తెలంగాణలో రేపు సెలవు, ఎందుకంటే..

తెలంగాణలో మున్సిపల్ ఎన్నికల పోలింగ్‌కు ముందు ప్రభుత్వం కీలక నిర్ణయం తీసుకుంది. బుధవారం జరిగే పోలింగ్ రోజును అధికారిక సెలవుగా ప్రకటించింది. మంగళవారం రాష్ట్ర ప్రభుత్వం ఈ మేరకు ఉత్తర్వులు జారీ చేసింది. ఎన్నికలు జరిగే మున్సిపాలిటీలు, మున్సిపల్ కార్పొరేషన్ల పరిధిలో ఈ సెలవు వర్తిస్తుందని స్పష్టం చేసింది.

ఆ పరిధిలోని ఫ్యాక్టరీలు, షాపులు, పరిశ్రమలకు సెలవు అమలు కానుంది. అలాగే అక్కడ పనిచేసే ఉద్యోగులు, కార్మికులకు కూడా సెలవు వర్తిస్తుంది. ఓటు హక్కు వినియోగించుకునేందుకు వీలుగా ఈ నిర్ణయం తీసుకున్నట్టు ప్రభుత్వం తెలిపింది.

తెలంగాణ వ్యాప్తంగా ఒకే విడతలో మున్సిపల్ ఎన్నికలు జరగనున్నాయి. రాష్ట్రంలోని 116 మున్సిపాలిటీలు, 7 మున్సిపల్ కార్పొరేషన్లకు పోలింగ్ జరుగుతుంది. ఈ ఎన్నికల్లో మొత్తం 12,930 మంది అభ్యర్థులు బరిలో ఉన్నారు. పోలింగ్ కోసం 8,203 కేంద్రాలు ఏర్పాటు చేశారు. 16,301 బాలెట్ బాక్సులను సిద్ధం చేసినట్టు ఎన్నికల సంఘం వెల్లడించింది.

ఫిబ్రవరి 11న ఉదయం 7 గంటల నుంచి సాయంత్రం 5 గంటల వరకు పోలింగ్ కొనసాగనుంది. ఫిబ్రవరి 13న ఫలితాలను ప్రకటించనున్నారు. పోలింగ్ రోజు మద్యం దుకాణాలు మూసివేయనున్నారు. కట్టుదిట్టమైన భద్రతా ఏర్పాట్లు చేసినట్టు అధికారులు తెలిపారు. ఓటర్లు పెద్ద సంఖ్యలో పాల్గొనాలని ఎన్నికల సంఘం కోరుతోంది.