ఇంకా మండుతున్న మధిర కోల్డ్ స్టోరేజ్

మధిర మండలం ఆత్కూర్ గ్రామంలోని కోల్డ్ స్టోరేజ్‌లో చెలరేగిన అగ్ని ప్రమాదం ఇంకా అదుపులోకి రాకపోవడం ఆందోళన కలిగిస్తోంది. మంటలు ఇప్పుడు రెండో చాంబర్‌కు కూడా వ్యాపించాయి. శనివారం ప్రారంభమైన ఈ అగ్ని ప్రమాదం ఇంకా కొనసాగుతూనే ఉంది. మొదట ఒక చాంబర్‌లో మంటలు చెలరేగగా, తరువాత అవి మరో చాంబర్‌కు విస్తరించినట్లు అధికారులు తెలిపారు. ఈ కోల్డ్ స్టోరేజ్‌లో భారీగా మిర్చి నిల్వలు ఉన్నాయని, అవి పూర్తిగా దగ్ధమయ్యే ప్రమాదం ఉందని రైతులు ఆందోళన వ్యక్తం చేస్తున్నారు.

అగ్నిమాపక సిబ్బంది మంటలను అదుపులోకి తెచ్చేందుకు తీవ్రంగా శ్రమిస్తున్నారు. అదనపు బలగాలను రంగంలోకి దించి చర్యలను వేగవంతం చేశారు. ఈ ఘటనపై ఉప ముఖ్యమంత్రి భట్టి విక్రమార్క స్పందించారు. రాష్ట్ర అగ్నిమాపక శాఖ ఉన్నతాధికారులతో మాట్లాడి, స్కై ఫైర్ ఇంజిన్లను పంపించేందుకు ఏర్పాట్లు చేసినట్లు సమాచారం. ప్రస్తుతం మంటలను పూర్తిగా ఆర్పేందుకు ప్రయత్నాలు కొనసాగుతున్నాయి. పరిస్థితి ఎప్పుడు నియంత్రణలోకి వస్తుందో గమనించాల్సి ఉంది.