తెలంగాణలో 37 ఆటో టెస్టింగ్ స్టేషన్లు: మంత్రి పొన్నం

తెలంగాణలో రవాణా శాఖలో కీలక మార్పులకు ప్రభుత్వం సిద్ధమైంది. రాష్ట్రవ్యాప్తంగా 37 ఆటోమేటిక్ టెస్టింగ్ స్టేషన్ల ఏర్పాటు ప్రక్రియ తుదిదశకు చేరినట్లు మంత్రి పొన్నం ప్రభాకర్ తెలిపారు. శాసన మండలిలో రవాణా శాఖ అభివృద్ధిపై మంత్రి సుదీర్ఘంగా వివరించారు. ఎమ్మెల్సీ నవీన్ కుమార్ అడిగిన ప్రశ్నకు సమాధానంగా ప్రతి జిల్లా కేంద్రంలో ఒక్కో ఆటోమేటిక్ టెస్టింగ్ స్టేషన్ ఏర్పాటు చేయాలని ప్రతిపాదించినట్లు చెప్పారు. 2024 సెప్టెంబర్ 30న జారీ చేసిన జీవో ద్వారా పరిపాలన అనుమతులు ఇచ్చినట్లు వెల్లడించారు.

ఈ స్టేషన్లు పూర్తిగా ప్రభుత్వ ఆధ్వర్యంలోనే నడుస్తాయని, ప్రైవేట్ భాగస్వామ్యం ఉండదని స్పష్టం చేశారు. స్థలాల లభ్యతను బట్టి మొదటి దశలో 15, రెండో దశలో 22 స్టేషన్లు ఏర్పాటు చేయాలని ప్రణాళిక రూపొందించినట్లు తెలిపారు. పర్యావరణ పరిరక్షణ దృష్ట్యా పాత వాహనాలపై గ్రీన్ టాక్స్ వసూలు చేస్తున్నట్లు చెప్పారు. 2024-25లో రూ.68.11 కోట్లు, 2025-26లో రూ.71.14 కోట్లు వసూలైనట్లు వివరించారు. అదే సమయంలో ఎలక్ట్రిక్ వాహనాలకు 100 శాతం పన్ను మినహాయింపులు ఇస్తున్నట్లు తెలిపారు.

స్క్రాపేజీ పాలసీని ప్రభుత్వం సమర్థంగా అమలు చేస్తోందని పేర్కొన్నారు. రాష్ట్రంలో మూడు వాహన స్క్రాపింగ్ కేంద్రాలు ఉన్నాయని, పాత వాహనాలను స్క్రాప్ చేయడానికి పన్ను రాయితీలు, లయబిలిటీ మాఫీ వంటి ప్రోత్సాహకాలు అందిస్తున్నట్లు తెలిపారు. డ్రైవింగ్ లైసెన్స్‌లలో పారదర్శకత కోసం ఆటోమేటిక్ డ్రైవింగ్ టెస్టింగ్ విధానం తీసుకువస్తున్నట్లు చెప్పారు. కొత్త టెక్నాలజీ వినియోగంతో సేవలు మెరుగుపడతాయని పేర్కొన్నారు.

వాహన్ సారథి వ్యవస్థలో రాష్ట్రం ఇటీవల చేరినట్లు వివరించారు. కేంద్ర అనుమతులతో మాన్యువల్ టెస్టింగ్, ఎన్ఓసీ ప్రక్రియల్లో ఇబ్బందులు లేకుండా చర్యలు తీసుకున్నట్లు తెలిపారు. ఈ నెల 23 నుంచి వాహన్‌లో చేరనున్నట్లు చెప్పారు. రవాణా శాఖలో ఇప్పటికే 50కి పైగా సంస్కరణలు అమలు చేసినట్లు మంత్రి పేర్కొన్నారు. షోరూమ్‌లలోనే వాహన రిజిస్ట్రేషన్ ప్రారంభించి ప్రజలకు సౌకర్యాలు కల్పిస్తున్నట్లు తెలిపారు.

రోడ్డు భద్రతపై ప్రత్యేక దృష్టి పెట్టినట్లు చెప్పారు. డ్రైవర్లకు శిక్షణను పెంచుతున్నామని, ఆర్టీసీ డ్రైవర్లకు ఆరు నెలలపాటు శిక్షణ ఇచ్చి నియామకం చేస్తున్నట్లు వివరించారు. మొత్తానికి రవాణా శాఖలో మార్పులు దశలవారీగా అమలు అవుతున్న నేపథ్యంలో, సేవలు మరింత మెరుగుపడే అవకాశాలు కనిపిస్తున్నాయి.