నాలుగున్నర దశాబ్దాలుగా అడవుల్లో తుపాకీ మోతలతో సాగిన మావోయిస్టు ఉద్యమం ఇప్పుడు కీలక మలుపు తిరుగుతోంది. తదుపరి మావోయిస్టు ఉద్యమం స్వరూపం ఎలా ఉంటుందో గాని 1980లో కరీంనగర్ జిల్లా జగిత్యాల పట్టణంలో రగిలిన నిప్పు రవ్వ దావానలం లాగా దండకారణ్యాన్ని అక్రమించుకుంది. ఇపుడు ఆ నిప్పురవ్వ ఆరిపోతున్నదా అనే అనుమానం కలిగించే వాతావరణం ఏర్పడుతూ ఉంది. గత అయిదు దశాబ్దాల మావోయిస్టు రాజకీయాలలో కరీంనగర్ ది ఉజ్వలమైన పాత్ర. ఉద్యమానికి ఈ జిల్లా కార్యకర్తలను అందించింది, నాయకత్వాన్ని అందించింది. అంతేకాదు,ఇక్కడి నుంచే దండకారణ్య కార్చిచ్చు వ్యాపించింది. 1977 ఎమర్జన్సీ తర్వాతి మావోయిస్టు చరిత్ర ను రాస్తే ఒక చాప్టర్ ను కరీంనగర్ కు కేటాయించాల్సి ఉంటుంది.మావోయిస్టు అగ్రనేతల్లో చాలామంది ఉమ్మడి కరీంనగర్ జిల్లాకు చెందినవారే. అనేక మంది కార్యకర్తలు మృతి చెందడుం, చాలా మంది సీనియర్ నాయకులు లొంగిపోతూ ఉండటంతో కరీంనగర్ చాప్టర్ క్లోజ్ అవుతున్నట్లు అనిపిస్తుంది.