ఘోర ప్రమాదం.. ఇద్దరు బీటెక్ విద్యార్థులు మృతి

హైదరాబాద్‌లోని హస్తినాపురం వద్ద జరిగిన రోడ్డు ప్రమాదం తీవ్ర విషాదాన్ని మిగిల్చింది. బుధవారం ఉదయం జరిగిన ఈ ఘటనలో ఇద్దరు బీటెక్ విద్యార్థులు ప్రాణాలు కోల్పోయారు. వేగంగా వచ్చిన కారు వెనుక నుంచి ఢీకొట్టడం ఈ ప్రమాదానికి కారణమైంది. వివరాల ప్రకారం, మహావీర్ ఇంజినీరింగ్ కాలేజీకి చెందిన రెండో సంవత్సరం ఈసీఈ విద్యార్థులు కే. శివ (19), సందీప్ జోయెల్ (19) ద్విచక్ర వాహనంపై ప్రయాణిస్తున్నారు. ఈ సమయంలో వెనుక నుంచి అతివేగంగా వచ్చిన హోండా సిటీ కారు వారిని ఢీకొట్టింది. అదే సమయంలో రోడ్డుపై నడుస్తున్న శ్రీధర్ (23) అనే యువకుడిని కూడా కారు ఢీకొట్టింది.

ఢీకొన్న తర్వాత కారు అదుపుతప్పి పలుమార్లు తిరుగుతూ రోడ్డుపై పల్టీలు కొట్టింది. చివరకు తలకిందులుగా ఆగిపోయింది. ఈ ప్రమాదంలో ఇద్దరు విద్యార్థులు అక్కడికక్కడే మృతి చెందారు. నడుచుకుంటూ వెళ్తున్న శ్రీధర్ తీవ్రంగా గాయపడి ప్రైవేట్ ఆసుపత్రిలో చికిత్స పొందుతున్నాడు. ఈ ఘటనపై సమాచారం అందుకున్న పోలీసులు వెంటనే ఘటనాస్థలానికి చేరుకున్నారు. కేసు నమోదు చేసి దర్యాప్తు చేపట్టారు. ప్రమాదానికి కారణమైన కారు డ్రైవర్‌ను పోలీసులు అరెస్ట్ చేశారు. ఈ ఘటనతో ప్రాంతంలో తీవ్ర ఆందోళన నెలకొంది. పోలీసులు దర్యాప్తు కొనసాగిస్తున్నారు.