మాజీ కేంద్ర మంత్రి కావూరి సాంబశివరావు కన్నుమూత

కేంద్ర మాజీ మంత్రి, మాజీ ఎంపీ కావూరి సాంబశివరావు ఇకలేరు. వయో సంబంధిత అనారోగ్య కారణాలతో ఆయన చాలా రోజులుగా ఇబ్బంది పడుతున్నారు. ఆదివారం ఆయన ఆరోగ్యం విషమించడంతో కుటుంబీకులు హైదరాబాద్‌లోని ఓ ప్రైవేటు ఆసుపత్రికి తరలించారు. అక్కడ చికిత్స పొందుతూ ఆయన తుదిశ్వాస విడిచారు. ఆయన మరణం దేశ రాజకీయాలకు తీరని లోటని పలువరు రాజకీయ ప్రముఖులు సంతాపం వ్యక్తం చేశారు. ఆయన చేసిన సేవలు మరువలేనివని పేర్కొన్నారు.

కావూరి సాంబశివరావు 1943లో కృష్ణా జిల్లా గుడ్లవల్లెరులో జన్మించారు. 1980లో కాంగ్రెస్ పార్టీలో చేరి స్థానిక రాజకీయాల్లో, పార్టీ అభివృద్ధిలో కీలక పాత్ర పోషించారు. 1989లో మచిలీపట్నం నుంచి లోక్‌సభకు తొలిసారిగా ఎంపీగా ఎన్నికయ్యారు. తర్వాత మచిలీపట్నం నుంచి మూడుసార్లు, ఏలూరు నుంచి రెండు సార్లు ఎన్నికై ఐదు సార్లు లోక్‌సభలో సేవలు అందించారు.

2012–2014 కాలంలో యూపీఏ 2 ప్రభుత్వంలో కేంద్ర హెవీ ఇండస్ట్రీస్ అండ్ పబ్లిక్ ఎంటర్‌ప్రైజెస్ మంత్రిగా బాధ్యతలు నిర్వహించారు. 2013లో కేంద్ర మంత్రి పదవిలో ఉన్నప్పటికీ 2014లో తెలంగాణ ప్రత్యేక రాష్ట్ర ఏర్పాటును వ్యతిరేకిస్తూ కాంగ్రెస్ పార్టీకి, తన పదవికి రాజీనామా చేశారు. తర్వాత రాజకీయ, పారిశ్రామిక రంగాల్లో కొనసాగించారు.

కావూరి సాంబశివరావు ఇంజనీరింగ్ రంగంలో కూడా విశేషంగా గుర్తింపు పొందారు. ఆయన స్థాపించిన ప్రొగ్రెసివ్ కన్స్ట్రక్షన్ లిమిటెడ్ దేశ వ్యాప్తంగా రహదారులు, విద్యుత్ ప్రాజెక్టులు, మౌలిక సదుపాయాల నిర్మాణంలో కీలకంగా పనిచేసింది.

ఆయనకు ముగ్గురు కుమార్తెలు, ఒక కుమారుడు ఉన్నారు. కుటుంబ సభ్యులు, అభిమానులు, రాజకీయులు నివాళులు అర్పిస్తున్నారు. సీనియర్ నేతగా, కేంద్రంలో కీలక బాధ్యతలు నిర్వహించినవారుగా, రాజకీయ, వ్యాపార రంగాల్లో ఆయన ప్రభావం గణనీయంగా గుర్తింపు పొందింది.