హైస్పీడ్ రైల్వే హబ్‌గా హైదరాబాద్: తెలంగాణకు రూ.5,454 కోట్ల నిధులు

దేశంలో హైస్పీడ్ బుల్లెట్ రైళ్లకు హైదరాబాద్‌ను కేంద్రంగా మార్చేందుకు తెలంగాణకు రికార్డు స్థాయి నిధులను కేటాయింపులు చేస్తున్నట్లు రైల్వేవర్గాలు వెల్లడించాయి. మూడు బుల్లెట్ రైలు కారిడార్లు హైదరాబాద్ నగరంలోని శంషాబాద్ నుంచి ప్రారంభం కావడం వల్ల భారతదేశంలో హై-స్పీడ్ రైళ్లకు కేంద్రంగా అవతరించనుంది. ఈ కారిడార్లకు శంషాబాద్ ప్రధాన టెర్మినల్ గా గుర్తించారు.ఈ మూడు హై-స్పీడ్ రైలు కారిడార్ల వల్ల ప్రయాణ సమయం గణనీయంగా తగ్గనుంది.హైదరాబాద్-పుణెకు ఒక గంట 55 నిమిషాలు,హైదరాబాద్-చెన్నైకి రెండు గంటల 55 నిమిషాలు, హైదరాబాద్-బెంగళూరుకు రెండు గంటల సమయం పడుతుందని రైల్వే అధికారులు అంచనా వేశారు.ఈ హైస్పీడ్ కారిడార్ల వల్ల ఆర్థిక వృద్ధితోపాటు విద్య, ఆరోగ్యం, వ్యాపారం కోసం కనెక్టివిటీని పెంచుతాయని రైల్వే అధికారులు భావిస్తున్నారు.

తెలంగాణలోని ప్రముఖ పుణ్యక్షేత్రమైన యాదగిరగుట్ట శ్రీలక్ష్మీ నరసింహ స్వామి దేవాలయానికి వచ్చే భక్తుల సౌలభ్యం కోసం రూ.412 కోట్లతో యాదాద్రికి ఎంఎంటిఎస్ విస్తరణ కూడా ప్రారంభించామని దక్షిణ మధ్య రైల్వే అధికారులు చెప్పారు. తెలంగాణ రాష్ట్ర రైల్వే నెట్‌వర్క్ 100 శాతం విద్యుదీకరణను సాధించిందని రైల్వే అధికారులు చెప్పారు.రూ.2,500 కోట్ల వ్యయంతో గుంటూరు-బీబీనగర్ డబ్లింగ్, రూ. 6,000 కోట్లతో కాజీపేట-బల్హర్షా, కాజీపేట-విజయవాడ ట్రిప్లింగ్ ప్రాజెక్టులు, రూ. 500 కోట్లతో వికారాబాద్ మీదుగా సికింద్రాబాద్, వాడి మధ్య పనులు చేపట్టారు.

అమృత్ స్టేషన్ పథకం కింద తెలంగాణలోని 40 రైల్వే స్టేషన్లను రూ.2,015 కోట్ల అంచనా పెట్టుబడితో సమగ్ర పునరాభివృద్ధి కోసం గుర్తించారు.బేగంపేట, కరీంనగర్, వరంగల్, శ్రీ బాల బ్రహ్మేశ్వర జోగులాంబ స్టేషన్లలో అభివృద్ధి పనులు విజయవంతంగా పూర్తయ్యాయి.తెలంగాణకు సగటు వార్షిక రైల్వే బడ్జెట్ కేటాయింపు 2009–14లో రూ.886 కోట్ల నుంచి 2026–27లో రూ.5,454 కోట్లకు పెరిగింది. ప్రస్తుతం ఐదు జతల వందే భారత్ ఎక్స్‌ప్రెస్,మూడు జతల అమృత్ భారత్ ఎక్స్‌ప్రెస్ రైళ్లు నడుస్తున్నాయరి సౌత్ సెంట్రల్ రైల్వే అధికారులు చెప్పారు. రైల్వే భద్రతా కార్యక్రమాలలో భాగంగా స్వదేశీ రైలు ఢీకొనడాన్ని నివారించే వ్యవస్థ 'కవచ్'ను తెలంగాణలో విస్తృతంగా అమలు చేస్తున్నామని చెప్పారు.

మొత్తంగా చూస్తే, కేంద్రం ప్రకటించిన ఈ భారీ రైల్వే కేటాయింపులు తెలంగాణ రవాణా ముఖచిత్రాన్ని పూర్తిగా మార్చే దిశగా కీలకంగా నిలవనున్నాయి. హైస్పీడ్ రైళ్లతో పాటు ఆధునిక స్టేషన్లు, భద్రతా వ్యవస్థల అమలుతో రాష్ట్ర అభివృద్ధి కొత్త ట్రాక్‌పైకి ఎక్కనుందని రైల్వే వర్గాలు భావిస్తున్నాయి.