గోదావరి జలాలపై అసెంబ్లీలో సమగ్ర చర్చ: సీఎం

గోదావరి నదీ జలాల విషయంలో అనవసరమైన వివాదాలు, గందరగోళపరిచే విమర్శల వల్ల ప్రయోజనం లేదని ముఖ్యమంత్రి A. Revanth Reddy స్పష్టం చేశారు. తాజా పరిణామాల నేపథ్యంలో ఈ అంశంపై శాసనసభ బడ్జెట్ సమావేశాల్లో ఒకరోజు సమగ్ర చర్చ నిర్వహిస్తామని ప్రకటించారు. తెలంగాణ హక్కుల విషయంలో ఎలాంటి సందేహాలు అవసరం లేదని పునరుద్ఘాటించారు.

దేవాదుల ప్రాజెక్టు సమీక్ష

ములుగు జిల్లా కన్నాయిగూడెం మండలంలోని జె.చొక్కారావు దేవాదుల ఎత్తిపోతల పథకం పంప్ హౌస్‌ను సీఎం పరిశీలించారు. ఇంజనీర్లతో సాంకేతిక వివరాలు తెలుసుకున్నారు. మంత్రులు ఉత్తమ్ కుమార్ రెడ్డి, ధనసరి అనసూయ సీతక్క, పొంగులేటి శ్రీనివాస రెడ్డి, సలహాదారు వేం నరేందర్ రెడ్డి, ప్రజాప్రతినిధులు, అధికారులతో కలిసి దేవాదుల ఇంటేక్ పాయింట్ వద్ద మోటార్లను చూశారు. అక్కడే ప్రాజెక్టు పురోగతిపై సమీక్ష నిర్వహించారు.

నీటి హక్కులపై స్పష్టత

తెలంగాణ నీటి హక్కుల విషయంలో శాశ్వత పరిష్కారం కోరుకుంటున్నామని సీఎం తెలిపారు. ప్రణాళికాబద్ధంగా ప్రాజెక్టులు పూర్తి చేయడమే లక్ష్యమని చెప్పారు. అవసరమైన నిధులను సమీకరిస్తున్నామని వెల్లడించారు.

క్లిష్టమైన సమస్యలైనా చర్చల ద్వారానే పరిష్కారం సాధ్యమని పేర్కొన్నారు. ఆంధ్రప్రదేశ్‌తో చర్చలు ప్రారంభ దశలో ఉన్నాయని తెలిపారు. అధికారుల స్థాయిలో తేలకపోతే కేంద్ర ప్రభుత్వం, రివర్ మేనేజ్మెంట్ బోర్డులు, ట్రిబ్యునళ్లు లేదా సుప్రీంకోర్టు వరకు దశల వారీగా వెళ్లాల్సి ఉంటుందని వివరించారు.

నికర, మిగులు, వరద జలాలపై తెలంగాణ హక్కులను కాపాడుతామని స్పష్టం చేశారు. అసెంబ్లీలో చర్చకు సిద్ధమని, సహేతుక సూచనలను స్వీకరిస్తామని చెప్పారు. తప్పుడు ఆరోపణలు చేయొద్దని సూచించారు.

ప్రాజెక్టుల పురోగతి, నిధుల పరిస్థితి

గోదావరి ప్రాజెక్టులను పూర్తి చేసి ఉత్తర తెలంగాణను సస్యశ్యామలం చేయాలన్నదే లక్ష్యమని తెలిపారు. సమైక్య పాలనలో నిర్లక్ష్యం జరిగిందని, రాష్ట్ర ఏర్పాటుకు తర్వాత కూడా విధానపరమైన లోపాల వల్ల ఆలస్యం జరిగిందని పేర్కొన్నారు. 2001లో ప్రారంభమైన దేవాదుల ప్రాజెక్టు ఇంకా కొనసాగుతుండటాన్ని గుర్తుచేశారు. గత పదేళ్లలో 967 టీఎంసీల నీటిని వినియోగంలోకి తెచ్చి ఉంటే పరిస్థితి వేరుగా ఉండేదని అభిప్రాయపడ్డారు.

ప్రస్తుతం రూ.8.11 లక్షల కోట్ల అప్పు భారం ఉన్నప్పటికీ వచ్చే రెండేళ్లలో ప్రాజెక్టులు పూర్తి చేయాలని సంకల్పం వ్యక్తం చేశారు. అవసరమైన నిధులు విడుదల చేయాలని ప్రభుత్వం నిర్ణయించిందని చెప్పారు. పెరిగిన అంచనాలను సవరించి మంత్రివర్గ ఆమోదంతో పనులు పూర్తి చేస్తామని వెల్లడించారు.

తుమ్మడిహెట్టి నుంచి భద్రాచలం వరకు అన్ని ప్రాజెక్టులపై సమగ్ర సమీక్ష చేపడతామని తెలిపారు. కాళేశ్వరం నుంచి ఒక్క చుక్క నీరు ఎత్తిపోకుండానే అధిక దిగుబడులు సాధించామని చెప్పారు. పక్క రాష్ట్రానికి నీరు తరలిస్తున్నారన్న ప్రచారం సరికాదని ఖండించారు.

కాళేశ్వరం బ్యారేజీలపై నిర్ణయం

కాళేశ్వరం ప్రాజెక్టులోని మేడిగడ్డ, అన్నారం, సుందిళ్ల బ్యారేజీలు తెలంగాణ ప్రజల ఆస్తి అని పేర్కొన్నారు. వాటిని నిర్లక్ష్యం చేయబోమని తెలిపారు. భూగర్భ సమస్యలపై విశ్లేషణలు చేసి భవిష్యత్తులో ప్రమాదం లేకుండా చర్యలు తీసుకుని, అనంతరం పునరుద్ధరణ చేపడతామని స్పష్టం చేశారు.

ఇటీవల జరిగిన మేడారం శ్రీ సమ్మక్క–సారలమ్మ మహాజాతర విజయవంతంగా నిర్వహించామని చెప్పారు. భక్తులు నిరంతరం సందర్శించేలా అభివృద్ధి చర్యలు చేపడతామని తెలిపారు. బడ్జెట్ సమావేశాల అనంతరం మళ్లీ మేడారం సందర్శించి సమీక్షిస్తామని వెల్లడించారు.