నాదర్‌గుల్ భూముల వివాదం.. అసలేం జరుగుతోంది?

హైదరాబాద్ శివాదులో ఉన్న నాదర్‌గుల్ భూముల చుట్టే ప్రస్తుతం రాష్ట్ర రాజకీయాలు నడుస్తున్నాయి. చాలా కాలంగా వీటి విషయంలో భారీ రాజకీయ వివాదం నడుస్తోంది. మధ్యాలో కొన్నాళ్లు చల్లబడినా ఇప్పుడు మరోసారి ఈ భూముల వివాదం రాజుకుంది. రాజకీయంగా కాకరేపుతోంది. అధికార, ప్రతిపక్షాల మధ్య ఈ భూముల విషయంలో పేలుతున్న మాటల తూటాలు ఈ అంశాన్ని మరింత కీలకంగా మారుస్తున్నాయి. ప్రభుత్వం అన్యాయంగా పేదల భూములను లాక్కుంటున్నాయని మాజీ మంత్రి హరీష్ రావు ఆరోపిస్తున్నారు. ఆయన ఆరోపణలకు మంత్రి పొంగులేటి శ్రీనివాస రెడ్డి ఘాటుగా స్పందించారు. వాటాలు రాలేదని వారు ఇప్పుడు వివాదం చేస్తున్నారని, అసలు ఈ భూములకు రిజిస్ట్రేషన్‌లు బీఆర్ఎస్ హయాంలోనే జరిగాయని ఆయన వ్యాఖ్యానించారు.

నాదర్‌గుల్‌లోని సర్వే నంబర్ 613 పరిధిలో సుమారు 373 ఎకరాల భూమి యాజమాన్యంపై సంవత్సరాలుగా వివాదం కొనసాగుతోంది. పాత రికార్డుల ప్రకారం ఈ భూమి ఒకప్పుడు ప్రైవేట్ ఆస్తిగా నమోదు అయింది. తర్వాత కాలంలో ఇది ప్రభుత్వ భూమి కాదా అన్న అంశంపై వివాదం మొదలైంది. ఈ భూమిని ఒక దశలో నిషేధిత జాబితాలో చేర్చారు. మరోవైపు, ప్రైవేట్ పక్షాలు తమకు హక్కులు ఉన్నాయని కోర్టులను ఆశ్రయించాయి. సుప్రీంకోర్టు స్థాయిలో కూడా ఈ అంశం విచారణకు వెళ్లింది. వివిధ దశల్లో వచ్చిన తీర్పులు భిన్నంగా ఉండటంతో స్పష్టత లేకుండా పరిస్థితి క్లిష్టమైంది.

ఇక 2014లో అప్పటి ప్రభుత్వం ఈ భూములకు రిజిస్ట్రేషన్లు జరిపిందని, 2016లో మ్యుటేషన్ ప్రక్రియ పూర్తయిందని ప్రస్తుత ప్రభుత్వం చెబుతోంది. 2022లోనే నిర్మాణాలు ప్రారంభమయ్యాయని కూడా పేర్కొంటోంది. అయితే ఈ వ్యవహారంలో భారీ అవకతవకలు జరిగాయని బీఆర్ఎస్ నేతలు ఆరోపిస్తున్నారు. రూ.7 వేల కోట్ల విలువైన భూమిలో కుంభకోణం జరుగుతోందని, పేదల భూములను ఆక్రమిస్తున్నారని విమర్శిస్తున్నారు. కొంతమంది కంపెనీలు, ప్రభావశీలుల ప్రమేయం ఉందని కూడా ఆరోపణలు వినిపిస్తున్నాయి.

దీనికి ప్రతిగా ప్రభుత్వం ఈ ఆరోపణలను ఖండిస్తోంది. గత ప్రభుత్వ కాలంలోనే కీలక నిర్ణయాలు జరిగాయని, ఇప్పుడు తప్పుడు ప్రచారం జరుగుతోందని అంటోంది. తమకు లేదా కుటుంబ సభ్యులకు సంబంధం లేదని స్పష్టం చేస్తోంది. ఇక ఈ వ్యవహారంలో ఉన్న సంస్థలు కూడా స్పందించాయి. తమకు చట్టబద్ధమైన హక్కులు ఉన్నాయని, కోర్టు తీర్పుల ఆధారంగా భూములను అభివృద్ధి చేస్తున్నామని పేర్కొన్నాయి. రాజకీయ ఆరోపణలను అవాస్తవంగా కొట్టిపారేశాయి.

ప్రస్తుతం ఈ భూములపై న్యాయపరమైన వివాదం కొనసాగుతూనే ఉంది. కోర్టు తుది నిర్ణయం రాకపోవడంతో అనిశ్చితి నెలకొంది. మొత్తానికి, నాదర్‌గుల్ భూముల వివాదం యాజమాన్యం, కోర్టు తీర్పులు, రాజకీయ ఆరోపణలు కలిసిన క్లిష్ట అంశంగా మారింది. ఈ వివాదానికి పూర్తి స్థాయి స్పష్టత రావాలంటే న్యాయస్థానాల తుది తీర్పు కీలకం కానుంది.