మక్తల్ మున్సిపాలిటీలో విషాదం, 6వ వార్డు ఎన్నిక రద్దు
నారాయణపేట జిల్లా మక్తల్లో అభ్యర్థి మృతి నేపథ్యంలో ఎన్నికల ప్రక్రియ నిలిచిపోయింది. అధికారులు ఎన్నికను రద్దు చేశారు.
మక్తల్ మున్సిపాలిటీలో ఎన్నికల వేళ విషాదం చోటుచేసుకుంది. 6వ వార్డు ఎన్నికను అధికారులు రద్దు చేశారు. అభ్యర్థి మరణమే దీనికి కారణంగా మారింది. నారాయణపేట జిల్లా మక్తల్ మున్సిపాలిటీ 6వ వార్డు నుంచి భారతీయ జనతా పార్టీ తరఫున పోటీ చేస్తున్న మహదేవ్ ఉరివేసుకుని ఆత్మహత్యకు పాల్పడ్డాడు. ఈ ఘటన నిన్న జరగగా స్థానికంగా కలకలం రేగింది.
అభ్యర్థి మృతితో ఆ వార్డులో ఎన్నికల ప్రక్రియ నిలిచిపోయింది. మున్సిపల్ ఎన్నికల నిబంధనల ప్రకారం ఎన్నికను రద్దు చేసినట్టు అధికారులు నిర్ణయించారు. సంఘటనా స్థలాన్ని డీఎస్పీ లింగయ్య పరిశీలించారు. మృతుడి మొబైల్ ఫోన్ను పోలీసులు స్వాధీనం చేసుకుని విచారణ ప్రారంభించారు.
మహదేవ్ మృతికి రాజకీయ ప్రత్యర్థుల వేధింపులే కారణమని కుటుంబ సభ్యులు ఆరోపించారు. ఈ అంశంపై అన్ని కోణాల్లో దర్యాప్తు జరుగుతున్నట్టు పోలీసులు తెలిపారు. ఈ ఘటనపై తెలంగాణ BJP చీఫ్ రామచందర్ రావు సంతాపం వ్యక్తం చేశారు. మరోవైపు ఎంపీ లక్ష్మణ్ స్పందిస్తూ ఈ ఘటన దారుణమని పేర్కొన్నట్టు సమాచారం.
ఇదే సమయంలో రిటర్నింగ్ అధికారి శివయ్య అధికారిక ప్రకటన విడుదల చేశారు. అభ్యర్థి ఆత్మహత్య నేపథ్యంలో 6వ వార్డు ఎన్నికను వాయిదా వేసినట్టు తెలిపారు. రాష్ట్ర ఎన్నికల కమిషన్ ఆదేశాల మేరకు తదుపరి వివరాలను త్వరలో ప్రకటిస్తామని స్పష్టం చేశారు.
