జియాగూడలో కల్తీ సమోసా యూనిట్ సీజ్..

జియాగూడలో అక్రమంగా నడుస్తున్న సమోసా తయారీ కేంద్రంపై హైదరాబాద్ టాస్క్ ఫోర్స్ మెరుపు దాడి చేసి, దాన్ని సీజ్ చేసింది. ₹5 లక్షల విలువైన అపరిశుభ్ర ఆహార నిల్వలను స్వాధీనం చేసుకుని, ఒక వ్యక్తిని అరెస్ట్ చేసిన తాజా పరిణామం వెలుగులోకి వచ్చింది. విశ్వసనీయ సమాచారం ఆధారంగా మార్చి 20 సాయంత్రం సుమారు 6 గంటలకు ఈ ఆపరేషన్ చేపట్టారు. టాస్క్ ఫోర్స్ ఇన్‌స్పెక్టర్ వెంకటేష్ నేతృత్వంలోని H-FAST బృందం, కుల్సుంపురా పోలీసులు, ఫుడ్ సేఫ్టీ అధికారితో కలిసి జియాగూడలోని ఒక ఇంటిలో తనిఖీలు నిర్వహించింది.

తనిఖీల్లో ఆ కేంద్రం ఎలాంటి FSSAI, ట్రేడ్ లేదా ఫైర్ సేఫ్టీ అనుమతులు లేకుండా నడుస్తున్నట్లు గుర్తించారు. అక్కడ అత్యంత అపరిశుభ్ర పరిస్థితుల్లో ఆహారం తయారు చేస్తున్నట్టు బయటపడింది. నిందితుడు అబ్దుల్ రషీద్ పాడైపోయిన గుడ్లు, పదేపదే ఉపయోగించిన నూనెతో సమోసాలు తయారు చేస్తున్నాడని అధికారులు గుర్తించారు. ఈ విధానం ప్రజల ఆరోగ్యానికి ప్రమాదకరమని వెల్లడించారు.

దాడిలో భాగంగా 500 పాడైన గుడ్లు, 5 కిలోల వాడిన నూనెను స్వాధీనం చేసుకున్నారు. అలాగే వందల సంఖ్యలో తయారైన సమోసాలు, పెద్ద మొత్తంలో మైదా, ఉప్పు, సమోసా పట్టీలు, అపరిశుభ్రమైన స్వీట్ కార్న్‌ను కూడా పట్టుకున్నారు. ఫ్రైయర్, కటింగ్ యంత్రాలు, వంట పాత్రలను సీజ్ చేశారు.

అన్ని వస్తువులను స్వాధీనం చేసుకుని నిందితుడిని అదుపులోకి తీసుకున్నారు. ఈ ఘటనపై కుల్సుంపురా పోలీస్ స్టేషన్‌లో కేసు నమోదు చేసి దర్యాప్తు కొనసాగిస్తున్నారు. ఇలాంటి అక్రమ ఆహార తయారీ కేంద్రాలపై నిరంతరం నిఘా కొనసాగుతుందని పోలీసులు తెలిపారు. ప్రజలు తమ పరిసరాల్లో అనుమానాస్పద కార్యకలాపాలు గమనిస్తే వెంటనే సమాచారం ఇవ్వాలని కోరారు.