కాలినడకన శ్రీశైలం వస్తున్న కర్ణాటక భక్తులు

శ్రీశైలం ఉగాది ఉత్సవాలలో పాల్గొనేందుకు, మొక్కుబడులు చెల్లించుకునేందుకు కాలినడకన, కంబి(పల్లకి)లలో,కర్ర కాళ్ల మీద నడుచుకుంటూ అలసటు అనేది తెలియకుండా వేలాది మంది శివభక్తులు శ్రీశైలం చేరుకుంటున్నారు. తప్పెట దరువులు వేస్తూ దారిపొడవునా కుంకుమ చల్లుకుంటూ, చిందులు వేస్తూ కర్ణాటక రాష్ట్రానికి చెందిన ఈ శివభక్తులతో శ్రీశైలం తరలి వస్తున్నారు. నల్లమల అడవుల్లో వారి కోలాహలం మిన్నుముట్టింది. విచిత్రమేమిటంటే ఈ భక్తుల్లో 90 శాతం మంది శ్రామికులు, పేద వర్గాల వారే.

ఆంధ్రప్రదేశ్‌ శ్రీశైల మహాక్షేత్రంతో ఉగాది ఉత్సవాలు ఘనంగా జరుగుతాయి. ఈ ఉత్సవాల్లో పాల్గొనేందుకు కర్ణాటక నుండి వేలాది మంది భక్తులు పాదయాత్రగా తరలి వస్తారు. భక్తులు ప్రధానంగా హైదరాబాద్-కర్నాటక ప్రాంతం నుంచి తరలి వస్తున్నారు.

అడవిలో నాగలూటి వీరభద్రేశ్వర గుడి వద్ద, భీమునికొలను, పెచ్చెరువు గ్రామాల వద్ద వీళ్ల కోసం భోజన ఏర్పాట్లు ఉన్నాయి. మహారాష్ట్ర భోజన ట్రస్టు నాగలూటి వద్ద చపాతి యంత్రాల ద్వారా రోజూ వేలాది మందికి భోజనం అందించింది.

కొందరు భక్తులు తనకంటే పొడవైన కర్రకాళ్ల మీద మీద వచ్చి మొక్కులు చెల్లించుకుంటున్నారు. వందలాది కిలోమీటర్లు నడుచుకుంటూ నల్లమల అడవుల్లో వృద్ధులు, మహిళలు, చంటిపిల్లల తల్లులు సైతం పాదయాత్ర చేసుకుంటూ తరలివస్తున్నారు. వీరి కోసం మహారాష్ట్ర కు చెందిన ఒక ట్రస్టు అడవిలో భోజన ఏర్పాట్లు చేసింది.