స్కూటీపై మహబూబ్నగర్లో పొన్నం హంగామా..!
హెల్మెట్ అవగాహన ర్యాలీ, ట్రాఫిక్ పార్క్ ప్రారంభం, ప్రమాదాల నివారణకు ప్రమాణం, విద్యార్థుల పాల్గొనడం.
మహబూబ్నగర్లోని రోడ్లపై మంత్రి పొన్నం ప్రభాకర్.. స్కూటీ నడుపుతూ కాస్తంత హడావుడీ చేశారు. ట్రాఫిక్ రూల్స్, డ్రైవింగ్ చేసేటప్పుడు పాటించాల్సిన భద్రతపై అవగాహన కల్పించడం కోసం మంత్రులు పొన్నం ప్రభాకర్, వాకిటి శ్రీహరి స్కూటీపై ప్రయాణించారు. మహబూబ్నగర్లో రోడ్డు భద్రతపై భారీ అవగాహన కార్యక్రమం జరిగింది. ‘అరైవ్ అలైవ్’ పేరిట నిర్వహించారు. ప్రజాపాలన ప్రగతి కింద 99 రోజుల కార్యాచరణలో భాగంగా ఈ కార్యక్రమాన్ని నిర్వహించారు. మంత్రులు పొన్నం ప్రభాకర్, వాకిటి శ్రీహరి హాజరై కార్యక్రమాన్ని ప్రారంభించారు.
పంచవటి పాఠశాలలో పిల్లల కోసం ప్రత్యేక ట్రాఫిక్ అవగాహన పార్క్ను ప్రారంభించారు. ఇందులో ట్రాఫిక్ సిగ్నల్స్, జీబ్రా క్రాసింగ్, పాఠశాల మరియు ఆసుపత్రి ప్రాంతాలు, యూ-టర్న్లపై విద్యార్థులకు అవగాహన కల్పించేలా ఏర్పాట్లు చేసినట్లు తెలిపారు. మహబూబ్నగర్ డిగ్రీ కాలేజీ నుంచి పంచవటి స్కూల్ వరకు బైక్ ర్యాలీ నిర్వహించారు. హెల్మెట్ వినియోగంపై అవగాహన కల్పించేందుకు ఈ ర్యాలీలో వాహనదారులు పాల్గొన్నారు. రోడ్డు భద్రతలో భాగంగా హెల్త్ క్యాంప్, ఐ క్యాంప్ నిర్వహించారు. సీపీఆర్పై ప్రదర్శనలు కూడా నిర్వహించినట్లు సమాచారం.
విద్యార్థులు, మంత్రులు కలిసి మానవ హారం ఏర్పాటు చేసి ట్రాఫిక్ నియమాలు పాటించాలని ప్రతిజ్ఞ చేశారు. సాంస్కృతిక కార్యక్రమాల ద్వారా రోడ్డు ప్రమాదాల వల్ల కుటుంబాలపై పడే ప్రభావాన్ని విద్యార్థులు ప్రదర్శించారు. పొన్నం ప్రభాకర్ విద్యార్థులతో రోడ్డు భద్రత ప్రమాణం చేయించినట్లు తెలిసింది. ప్రమాదాలు నివారించడంలో ప్రతి ఒక్కరి బాధ్యత ఉందని ఆయన సూచించారు. గత వారం నుంచి ట్రాన్స్పోర్ట్, పోలీస్ శాఖలు కలిసి ఈ అవగాహన కార్యక్రమాలు నిర్వహిస్తున్నాయని మంత్రి తెలిపారు. ఇటీవల జరిగిన ప్రమాదాల్లో 17 మంది మరణించిన ఘటనలను ప్రస్తావిస్తూ ఆందోళన వ్యక్తం చేసినట్లు సమాచారం.
ప్రమాదాల్లో కుటుంబాలపై తీవ్ర ప్రభావం పడుతుందని, ప్రజల భాగస్వామ్యం చాలా అవసరమని ఆయన పేర్కొన్నారు. తెలంగాణను ప్రమాద రహిత రాష్ట్రంగా మార్చేందుకు అందరూ కలిసి కృషి చేయాలని పిలుపునిచ్చారు. రోడ్డు ప్రమాద బాధితులను గోల్డెన్ అవర్లో ఆసుపత్రికి చేర్చే వారికి రూ.25 వేల బహుమతి అందించే ‘రాహవీర్ అవార్డు’ గురించి వివరించారు. ఈ అవార్డు సంవత్సరానికి ఐదు సార్లు పొందవచ్చని తెలిపారు. యునిసెఫ్ సహకారంతో ట్రాఫిక్ అవగాహన పార్కులు ఏర్పాటు చేస్తున్నట్లు చెప్పారు. విద్యా సంవత్సరం ప్రారంభంలో విద్యార్థులు ట్రాఫిక్ నియమాలు పాటిస్తామని లిఖితపూర్వకంగా ఇవ్వాలని ప్రోత్సహిస్తున్నట్లు తెలిపారు. జిల్లా కలెక్టర్ ఆధ్వర్యంలో ప్రతి నెల రోడ్డు భద్రత కమిటీ సమావేశాలు నిర్వహిస్తున్నట్లు వెల్లడించారు. ప్రతి పౌరుడు బాధ్యతగా ట్రాఫిక్ నియమాలు పాటించాలని మంత్రి సూచించారు.
