టీచర్లూ, విద్యార్థులను అమ్మల్లా చూసుకోండి: రేవంత్

అంగన్వాడీ టీచర్లు విద్యార్థులను అమ్మల్లా చూసుకోవాలని ముఖ్యమంత్రి రేవంత్ రెడ్డి సూచించారు. చిన్నారుల సంక్షేమం కోసం ఇది అత్యంత ముఖ్యమని ఆయన పేర్కొన్నారు. అంగన్వాడీ చిన్నారుల కోసం బ్రేక్‌ఫాస్ట్ స్కీంను ప్రారంభించిన సందర్భంగా సీఎం ఈ వ్యాఖ్యలు చేశారు. ఈ కార్యక్రమానికి ఒక స్పష్టమైన నేపథ్యం ఉందని ఆయన వివరించారు. గతంలో దేశ అభివృద్ధి కోసం విద్య, సాగునీటి రంగాలకు ప్రాధాన్యత ఇచ్చిన విషయాన్ని గుర్తుచేశారు. ప్రస్తుతం దేశంలో ఆహార భద్రత ఉన్నప్పటికీ, పౌష్టికాహారం లోపం ఉన్నదని తెలిపారు.

గర్భధారణ దశ నుంచే తల్లులకు పోషకాహారం అందించే చర్యలు ప్రభుత్వం తీసుకుందని చెప్పారు. అదే లక్ష్యంతో ఇప్పుడు చిన్నారుల కోసం బ్రేక్‌ఫాస్ట్ స్కీంను ప్రారంభించినట్లు తెలిపారు. ప్రభుత్వ పథకాల అమలులో అంగన్వాడీ సిబ్బంది కీలక పాత్ర పోషిస్తున్నారని సీఎం పేర్కొన్నారు. అందుకే వారికి ఎక్కువ బాధ్యతలు అప్పగించినట్లు తెలిపారు. అంగన్వాడీ సిబ్బందిని ప్రభుత్వం కుటుంబ సభ్యుల్లా భావిస్తోందని చెప్పారు. వారి సమస్యలపై నిరంతరం చర్చలు జరుగుతున్నాయని వెల్లడించారు.

ఆర్థిక పరిస్థితులు అనుకూలించిన వెంటనే సమస్యలను పరిష్కరిస్తామని తెలిపారు. అంగన్వాడీ కేంద్రాలు అద్దె భవనాల్లో కాకుండా సొంత భవనాల్లో ఉండేలా ప్రణాళికలు సిద్ధం చేయాలని సూచించారు. ఆరేళ్ల లోపు పిల్లలకు పౌష్టికాహారం అందితేనే మానసిక ఎదుగుదల సక్రమంగా ఉంటుందని చెప్పారు. పోషకాహారం లోపం వల్లే అనేక ఆరోగ్య సమస్యలు వస్తున్నాయని వివరించారు. భవిష్యత్‌లో ఇలాంటి సమస్యలు రాకుండా ఉండేందుకు ప్రభుత్వం పథకాలను అమలు చేస్తోందని తెలిపారు. అధికారులు ఈ కార్యక్రమాన్ని కొనసాగిస్తున్నారు.