బడ్జెట్‌లో తెలంగాణ పన్నుల వాటా పెరిగింది: కిషన్ రెడ్డి

హైదరాబాద్‌కు హైస్పీడ్ రైల్ కారిడార్లు, బయోఫార్మా ప్రోత్సాహం వంటి కీలక అంశాలు 2026-27 బడ్జెట్‌లో చోటు దక్కినట్లు కేంద్రమంత్రి కిషన్ రెడ్డి తెలిపారు. తాజా కేంద్ర బడ్జెట్ దేశ అభివృద్ధికి దీర్ఘకాల దిశను చూపిస్తోందని ఆయన పేర్కొన్నారు. బడ్జెట్‌లో ఆర్థిక వ్యవస్థ బలోపేతం, ఉపాధి అవకాశాల పెంపు, మౌలిక వసతుల విస్తరణపై దృష్టి పెట్టినట్లు వివరించారు. ప్రతి వారం కేబినెట్ సమావేశాల్లో కొత్త సంస్కరణలు తీసుకొస్తున్నట్లు చెప్పారు. విదేశీ పెట్టుబడులు, ఐటీ, క్రిటికల్ మినరల్స్ రంగాల్లో కీలక మార్పులు చేసినట్లు తెలిపారు.

వ్యక్తిగత ఆదాయపు పన్ను మినహాయింపు పరిమితిని రూ.12.50 లక్షలకు పెంచినట్లు పేర్కొన్నారు. సామాన్య వినియోగ వస్తువులపై పన్నులు తగ్గించినట్లు కూడా తెలిపారు. ఈ బడ్జెట్ తాత్కాలిక లబ్ధి కంటే భవిష్యత్ ప్రయోజనాల కోసం రూపొందిందని చెప్పారు. 2047 లక్ష్యానికి ఇది తొలి అడుగుగా భావిస్తున్నట్లు వెల్లడించారు. తెలంగాణకు పన్నుల వాటా గత ఏడాదితో పోలిస్తే 13.5 శాతం పెరిగినట్లు తెలిపారు. 2026-27లో రాష్ట్రానికి రూ.33,180 కోట్లు కేటాయించినట్లు పేర్కొన్నారు.

దేశంలో ప్రకటించిన 7 హైస్పీడ్ రైల్ కారిడార్లలో మూడు హైదరాబాద్ నుంచే ప్రారంభమవుతున్నట్లు వివరించారు. హైదరాబాద్-పుణే, హైదరాబాద్-బెంగళూరు, హైదరాబాద్-చెన్నై మార్గాలు నగర అభివృద్ధికి తోడ్పడతాయని తెలిపారు. బయోఫార్మా SHAKTI కార్యక్రమం ద్వారా హైదరాబాద్‌కు ఫార్మా, వ్యాక్సిన్ రంగాల్లో మరింత మేలు జరుగుతుందని చెప్పారు.

వ్యవసాయ రంగంలో ఎరువుల సబ్సిడీకి అదనంగా నిధులు కేటాయించినట్లు తెలిపారు. వస్త్ర పరిశ్రమ అభివృద్ధికి టెక్స్-ఇకో కార్యక్రమం తీసుకొచ్చినట్లు చెప్పారు. వరంగల్‌లో కాకతీయ మెగా టెక్స్‌టైల్ పార్క్‌కు ఇది ఉపయోగపడుతుందని పేర్కొన్నారు. ప్రతి జిల్లాకు ఒక గర్ల్స్ హాస్టల్ నిర్మించాలన్న నిర్ణయం తెలంగాణలో 33 జిల్లాలకు వర్తిస్తుందని తెలిపారు.

రైల్వే బడ్జెట్‌ను 10 శాతం పెంచి రూ.2.77 లక్షల కోట్లకు తీసుకెళ్లినట్లు చెప్పారు. కొత్త లైన్లు, స్టేషన్ల రీమోడలింగ్ వేగంగా సాగుతోందని పేర్కొన్నారు. డేటా సెంటర్ల పెట్టుబడులకు విదేశీ కంపెనీలకు 2047 వరకు టాక్స్ హాలిడే ఇచ్చినట్లు తెలిపారు. హైదరాబాద్ సహా పలు నగరాల్లో డేటా సెంటర్లు పెరుగుతాయని చెప్పారు.

MSMEల కోసం రూ.10 వేల కోట్ల గ్రోత్ ఫండ్ ప్రకటించినట్లు పేర్కొన్నారు. తెలంగాణలోని 38 లక్షల MSMEలకు ఇది మేలు చేస్తుందని తెలిపారు. విదేశాలకు వెళ్లే విద్యార్థుల ఖర్చులపై పన్ను 5 శాతం నుంచి 2 శాతానికి తగ్గించినట్లు చెప్పారు.

హైదరాబాద్ మెట్రో విస్తరణపై రాష్ట్ర ప్రభుత్వం DPR సమర్పిస్తే కేంద్రం నిధులపై నిర్ణయం తీసుకుంటుందని తెలిపారు. రేర్ ఎర్త్ మినరల్స్ కారిడార్ ఏర్పాటు ద్వారా దిగుమతులపై ఆధారాన్ని తగ్గించి ఆత్మనిర్భరత దిశగా అడుగులు వేస్తున్నట్లు వివరించారు. మొత్తంగా ఈ బడ్జెట్ ఉపాధి, మౌలిక వసతులు, భవిష్యత్ అభివృద్ధిని దృష్టిలో పెట్టుకుని రూపొందించారని కిషన్ రెడ్డి వెల్లడించారు.