I N D I A కూటమిని 'భ్రష్టాచార్ బచావో అలయన్స్’ అన్నదెవరు?

ప్రతిపక్ష ‘భారత కూటమి’ రాజవంశ పార్టీల కూటమి అని, వీరిలో సగం మంది నాయకులు జైలులో, సగం మంది బెయిల్‌పై ఉన్నారని బిజెపి జాతీయ అధ్యక్షుడు జెపి నడ్డా విమర్శించారు.

రాజస్థాన్‌ ఝలావర్‌లో నిర్వహించిన ఎన్నికల ప్రచార ర్యాలీలో ఆయన ఈ వ్యాఖ్యలు చేశారు. ఝలావర్-బరన్ లోక్‌సభ నియోజకవర్గం నుంచి తిరిగి దుష్యంత్ సింగ్ బరిలో నిలిపింది బీజేపీ.

"భారత్ అలయన్స్ ను 'భ్రష్టాచార్ బచావో అలయన్స్ (అవినీతి రక్షిత కూటమి)' గా అభివర్ణిసూ.. ఇందులో భాగస్వామ్యం కలిగినవన్నీ కుటుంబ పార్టీలేనని నడ్డా అన్నారు. ఒక పార్టీలో కుటుంబం నుంచి అధ్యక్షుడు, మరో పార్టీలో కుటుంబం నుంచి ప్రధాన కార్యదర్శి, ఇంకో పార్టీలో కుటుంబం నుంచి మంత్రులయిన వారు ఉన్నారని పేర్కొన్నారు.

"రాహుల్ గాంధీ బెయిల్‌పై బయట ఉన్నారా? లేదా? సోనియా గాంధీ, చిదంబరం, (ఆప్ రాజ్యసభ ఎంపీ) సంజయ్ సింగ్ బెయిల్‌పై బయట ఉన్నారా? లేదా? అరవింద్ కేజ్రీవాల్, మనీష్ సిసోడియా జైలులో ఉన్నారా ? లేదా? అని నడ్డా జనాన్ని ప్రశ్నించారు. "భారత కూటమిలోని సగం మంది నాయకులు జైల్లో, సగం మంది (బయట) బెయిల్‌పై ఉన్నారు" అని మాట్లాడారు.

ప్రధాని నరేంద్ర మోదీ నాయకత్వంలో దేశం శరవేగంగా పురోగమిస్తోందన్నారు. "ఈ రోజు, భారతదేశం ఆకాంక్ష అవినీతి రహిత ప్రభుత్వం ఉండాలి. అభివృద్ధి ఆధారిత ప్రభుత్వం ఉండాలి. అది మోడీ జీ నాయకత్వంతోనే సాధ్యం" అని నడ్డా పేర్కొన్నారు.

ఊహకందని అభివృద్ధితో భారత్ అభివృద్ధి చెందిన దేశంగా నిలవాలని ఆకాంక్షించారు. మోదీ నాయకత్వంలో గ్రామాల పరిస్థితి మారిపోయిందని పేర్కొన్నారు. 2014లో మోదీ ప్రధాని అయిన తర్వాత 18,000 గ్రామాలకు విద్యుత్‌ సౌకర్యం కల్పించారని గుర్తు చేశారు.

బిజెపి నేతృత్వంలోని కేంద్రం చేసిన అభివృద్ధి పనులను హైలైట్ చేసిన నడ్డా.. 3.5 లక్షల గ్రామాలకు రోడ్ల నిర్మాణ పనులు చేపట్టామని చెప్పారు. ఎనభై కోట్ల మందికి ఉచిత రేషన్ ఇస్తున్నామని చెప్పారు. పేదలు, రిక్షా కార్మికులు, టీ విక్రేతలు, బస్సు డ్రైవర్లు, క్లీనర్లతో సహా 55 కోట్ల మంది జనాభాలో 40 శాతం మందికి ఆయుష్మాన్ భారత్ కింద సంవత్సరానికి 5 లక్షల రూపాయల బీమా సౌకర్యం కల్పించామన్నారు. రాజస్థాన్‌లో ఈ నెలలో రెండు దశల్లో లోక్‌సభ ఎన్నికలు జరగనున్నాయి.