చందమామని పల్కరించి వచ్చిన నాసా రోదసి వీరులు

చంద్రుని చుట్టి రావడానికి వెళ్లిన ఈ నలుగురు వ్యోమగాములు అంతరిక్షంలో మొత్తం 9 రోజుల 13 గంటల 15 సెకన్ల పాటు గడిపారు. ఆకాశంలో వారు గడిపిన ప్రతి సెకను ఎంత ఉత్కంఠభరితంగా సాగింది. చివరి ఘట్టం మరీ ఉత్కంఠ రేపింది. పసిఫిక్ మహాసముద్రంలో ఓరియన్ వ్యోమనౌక సురక్షితంగా ల్యాండ్ కావడంతో యావత్ ప్రపంచం ఒక్కసారిగా ఊపిరి పీల్చుకుంది.

తిరుగు ప్రయాణంలో...

తిరుగు ప్రయాణంలో భూ వాతావరణంలోకి ప్రవేశించేటప్పుడు ఓరియన్ నౌక అసలైన అగ్నిపరీక్షను ఎదుర్కొంది.కొన్ని వేల డిగ్రీల ఉష్ణోగ్రతను తట్టుకుంటూ, గంటకు వేల కిలోమీటర్ల వేగంతో దూసుకొచ్చి పారాచూట్ల సాయంతో సముద్రపు అలలపై వాలింది.

ఇక చంద్రుడిపై అడుగేయడమే మిగిలింది...

ఈ ఆర్టిమిస్ మిషన్ కేవలం ఒక చంద్రదర్శన యాత్ర మాత్రమే కాదు. మనిషి భవిష్యత్తులో చంద్రుడిపై ఇళ్లు కట్టుకోవడానికి, అక్కడి నుంచి అంగారక గ్రహానికి,సుదూరవిశ్వంలోకి పయనం కావడానికి బాట వేస్తుంది.

మిషన్‌ ముఖ్య విశేషాలు..

ఓరియన్ వ్యోమనౌక సముద్రంలో దిగిన తర్వాత, వ్యోమగాములను ఒక్కొక్కరిని బయటకు తీసి, హెలికాప్టర్ ద్వారా యూఎస్ నేవీ నౌకకు తరలించారు.

భూ వాతావరణంలోకి ప్రవేశించడం క్లిష్టంగా మారింది. విపరీతమైన వేడి నుండి వ్యోమగాములను రక్షించే హీట్ షీల్డ్ రూపకల్పనలో కొన్ని లోపాలు గుర్తించారు. ఫలితంగా వారి భద్రతకోసం వ్యోమనౌక ప్రయాణ మార్గంలో మార్పులు చేసింది. ఓరియన్ క్యాప్సూల్ ని వేగంగా, నిటారుగా ఉన్న కోణంలో భూమి మీదకు పంపారు.