గల్ఫ్‌లో మరణం, స్వదేశానికి దారి చూపిన సీఎం మానవత్వం

ఉఫాధి కోసం గల్ఫ్ దేశానికి వెళ్లిన ఓ కార్మికుడు మరణించడంతో ఆయన మృతదేహాన్ని స్వదేశానికి తీసుకువచ్చేందుకు తెలంగాణ సీఎం ఎ రేవంత్ రెడ్డి సీఎంఆర్ఎఫ్ నిధులిచ్చారు.నిజామాబాద్ జిల్లా నవీపేట మండలం యాంచ గ్రామానికి చెందిన 40 ఏళ్ల గొల్ల అబ్బులు (తోగరి అబ్బయ్య)నాలుగు నెలల క్రితం ఒమన్‌లోని సలాలాకు ఒక క్లీనింగ్ కంపెనీలో పని చేయడానికి వెళ్లాడు. కంపెనీ యాజమాన్యంపై అసంతృప్తితో ఉద్యోగం మానేశాడు. ఆ తర్వాత అతను డిసెంబర్ 14వతేదీన ఇబ్రి ప్రాంతంలో మరణించాడు. స్థానిక ఒమన్ చట్టాల ప్రకారం అనుమతి లేకుండా ఉద్యోగం మానేసిన కార్మికులను అక్రమ నివాసులుగా పరిగణిస్తారు. కంపెనీ యాజమాన్యం, భారత రాయబార కార్యాలయం ఇద్దరూ ఖర్చులను భరించలేమని చేతులెత్తేసిన సమయంలో ఈ సంఘటన జరిగింది.గల్ఫ్ దేశంలో మరణించిన ఒక వలస కార్మికుడి మృతదేహాన్ని స్వదేశానికి తరలించే పూర్తి ఖర్చును తెలంగాణ ప్రభుత్వం భరించింది.

అబ్బులు మృతదేహం తరలించడంలో కంపెనీ యాజమాన్యం తమకు ఎలాంటి బాధ్యత లేదని పేర్కొంది. అతని మృతదేహాన్ని భారతదేశానికి తరలించే ఖర్చును భరించడానికి నిరాకరించింది. సాధారణంగా ఇటువంటి సందర్భాలలో భారతీయ కమ్యూనిటీ సంక్షేమ నిధి (ICWF) ద్వారా సహాయం అందిస్తారు. అయితే మస్కట్‌లోని భారత రాయబార కార్యాలయం నుంచి ఒక అధికారి నిధుల కొరత కారణంగా మృతదేహాన్ని స్వదేశానికి తీసుకురావడానికి రూ.1.50 లక్షలు చెల్లించాల్సి ఉంటుందని కుటుంబ సభ్యులకు తెలిపారు. ఆ మొత్తం చెల్లించకపోతే, అంత్యక్రియలు ఒమన్‌లోనే నిర్వహించాల్సి వస్తుందని కూడా తెలిపారు.

ఈ బాధాకరమైన పరిస్థితిలో అబ్బులు భార్య తోగరి చిన్న సావిత్రి, తన కుమారుడు సంజయ్,యాంచ గ్రామ సర్పంచ్ బెగరి సైలుతో కలిసి హైదరాబాద్‌లోని ముఖ్యమంత్రి ప్రవాసి ప్రజావాణిలో తమ భర్త మృతదేహాన్ని భారతదేశానికి తీసుకురావడానికి ముఖ్యమంత్రి సహాయ నిధి నుంచి సహాయం కోరుతూ ఒక వినతిపత్రం సమర్పించారు.చిన్న సావిత్రి గతంలో డిసెంబర్ 29న ముఖ్యమంత్రి కార్యాలయానికి ఈమెయిల్ ద్వారా ఒక వినతిపత్రాన్ని పంపారు. దీంతో జీఏడీ ఎన్ఆర్ఐ విభాగం భారత రాయబార కార్యాలయానికి ఒక సందేశాన్ని పంపింది.

అబ్బులు ఒమన్‌కు వెళ్లడానికి చిన్నాపూర్‌కు చెందిన ఒక గల్ఫ్ సబ్-ఏజెంట్‌కు రూ1.20 లక్షలు చెల్లించగా, అతని వలస అనుమతి అసోంలోని గౌహతిలో ఉన్న ఒక రిజిస్టర్డ్ రిక్రూటింగ్ ఏజెన్సీ ద్వారా ప్రాసెస్ చేశారు. అతనికి రూ. 10 లక్షల విలువైన ప్రవాసీ భారతీయ బీమా యోజన (పీబీబీవై) ప్రమాద బీమా పాలసీ కూడా జారీ చేశారు. ఒక వలస కార్మికుడు మరణించిన సందర్భంలో స్వదేశానికి రప్పించే ఖర్చులను అందించే ఈ పాలసీని మస్కట్‌లోని భారత రాయబార కార్యాలయం ఎందుకు ఉపయోగించుకోలేదనే ప్రశ్నలు తలెత్తుతున్నాయి. చట్టం ప్రకారం మృతదేహాన్ని స్వదేశానికి రప్పించే బాధ్యత రిక్రూటింగ్ ఏజెన్సీదే. ఈ సమస్య 'మదద్' పోర్టల్‌లో నమోదు అయినప్పటికీ, న్యూఢిల్లీలోని విదేశాంగ మంత్రిత్వ శాఖ సమర్థవంతమైన చర్యలు తీసుకోలేదు.

ఈ విషయాన్ని ఎన్ఆర్ఐ సలహా కమిటీ వైస్ చైర్మన్ మందా భీమ్ రెడ్డి, కమిటీ సభ్యుడు నాంగి దేవేందర్ రెడ్డి, ప్రవాసి ప్రజావాణి వాలంటీర్ మహమ్మద్ బషీర్ అహ్మద్‌లు ముఖ్యమంత్రి ప్రజావాణి ఇన్‌ఛార్జ్, రాష్ట్ర ప్రణాళికా బోర్డు వైస్ చైర్మన్ డాక్టర్ జి. చిన్నారెడ్డి దృష్టికి తీసుకువచ్చారు. సమస్య తీవ్రతను గుర్తించిన డాక్టర్ చిన్నారెడ్డి, తక్షణ చర్యలు తీసుకోవాలని ప్రధాన కార్యదర్శి వి. శేషాద్రిని ఆదేశించారు.

ముఖ్యమంత్రి ప్రజావాణి నోడల్ అధికారి ఐఏఎస్ అధికారిణి దివ్యకు ఈ విషయం వివరించినప్పుడు, ఆమె పరిస్థితి తీవ్రతను అర్థం చేసుకుని వెంటనే స్పందించారు. అబ్బులు విదేశాలకు వెళ్లిన మూడు నెలల్లోనే మరణించడం, అతని మృతదేహం దాదాపు నెల రోజుల పాటు ఆసుపత్రి మార్చురీలో ఉండటం,సహాయం కోసం అతని భార్య తన గ్రామం నుంచి హైదరాబాద్‌కు వచ్చి వేడుకోవడం వంటి విషయాలు ఆమెను తీవ్రంగా కదిలించాయి.ఫలితంగా కొన్ని గంటల్లోనే ముఖ్యమంత్రి సహాయ నిధి నుంచి రూ.1.50 లక్షలు మంజూరయ్యాయి.

అబ్బులు మృతదేహం స్వదేశానికి చేరే మార్గం సుగమం కావడం ద్వారా ఒక కుటుంబానికి మాత్రమే కాదు, వందలాది వలస కార్మికులకు ఇది ఒక ఆశాకిరణంగా మారింది. వ్యవస్థలు విఫలమైన వేళ, మానవత్వంతో స్పందించిన రాష్ట్ర ప్రభుత్వ నిర్ణయం, పాలనకు అర్థం ఏమిటో మరోసారి గుర్తు చేసింది.