడ్ విశ్లేషణ.

ఇన్ఫ్లేషన్ తగ్గుతున్నప్పుడు - వడ్డీ రేట్లను తగ్గించవచ్చు, దీని వల్ల అప్పులు తక్కువకు వస్తాయి. వ్యయం పెరుగుతుంది. ఆర్థికాభివృద్ధికి ఊతం లభిస్తుంది.

అందువల్లే జూన్ 11న వెలువడే CPI/PPI గణాంకాలు ఫెడ్- జూన్ 18న నిర్ణయించే వడ్డీ రేట్ల నిర్ణయానికి కీలకం కాబోతున్నాయి.

ఇన్ఫ్లేషన్ ఇంకా అధికంగా ఉంటే, ఫెడ్ వడ్డీ తగ్గించే అవకాశం తక్కువ. జాబ్ మార్కెట్ కాస్త బలహీనంగా ఉన్నా, CPI గణాంకాలు ఇంకా అధికంగా ఉంటే వడ్డీ రేట్లు అలాగే కొనసాగుతాయి. ఇంకొంచెం తగ్గితే మాత్రం ఫెడ్ వడ్డీ తగ్గింపునకు అవకాశం ఉంది.

ఈ నేపథ్యంలో ద్రవ్యోల్బణం పెరిగినా వడ్డీ రేట్లు తగ్గించవచ్చుననే ట్రంప్ వాదన నిలుస్తుందో లేదో వేచి చూడాలి. ట్రంప్ వాదన ప్రకారం ద్రవ్యోల్బణం పెరిగినప్పుడు – డిమాండ్ డ్రివెన్ (Demand-pull inflation) అయితే ప్రజల చేతిలో డబ్బు ఎక్కువగా ఉండి ఎక్కువగా ఖర్చు చేస్తారు. దాంతో బిజినెస్‌లు ఎక్కువ ఉత్పత్తి చేయాల్సి వస్తుంది. ఇందుకోసం ఎక్కువ మంది ఉద్యోగుల అవసరం ఉంటుంది. తద్వార ఉద్యోగ అవకాశాలు పెరుగుతాయి.

ఇది సాధారణంగా ఆర్థిక వృద్ధి దశలో కనిపించే పరిణామం.

కానీ ద్రవ్యోల్బణం వేతనాల కన్నా వేగంగా పెరిగితే (Wage-price mismatch)- వాస్తవ వేతనాలు (real wages) తగ్గిపోతాయి. అంటే జీతాలు పెరగకపోయినా ధరలు పెరుగుతాయి. దీంతో ప్రజల కొనుగోలు శక్తి తగ్గిపోతుంది. డిమాండ్ పడిపోతుంది. బిజినెస్‌లు ఖర్చులు తగ్గించుకోవడానికి వర్కింగ్ అవర్స్ కట్ చేస్తాయి లేదా ఉద్యోగులను తొలగిస్తాయి. ఇక్కడ ఉద్యోగాలు తగ్గే ప్రమాదం ఉంటుంది.

అందుకే ఫెడరల్ రిజర్వ్ స్పందన (Fed's reaction to inflation) కోసం అందరూ ఎదురుచూస్తుంటారు. ద్రవ్యోల్బణం అధికంగా ఉంటే, Fed వడ్డీ రేట్లను పెంచుతుంది.