‘రాజ్యాంగం కోసం పోరాడదామనే పోటీలో దిగాను... నా నోరు మూయించ లేరు’

"అధికారం విచక్షణ కోల్పోతున్నపుడు రాజ్యాంగం కళ్లెం వేస్తుంది. మాకు పార్లమెంటులో మెజారిటీ వుంది ఏమైనా చేస్తాము అంటే కుదరదు. ఇపుడు దేశంలో సర్వత్రా భయం ఆవరించింది. చదువుకున్న వాళ్ళు, చదువుకోనివాళ్ళు, న్యాయవాదులు, వృత్తి నిపుణులు, జర్నలిస్ట్ లు అన్నీ వర్గాలను ఈ భయం ఆవరించింది. అధికారంలో ఉన్న వాళ్లు ఈ భయాన్ని సృష్టించ కలిగారు. ప్రజాస్వామ్య వ్యవస్థలో రాజ్యంగ సంస్థలు ఒకదాని తరువాత ఒకటి నిర్వీర్యం అవుతున్నాయి. దాని వలన ప్రజాస్వామ్య ప్రక్రియ తిరోగమన పాలు అవుతోంది. దీనిని అరికట్టడానికి ఏదో విధంగా కృషి చేసేందుకు ఉపరాష్ట్రపతి ఎన్నికల్లో పోటీ చేసేందుకు అంగీకరించాను. ఇది మాట్లాడాల్సిన సమయం, నిలబడాల్సిన సమయం, ఎదుర్కోవలసిన సమయం అని అనిపించింది అందుకే బరిలో వున్నాను,” ఆయన అన్నారు.

బీహార్ లో వోటర్ల జాబితా సవరణ (sir) పేరుతో ప్రజలకు వోటు హక్కు లేకుండా చేస్తున్నారని ఆయన విమర్శించారు.

"మనకు రాజ్యాంగం రాక ముందే వోటరు జాబితా తయారయ్యింది. ఎలెక్షన్ కమిషన్ తన విధులు నిర్వర్తించాలి. నిష్పాక్షికంగా ఎన్నికలు జరపడం దాని రాజ్యాంగం బాధ్యత. సరైన వోటర్ల జాబితా తయారు చేయడం ముఖ్య భాగం. ఆధార్ కార్డులు యిచ్చే టప్పుడు అది మన హక్కు అన్నారు. హక్కు అంటే ఏమిటి? అందులో సామాన్యుడికి వోటు హక్కు లేదా? తనను ప్రశ్నించే వాళ్ళు లేరని కేంద్రం అని అనుకుంటున్నది. ఈ అంశాలమీద మీడియా లో సరైన చర్చలు జరగాలి. దానికి నేను ఉపయోగ పడాలనే ప్రతిపక్షాల అభ్యర్థి గా వుండటానికి ఒప్పుకున్నాను. నేను భవిష్యత్తులో కూడా యే పార్టీ లో చేరను," అని ఆయన అన్నారు.

తన ప్రత్యర్థితో ముఖా ముఖి చర్చ జరిగి, తామె ఎవరెమిటో ప్రజలకు తెలిస్తే బాగుంటుందని ఆయన అభిప్రాయపడ్డారు. "తాను ఒక భావజాలానికి చెందిన వాడని బీజేపి పరిచయం చేసింది. నన్ను నక్సలైట్ ల మద్దతు దారుగా చూపుతోంది. అలా ముద్ర వేసి నా నోరు మూయించాలని చూస్తున్నారు. కానీ నేను అంత తొందరగా ఓటమిని అంగీకరించే రకం కాదు. నేడు దేశం ఎదుర్కొంటున్న సమస్యల గురించి చర్చ జరగాలి. పార్లమెంట్ సభలు సజావుగా జరగాలంటే సభాధ్యక్షుడి పైన విశ్వాసం వుండాలి. తమ గొంతు నొక్కే ప్రయత్నం జరుగుతుందని ఒక వర్గం భావించటం వల్లే సభల్లో గందరగోళం వస్తున్నది," అని ఆయన అభిప్రాయ పడ్డారు.

సల్వాజుడుమ్ (Salwa Judum) తీర్పు మీద కొందరు చేస్తున్న వ్యాఖ్యల మీద మాట్లాడుతూ ఆ తీర్పు తన ఒక్కడి తీర్పు కాదని, ఆ తీర్పును దానిని మరో 13 మంది జడ్జ్ లు సమీక్షించి ఒక్క అక్షరం ముక్క కూడా మార్చలేని విషయాన్ని ఆయన గుర్తు చేశారు. సల్వాజుడుమ్ కు మరో రూపమే నేటి డీఅర్జీ (District Reserved Guards) ల సుదర్శన్ రెడ్డి అన్నారు.