ఇక్కడ హోలీ చాలా వెరైటీ.. నిజామాబాద్ పిడిగుద్దులతోనే..
హోలీ సందర్భంగా తెలంగాణలోని హున్సా గ్రామంలో పిడిగుద్దులాటతో పండుగ జరుపుతారు. దేశంలోని ఇతర ప్రాంతాల్లో కూడా వింత సంప్రదాయాలతో హోలీ జరుగుతోంది.
దేశవ్యాప్తంగా హోలీ పండుగ సంబరాలు జోరుగా సాగుతున్నాయి. రంగులతో ఆనందంగా జరుపుకునే ఈ పండుగకు తెలంగాణలోని నిజామాబాద్ జిల్లా బోధన్ మండలం హున్సా గ్రామం మాత్రం ప్రత్యేక గుర్తింపును సొంతం చేసుకుంది. ఇక్కడ హోలీని రంగులతో కాదు… పిడిగుద్దులాటతో జరుపుకోవడం విశేషంగా మారింది. ఇక ఈసారి హోలీ తేదీలపై కొంత సందిగ్ధం ఉండటంతో కొందరు నేడు, మరికొందరు రేపు పండుగ జరుపుకుంటున్నారు. అయినా సంప్రదాయం ప్రకారం గ్రామస్తులు తమ ప్రత్యేక ఆచారాన్ని కొనసాగిస్తున్నారు.
హున్సా గ్రామంలో పిడిగుద్దుల హోలీ
హోలీ వచ్చిందంటే చాలు హున్సా గ్రామంలో పిడిగుద్దులాట మొదలవుతుంది. గ్రామంలోని యువకులు రెండు వర్గాలుగా విడిపోతారు. ఆపై గ్రామంలోని ప్రధాన కూడళ్ల వద్ద ఒకరినొకరు పిడికిళ్లతో గుద్దుకుంటూ ఆట ఆడతారు. ఈ పోరు సుమారు అరగంట పాటు కొనసాగుతుంది. గాయాలు అయినా పట్టించుకోకుండా పిడిగుద్దులతో పోటీపడటం ఈ ఆట ప్రత్యేకతగా చెప్పబడుతోంది. గ్రామ శ్రేయస్సు, సంక్షేమం కోసం ఈ ఆటను తప్పనిసరిగా ఆడాలని గ్రామస్తులు విశ్వసిస్తున్నారని స్థానికులు చెబుతున్నారు.
ఆడకపోతే అరిష్టం
ఈ ఆచారం వెనుక ఒక విశ్వాసం కూడా ఉంది. ఒకసారి హోలీ రోజున పిడిగుద్దులాట జరగకపోవడంతో గ్రామంలోని ట్యాంకు కూలి నష్టం జరిగినట్టు పెద్దలు చెబుతున్నారని గ్రామస్తులు వెల్లడిస్తున్నారు. అప్పటి నుంచి ప్రతి సంవత్సరం ఈ ఆట తప్పనిసరిగా నిర్వహిస్తున్నారు. గ్రామంలో ఎలాంటి అరిష్టాలు జరగకుండా ఉండాలనే నమ్మకంతో ఈ సంప్రదాయం కొనసాగుతోంది.
పోరాటం తర్వాత స్నేహం
పిడిగుద్దులాట ముగిసిన తర్వాత గ్రామస్తులు పరస్పరం అలయ్బలయ్ చేసుకుంటారు. కొద్దిసేపటి క్రితం పోటీగా కొట్టుకున్నవారే తిరిగి స్నేహంగా కలుస్తారు. ఆ తర్వాత రంగులతో హోలీ సంబరాలు కొనసాగిస్తారు.
తెలంగాణలో వేరువేరు హోలీ సంప్రదాయాలు
తెలంగాణలో హోలీ పండుగను ప్రాంతానికో విధంగా జరుపుకుంటారు. గ్రామీణ ప్రాంతాల్లో హోలీకి ముందు తొమ్మిది రోజుల పాటు పిల్లలు, యువత జాజిరి జానపద పాటలు పాడుతూ కోలాట కర్రలు వాయిస్తూ బియ్యం, డబ్బు, కట్టెలు సేకరిస్తారు. సూర్యాపేట జిల్లా దాస్ తండాలో మాత్రం రసాయన రంగులు కాకుండా పువ్వులు, సహజ వనరులతో తయారు చేసిన ప్రకృతి రంగులతో హోలీ జరుపుకుంటారు.
మంచిర్యాల వంటి పట్టణాల్లో మారువాడీ సమాజం ‘ధూంధ్’ అనే ఆచారాన్ని నిర్వహిస్తుంది. ఇది పిల్లలకు సంబంధించిన ప్రత్యేక సంప్రదాయ వేడుకగా నిర్వహించబడుతుంది. హైదరాబాద్ నగరంలో హోలికా దహనం తర్వాత మరుసటి రోజు రంగులతో భారీగా హోలీ వేడుకలు జరుగుతాయి. జూబ్లీహిల్స్, బేగంపేట, గచ్చిబౌలి ప్రాంతాల్లో డీజే డాన్సులు, ప్రత్యేక ఈవెంట్లు నిర్వహిస్తారు.
వింత హోలీ సంప్రదాయాలు
భారతదేశంలోని కొన్ని ప్రాంతాల్లో హోలీ పండుగను మరింత వినూత్నంగా జరుపుకుంటారు. వారణాసిలో స్మశానవాటికలోని బూడిదతో “మసాన్ హోలీ” నిర్వహిస్తారు. శివభక్తులు బూడిదను ఒకరిపై ఒకరు చల్లుకుంటూ ఈ ఆచారాన్ని పాటిస్తారు. ఉత్తరప్రదేశ్లోని బర్సానా, నందగావ్ ప్రాంతాల్లో “లఠ్మార్ హోలీ” ప్రసిద్ధి చెందింది. ఇందులో మహిళలు పురుషులను కర్రలతో కొట్టడం సంప్రదాయంగా కొనసాగుతోంది.
మధ్యప్రదేశ్లోని కొన్ని గిరిజన ప్రాంతాల్లో భక్తిని వ్యక్తం చేయడానికి మండుతున్న నిప్పులపై నడిచే ఆచారం కూడా ఉంది. బృందావన్లోని ఆలయాల్లో పూల రేకులతో మాత్రమే “ఫూలోన్ వాలి హోలీ” జరుపుకుంటారు. అలాగే ఉత్తరాఖండ్లోని బాగేశ్వర్ జిల్లాలో కొన్ని గ్రామాల్లో హోలీ పండుగనే జరుపుకోరని స్థానికుల విశ్వాసం.
