మిడిల్ క్లాస్ కు తొందర్లో చవకగా ఇళ్లు... రేవంత్ రెడ్డి సర్కార్ కసరత్తు

పెరిగిన భూమి ధరల ప్రభావాన్ని తగ్గిస్తూ మధ్యతరగతికి ఇళ్లు అందుబాటులోకి తేవాలని రేవంత్ రెడ్డి ప్రభుత్వం కొత్త హౌసింగ్ విధానాన్ని త్వరలో ప్రకటించనుంది

పెరిగిన భూమి ధరల నడుమ ఇళ్ళ కల దూరమవుతున్న వేళ, ప్రభుత్వం కీలక అడుగు వేయబోతోంది. అందుబాటు ధరల్లో ఇళ్ల కోసం కొత్త విధానం మార్చి చివర్లో ప్రకటించే అవకాశం ఉందన్నది తాజా సమాచారం.

పట్టణాల్లో భూముల వేలం విధానాలు ప్రభుత్వాలు మారినా మారలేదన్న విమర్శలు ఉన్నాయి. భూముల అమ్మకాలనే అభివృద్ధిగా చూపడం వల్ల ధరలు ఎప్పటికప్పుడు పెరుగుతున్నాయి. గతంలో ఆంధ్రలో భూమి అమ్మి తెలంగాణలో ఎక్కువ భూమి కొనగలిగే పరిస్థితి ఉండేదని, రాష్ట్ర ఏర్పాటుకు తర్వాత అది మారిపోయిందని నేతలు పలుమార్లు ప్రస్తావించారు. తాజాగా కూడా భూముల ధరల తేడాలపై రాజకీయ వర్గాల్లో చర్చ జరిగింది.

భూములు అమ్మి ఆదాయ లోటు భర్తీ చేసే విధానం కొనసాగడంతో ధరలు తగ్గడం లేదని ప్రభుత్వం అంచనా వేసింది. ఈ పరిస్థితుల్లో రాబోయే రాష్ట్ర బడ్జెట్ నేపథ్యంలో మధ్యతరగతి, దిగువ మధ్యతరగతికి ఇళ్లు అందుబాటులోకి తేవడానికి విధాన రూపకల్పన జరుగుతోందని అధికార వర్గాలు తెలిపాయి. ప్రైవేట్ రంగంతో కలిసి ప్రాజెక్టులు చేపట్టాలన్న ఆలోచనలో ప్రభుత్వం ఉంది.

ఇళ్ల అవసరాలు పెరుగుతున్నా, ప్రభుత్వ సంస్థల నిర్మాణ వేగం తగ్గడంతో సమస్య సంక్లిష్టమైంది. దీనికి ప్రధాన కారణం భూముల ధరలేనని గుర్తించిన ప్రభుత్వం నష్ట నివారణ చర్యలపై దృష్టి పెట్టింది.

తెలంగాణ హౌసింగ్ కార్పొరేషన్ తొలిసారిగా అందుబాటు ఇళ్ల కోసం ప్రత్యేక విధానం రూపొందిస్తోందని ఎండీ వి.పి. గౌతం తెలిపారు. విధానం తుది దశలో ఉందని, మార్చిలో ప్రకటన ఉంటుందని ఆయన వెల్లడించారు. హైదరాబాద్‌లో పెద్ద రియల్ ఎస్టేట్ కంపెనీలు ఉన్నా ధరలు తగ్గకపోవడానికి భూమి ధరలే కారణమని, నిర్మాణ ఖర్చులు అంతగా పెరగలేదని ఆయన వివరించారు. ప్రీమియం ఇళ్లకే ప్రాధాన్యం పెరిగిందని, సాధారణ ఇళ్లకు అవసరమైన వాతావరణం కల్పించడమే లక్ష్యమని చెప్పారు. ఇది ఈజ్ ఆఫ్ డూయింగ్ బిజినెస్‌లో భాగమని స్పష్టం చేశారు.

ఇటీవలి గ్లోబల్ సమ్మిట్ చర్చల్లో, మౌలిక సదుపాయాలతో కూడిన లేఔట్లు కేటాయిస్తే తక్కువ ధరల్లో ఇళ్లు నిర్మించగలమని రియల్టర్లు ప్రభుత్వానికి తెలియజేశారని గౌతం తెలిపారు. భూమి, సౌకర్యాల కోసం పడే రెండేళ్ల ఆలస్యం తగ్గితే ధరలు తగ్గుతాయని వారు సూచించారు.

తెలంగాణ రాష్ట్ర పారిశ్రామిక మౌలిక సదుపాయాల సంస్థ (TGIIC; Telangana Industrial Infrastructure Corporation) తరహాలోనే ఈ రంగానికీ మద్దతు ఇచ్చే ఆలోచన ఉందని ప్రభుత్వం తెలిపింది. హైదరాబాద్ నగర మధ్యలో కూడా ఎక్కువ ఇళ్లు అందుబాటులోకి రావడానికి అధిక అంతస్తుల అనుమతులు ఇవ్వాలన్న ప్రతిపాదన ఉంది. పాత హౌసింగ్ బోర్డు కాలనీల్లోనూ ఇదే విధానం అమలు చేసే ఆలోచన సాగుతోంది. లక్ష్యం ఒకటేనని, ఎక్కువ ఇళ్లు అందుబాటులోకి తెచ్చి ధరలను తగ్గించడమేనని అధికారులు చెబుతున్నారు.

హౌసింగ్ బోర్డు పరిధిలోని 700 ఎకరాల్లో ఎల్ఐజీ (LIG; low income group); (MIG; middle income group), హెచ్ఐజీ (HIG, high income group) ఇళ్లు నిర్మించేందుకు ప్రణాళిక ఉంది. హెచ్ఐజీ ఇళ్లను మార్కెట్ రేటుకు విక్రయించి వచ్చిన లాభాలతో LIG, ఆర్థికంగా వెనుకబడిన వర్గాలకు తక్కువ ధరల్లో లేదా ఉచితంగా ఇళ్లు అందించాలన్న యోచన కొనసాగుతోంది.

రియల్ ఎస్టేట్ రంగానికి చెందిన ఎక్స్పర్ట్ జాన్సన్ కొయ్యడ ప్రకారం, పెద్ద బిల్డర్లు పరిమిత శాతం కస్టమర్లకే ఇళ్లు నిర్మిస్తున్నారు. గతంలో చిన్న పరిమాణ ఇళ్ల నిర్మాణం ఉండేదని, తర్వాత ఎన్‌ఆర్‌ఐల్ని దృష్టిలో పెట్టుకుని పెద్ద ఫ్లాట్ల వైపు మళ్లారని ఆయన విశ్లేషించారు. భూమి ధరలు పెరగడంతో లాభాల కోసం ఖరీదైన అపార్ట్‌మెంట్లకే ప్రాధాన్యం ఇచ్చారని తెలిపారు.

ప్రస్తుతం మార్కెట్‌లో లగ్జరీ, అల్ట్రా లగ్జరీ, ఉబర్ లగ్జరీ ఇళ్ల విక్రయాలు పెరిగాయి. పోటీ పెరగడంతో అమ్మకాలు తగ్గాయని అంచనాలు చెబుతున్నాయి. సుమారు లక్షన్నర ఇళ్లు అమ్ముడుపోకుండా ఉన్నట్టు సమాచారం. ఏటా 25 నుంచి 30 వేల ఇళ్లు అమ్ముడవుతాయని, ప్రస్తుత నిల్వ తరిగేందుకు ఇంకా మూడు సంవత్సరాలు పట్టొచ్చని రంగ వర్గాలు చెబుతున్నాయి.

గత బీఆర్ఎస్ ప్రభుత్వంలో హౌసింగ్ డిపార్ట్‌మెంట్ రద్దయ్యింది. ఉద్యోగులను ఇతర శాఖలకు బదిలీ చేశారు. కాంగ్రెస్ ప్రభుత్వం వచ్చాక వారిని తిరిగి తీసుకొచ్చి ఇందిరమ్మ ఇళ్ల నిర్మాణాన్ని ప్రారంభించింది. గతంలో పెండింగ్‌లో ఉన్న బకాయీలను వసూలు చేసి, భూముల అమ్మకాల ద్వారా వచ్చిన నిధులను ఇళ్ల నిర్మాణానికే వినియోగించనున్నట్టు అధికారులు తెలిపారు.

ప్రస్తుతం ఇందిరమ్మ ఇళ్ళకు ఒక్కో ఇంటికి రాష్ట్రం ఐదు లక్షలు ఖర్చు చేస్తోంది. కేంద్రం పట్టణ, గ్రామీణ ప్రాంతాల్లో వేర్వేరు సహాయం అందిస్తోంది.

ఇటీవల కేంద్ర బడ్జెట్ సందర్భంగా క్రెడాయ్ తెలంగాణ రాష్ట్ర అధ్యక్షుడు కె. ఇంద్ర సేనా రెడ్డి మౌలిక సదుపాయాల పెట్టుబడులను స్వాగతించారు. అందుబాటులో ఇళ్ల నిర్మాణం కేవలం సంక్షేమం కాదని, ఆర్థిక అవసరమని వారు పేర్కొన్నారు.

క్రెడాయ్ హైదరాబాద్ ఉపాధ్యక్షుడు జైదీప్ రెడ్డి ‘ఫెడరల్’ తో మాట్లాడుతూ అందుబాటు ధరలో ఇళ్ళ నిర్వచనం రు. 45 లక్షల నుంచి రు. 90 లక్షలకు పెంచాలన్నారు. “అందుబాటు ధరల ఇళ్ళకు ఇచ్చే నిర్వచనాన్ని మారిస్తే కొనుగోలుదారులకు పన్ను మినహాయింపులు లభిస్తాయి. క్రెడాయి అఖిల భారత అసోసియేషన్ ఇప్పటికే ఈ విజ్ఞప్తిని కేంద్రం దృష్టికి తీసుకెళ్లింది. ప్రభుత్వం దీని పై ఎటువంటి నిర్ణయం తీసుకోకపోవటం బాధాకరం. మా వ్యాపారానికి పరిశ్రమ స్థాయిని కల్పిస్తే పరపతి, గుర్తింపు లభిస్తాయి. జాతీయ బ్యాంకుల నుండి సులభంగా లోన్ లు దక్కుతాయి. ప్రస్తుతం లోన్లు ఇవ్వటానికి హామీగా కోరుతున్న అప్పుకు ఎన్నో రెట్లు ఆస్తులు పెట్టమని షరతు పెడుతున్నారు,” అని ఆవేదన వ్యక్తం చేశారు.

మొత్తంగా చూస్తే, భూమి ధరల ప్రభావాన్ని తగ్గిస్తూ ఇళ్ళను ప్రజలకు చేరువ చేయాలన్న లక్ష్యంతో ప్రభుత్వం ముందుకు సాగుతోంది. రాబోయే విధాన ప్రకటనతో పరిస్థితుల్లో మార్పు వస్తుందన్న ఆశతో ప్రజలు ఎదురుచూస్తున్నారు.