బడ్జెట్ రాజ్యాంగ స్ఫూర్తికి విరుద్ధం: శ్రీధర్ బాబు విమర్శలు

బడ్జెట్ రాజ్యాంగ స్ఫూర్తికి విరుద్ధంగా ఉందని రాష్ట్ర ఐటి, పరిశ్రమల శాఖ మంత్రి దుద్దిళ్ల శ్రీధర్ బాబు తీవ్ర విమర్శలు చేశారు. కేంద్రం ప్రవేశపెట్టిన తాజా బడ్జెట్ సహకార సమాఖ్య వ్యవస్థను బలహీనపరుస్తోందని పేర్కొన్నారు.

జయశంకర్ భూపాలపల్లి జిల్లా కాటారం మండలంలో పర్యటించిన మంత్రి మీడియాతో మాట్లాడారు. దేశాభివృద్ధి బలమైన రాష్ట్రాలపై ఆధారపడి ఉంటుందని తెలిపారు. జాతీయ స్థూల దేశీయోత్పత్తిలో ఐదు శాతానికి పైగా వాటా ఉన్న తెలంగాణను బడ్జెట్‌లో ఒక్కసారి కూడా ప్రస్తావించకపోవడం తీవ్ర నిర్లక్ష్యంగా అభివర్ణించారు. ఈ వైఖరి సబ్కా సాథ్ సబ్కా వికాస్ నినాదాన్ని అర్థహీనంగా మారుస్తోందని చెప్పారు.

ఈ ఆర్థిక సంవత్సరంలో తెలంగాణకు రావాల్సిన రూ.22,782 కోట్లలో ఇప్పటివరకు సుమారు రూ.4,000 కోట్లే విడుదలయ్యాయని తెలిపారు. పది నెలలు గడిచినా మిగిలిన నిధులు రాకపోవడం రాష్ట్రానికి నష్టం కలిగిస్తోందని అన్నారు. ప్రాంతీయ రింగ్ రోడ్, మెట్రో రైల్ ఫేజ్–2, గోదావరి–మూసీ అనుసంధానం, రైల్వే కనెక్టివిటీ, విమానాశ్రయాలు, ఏపీ పునర్విభజన చట్టంలోని హామీలకు బడ్జెట్‌లో కేటాయింపులు లేకపోవడాన్ని తప్పుబట్టారు.

తెలంగాణ రాష్ట్ర విభజన జరిగి ఎన్నేళ్లు గడిచినా చట్టంలోని 42 కీలక అంశాలు ఇంకా పరిష్కారం కాలేదని మంత్రి గుర్తు చేశారు. సమావేశాల్లోనైనా పరిష్కారం దొరుకుతుందని ఆశించినా కేంద్రం స్పందించలేదని ఆవేదన వ్యక్తం చేశారు. రాష్ట్ర ప్రయోజనాల దృష్ట్యా కేంద్రం వెంటనే చర్యలు తీసుకోవాలని డిమాండ్ చేశారు.

ప్రతిష్టాత్మక సంస్థల విషయంలోనూ తెలంగాణకు అన్యాయం జరిగిందని తెలిపారు. ఐఐఎం, మెట్రో ఫేజ్–2 విస్తరణ, కేంద్రీయ, నవోదయ విద్యాలయాల కేటాయింపుల్లో రాష్ట్రాన్ని విస్మరించారని చెప్పారు. సెమీకండక్టర్ పరిశ్రమల కేటాయింపులోనూ కేంద్రం పక్షపాత ధోరణి కొనసాగుతోందని వ్యాఖ్యానించారు.

తెలంగాణ నుంచి ఎనిమిది మంది బీజేపీ ఎంపీలు ఉన్నప్పటికీ కేంద్రం నుంచి నిధులు తీసుకురావడంలో వారు విఫలమయ్యారని మంత్రి విమర్శించారు. ఇది రాష్ట్ర ప్రజలకు జరిగిన అవమానంగా పేర్కొన్నారు. అదే సమయంలో లైఫ్ సైన్సెస్, ఫార్మా రంగాల్లో తెలంగాణ ప్రభుత్వం అమలు చేస్తున్న విధానాలను కేంద్రం ఆదర్శంగా తీసుకుంటోందని తెలిపారు.

రాబోయే మున్సిపాలిటీ ఎన్నికల నేపథ్యంలో ప్రజలకు మంత్రి పిలుపునిచ్చారు. గత పదేళ్ల పాలనలో పట్టణాల అభివృద్ధి విస్మరించబడిందని ఆరోపించారు. పట్టణాల్లో మౌలిక సదుపాయాల కోసం కాంగ్రెస్ అభ్యర్థులను గెలిపించాలని కోరారు.

రాష్ట్ర ప్రభుత్వం అభివృద్ధి లక్ష్యంగా ముందుకు సాగుతోందని, కేంద్రం కూడా సమాఖ్య స్ఫూర్తిని గౌరవిస్తూ తెలంగాణకు న్యాయం చేయాలని శ్రీధర్ బాబు కోరారు.