మున్సిపల్ ఎన్నికల్లో బీఆర్‌ఎస్‌ వీరోచిత పోరాటం: కాంగ్రెస్ అక్రమాలపై కేటీఆర్ ఫైర్!

తెలంగాణ మున్సిపల్ ఎన్నికల ఫలితాలపై భారత రాష్ట్ర సమితి కార్యనిర్వాహక అధ్యక్షుడు కేటీఆర్ కీలక వ్యాఖ్యలు చేశారు. ఎన్నికల్లో బీఆర్‌ఎస్ కార్యకర్తలు వీరోచితంగా పోరాడారని, అధికార పార్టీ ఎన్ని అక్రమాలకు పాల్పడినా 30 శాతానికి పైగా వార్డుల్లో తమ పార్టీ అభ్యర్థులు విజయం సాధించారని ఆయన వెల్లడించారు. 15 మున్సిపాలిటీల్లో బీఆర్‌ఎస్ స్పష్టమైన మెజార్టీ సాధించగా, మరో 30కి పైగా చోట్ల హంగ్ ఏర్పడిందని, అక్కడ కూడా మేయర్, ఛైర్మన్ పీఠాలను కైవసం చేసుకునే అవకాశం ఉందని ధీమా వ్యక్తం చేశారు.

ఎన్నికల ప్రక్రియలో కాంగ్రెస్ పార్టీ అధికార యంత్రాంగాన్ని అడ్డం పెట్టుకుని అక్రమాలకు పాల్పడిందని కేటీఆర్ విమర్శించారు. గద్వాల, వర్ధన్నపేట వంటి చోట్ల తమ అభ్యర్థులు గెలిచినప్పటికీ, కాంగ్రెస్ నేతలు గెలిచే వరకు పదేపదే రీకౌంటింగ్ చేయించారని ఆరోపించారు. మద్యం, డబ్బు పంపిణీతో పాటు పోలీసుల ద్వారా బెదిరింపులకు పాల్పడి ఫలితాలను తారుమారు చేసే ప్రయత్నం చేశారని మండిపడ్డారు. 2020లో బీఆర్‌ఎస్ అధికారంలో ఉన్నప్పుడు 130 మున్సిపాలిటీల్లో 122 గెలిచిన విషయాన్ని గుర్తు చేస్తూ.. ప్రస్తుత ఫలితాలను చూసి ప్రజలు కాంగ్రెస్ పాలనపై ఎంత ఆగ్రహంతో ఉన్నారో అర్థం చేసుకోవచ్చని అన్నారు.

సింగరేణి బొగ్గు కుంభకోణం నేపథ్యంలో అక్రమాలను అడ్డుకునేందుకు లౌకిక పార్టీలతో కలిసి పని చేస్తామని కేటీఆర్ ప్రకటించారు. కొత్తగూడెం కార్పొరేషన్‌లో కాంగ్రెస్, బీజేపీలను ఎదుర్కొనేందుకు సీపీఐకి మద్దతు ఇస్తామని, ఈ మేరకు ఆ పార్టీ రాష్ట్ర కార్యదర్శి కూనంనేని సాంబశివరావుకు ఫోన్ చేసి తెలిపినట్లు చెప్పారు. సింగరేణిని దోచుకుంటున్న జాతీయ పార్టీలను ఎండగట్టడమే తమ లక్ష్యమని స్పష్టం చేశారు.

పార్టీ ఫిరాయించిన ఎమ్మెల్యేల విషయంలో రేవంత్ రెడ్డికి కేటీఆర్ సవాల్ విసిరారు. ప్రభుత్వ పాలనపై అంత నమ్మకం ఉంటే, ఫిరాయింపు ఎమ్మెల్యేలతో రాజీనామా చేయించి ఉప ఎన్నికలకు రావాలని డిమాండ్ చేశారు. భవిష్యత్తులో తటస్థులను కలుపుకొని, మరింత పటిష్టమైన కార్యాచరణతో ముందుకు సాగుతామని పేర్కొన్నారు. కేసీఆర్ నాయకత్వమే రాష్ట్రానికి శ్రీరామరక్ష అని ప్రజలు మళ్లీ నమ్మారని, త్వరలో జరగబోయే జిల్లా పరిషత్, కార్పొరేషన్ ఎన్నికల్లో సత్తా చాటుతామని ధీమా వ్యక్తం చేశారు.